କେନ୍ଦୁଝର, ୪।୬(ସ୍ବ.ପ୍ର.): କେନ୍ଦୁଝର ସଦର ତହସିଲ ରାଇସୁଆଁ ରାଜସ୍ବ ନିରୀକ୍ଷକ ଅନ୍ତର୍ଗତ କ୍ଷୁଦ୍ର ଜଳସେଚନ ବିଭାଗର ରାଇସୁଆଁ-ଗୋପୀନାଥପୁର-ସିଲସୁଆଁ ମୁଖ୍ୟ କେନାଲ ଜମି ଜବରଦଖଲ ଯୋଗୁ ନୂତନ କେନାଲ ନିର୍ମାଣରେ ବାଧକ ଦେଖାଦେଇଛି। ପ୍ରାୟ ୫୯ ଲକ୍ଷ ୬୫ ହଜାର ଟଙ୍କା ବ୍ୟୟ ଅଟକଳରେ ନିର୍ମାଣ ହେଉଥିବା କେନାଲ ୫ ମେ, ୨୦୨୨ ରେ ଆରମ୍ଭ ହୋଇ ୪ ଏପ୍ରିଲ ୨୦୨୩ ସୁଦ୍ଧା ସରିବା ପାଇଁ ସମୟ ଧାର୍ଯ୍ୟ ହୋଇଥିବା ସୂଚନା ଫଳକରେ ଉଲ୍ଲେଖ ରହିଛି। ଧାର୍ଯ୍ୟ ସମୟସୀମା ସରିଯାଇଥିଲେ ହେଁ କାମ ସରୁ ନ ଥିବାରୁ ଚଳିତ ବର୍ଷ ମଧ୍ୟ ଜମିକୁ ପାଣି ମାଡ଼ିବା ନେଇ ଅନିଶ୍ଚିତତା ଦେଖାଦେଇଛି। ଫଳରେ ଚାଷୀଙ୍କ ମଧ୍ୟରେ ଅସନ୍ତୋଷ ବୃଦ୍ଧି ପାଉଛି।
ପ୍ରକାଶ ଯେ, ରାଇସୁଆଁ ପଞ୍ଚାୟତର ଆଂଶିକ, ସିଲସୁଆଁ ଓ ଗୋପୀନାଥପୁର ପଞ୍ଚାୟତର ସମସ୍ତ ଚାଷଜମିକୁ ଜଳସେଚନ ସୁବିଧା ଯୋଗାଇବାକୁ ଏହି କେନାଲ ୧୯୭୨ ମସିହାରେ କରାଯାଇଥିଲା। ତେବେ ଜାତୀୟ ରାଜପଥ ୨୧୫ ସମ୍ପ୍ରସାରଣ କରି ୪ ଲେନ୍ କରିବା ସମୟରେ ୨୦୧୦ରେ ଗୋପୀନାଥପୁର ନିକଟରେ ୭୦୦ ମିଟର ମାଟି ପୋତିଦେବାରୁ କେନାଲ ବନ୍ଦ ହୋଇ ପାଣି ଯିବାରେ ସମସ୍ୟା ଦେଖାଦେଇଥିଲା। କ୍ଷୁଦ୍ର ଜଳସେଚନ ବିଭାଗ ପକ୍ଷରୁ ଏହାର କିଛି ଅଂଶ ମରାମତି କରାଯାଇଥିବାବେଳେ ଏବେ ଅବଶିଷ୍ଟ କାମ କରାଯାଉଛି। ସାନମାଛକାନ୍ଦଣା କ୍ଷୁଦ୍ର ଜଳସେଚନ ପ୍ରକଳ୍ପରେ ନିର୍ମିତ ଉକ୍ତ ମୁଖ୍ୟ କେନାଲ ହେଲେ ରାଇସୁଆଁ, ସିଲସୁଆଁ, ଗୋପୀନାଥପୁର ୩ ପଞ୍ଚାୟତର ୩୮୦ ହେକ୍ଟର ଜମିକୁ ଜଳସେଚନ ହୋଇପାରିବ। ମାତ୍ର ୬୮୮୯ ମିଟର ଲମ୍ବ ମୁଖ୍ୟ କେନାଲ ମଧ୍ୟରୁ ପ୍ରାୟ ୪୪୫ ମିଟର କେନାଲ ଜବରଦଖଲରେ ରହିଛି। ଏ ନେଇ ବିଭାଗ ପକ୍ଷରୁ ମାପଚୁପ କରି ଜବରଦଖଲ ମୁକ୍ତ କରିବା ପାଇଁ ବାରମ୍ବାର ଚିଠି କରିବା ସତ୍ତ୍ୱେ ସଦର ତହସିଲ ପକ୍ଷରୁ କୌଣସି ପଦକ୍ଷେପ ଗ୍ରହଣ କରାଯାଉନାହିଁ ବୋଲି ବିଭାଗୀୟ ଅଧୀକ୍ଷଣ ଯନ୍ତ୍ରୀ ସୁଧାଂଶୁ ଶେଖର ସାହୁ ସୂଚନା ଦେଇଛନ୍ତି। ଫଳରେ କେନାଲ ନିର୍ମାଣ କାର୍ଯ୍ୟ ଆଗେଇ ପାରୁନାହିଁ। ରାଇସୁଆଁ ନିକଟରେ ଖନନ କାମ ସରି ନ ଥିବା ବେଳେ କଂକ୍ରିଟ କାମ ବାକି ରହିଛି। କେନାଲ କାମରେ କେତେକ ସ୍ଥାନରେ କଂକ୍ରିଟ କେନାଲ ବଦଳରେ ଜମି ତଳେ ହ୍ୟୁମ ପାଇପ୍ ବସାଯାଇଥିବା ଜଣାପଡ଼ିଛି। ତହସିଲ ପକ୍ଷରୁ ଜମି ଯୋଗାଣରେ ବିଳମ୍ବ ହେଉଥିବାରୁ କାର୍ଯ୍ୟ ଆଗେଇ ପାରୁନି ବୋଲି କ୍ଷୁଦ୍ର ଜଳସେଚନ ବିଭାଗ ପକ୍ଷରୁ କୁହାଯାଉଛି। ଏ ନେଇ ସଦର ତହସିଲଦାର ଆଶିଷ ମହାପାତ୍ର କହିଛନ୍ତି, ଉକ୍ତ ଜମି ଏନ୍ଏଚ୍ଏଆଇ ନିୟନ୍ତ୍ରଣରେ ରହିଛି। ଏଣୁ ଏନ୍ଏଚ୍ଏଆଇ ହିଁ ଏହାର ଉଚ୍ଛେଦ କରିପାରିବ। ତେବେ ଏନେଇ ଆଲୋଚନା କରାଯାଇଛି। ଖୁବ୍ଶୀଘ୍ର ଏନ୍ଏଚ୍ଏଆଇ ପକ୍ଷରୁ ପଦକ୍ଷେପ ନେବା ପରେ ଉଚ୍ଛେଦ କାମ ହୋଇଯିବ।
