ଭଞ୍ଜନଗର, ୪।୬(ଡି.ଏନ.ଏ): ବେଲଗୁଣ୍ଠା ବ୍ଲକ ଗୋବରା ଏବଂ ବାସୁଦେବପୁର ଗ୍ରାମବାସୀଙ୍କୁ ପାଇପ ଯୋଗେ ପାଣି ଯୋଗାଇ ଦେବାପାଇଁ ବାସୁଦେବପୁରଠାରେ ୨ଲକ୍ଷ ଲିଟର କ୍ଷମତା ବିଶିଷ୍ଠ ଓଭରହେଡ୍ ପାଣି ଟାଙ୍କି (ଉତଳ ଜଳଭଣ୍ଡାର) ନିର୍ମାଣ କରାଯାଇଛି। ଆଉ କିଛିଦିନ ପରେ ଉକ୍ତ ପ୍ରକଳ୍ପ ଉଦ୍ଘାଟନ ହୋଇଥାନ୍ତି। ଏଥିପାଇଁ ପ୍ରସ୍ତୁତି ଚାଲିଛି। ଏହିଭଳି ପରିସ୍ଥିତିରେ ଓଭରହେଡ୍ ପାଣି ଟାଙ୍କିରେ ଶନିବାର ୪ଟାରେ ପାଣି ଭର୍ତ୍ତି କରିବା ପରେ ପାଣି ଗଳୁଥିବା ଜଣାପଡ଼ିଛି। ଶୁକ୍ରବାର ମଧ୍ୟ ଏହି ସମସସ୍ୟା ହୋଇଥିଲା। ଏ ନେଇ ଗ୍ରାମବାସୀ ଅସନ୍ତୋଷ ବ୍ୟକ୍ତ କରିଛନ୍ତି। କାମ ନିମ୍ନମାନର ହୋଇଥିବାରୁ ଏହିଭଳି ଅବସ୍ଥା ହୋଇଛି। ବିଭାଗୀୟ ଉଚ୍ଚ କର୍ତ୍ତୃପକ୍ଷ ତୁରନ୍ତ ଏଥିପ୍ରତି ଦୃଷ୍ଟିଦେଇ ଆବଶ୍ୟକ ପଦକ୍ଷେପ ନେବାକୁ ଗ୍ରାମବାସୀ ଦାବି କରିଛନ୍ତି। ଏଥିସହ ଗ୍ରାମବାସୀ ଶନିବାର ଗଞ୍ଜାମ ଜିଲାପାଳଙ୍କୁ ଅନ୍ଲାଇନ୍ ମାଧ୍ୟମରେ ଘଟଣା ସମ୍ପର୍କରେ ଅଭିଯୋଗ କରିଛନ୍ତି। ପ୍ରକାଶ ଯେ, ଉକ୍ତ ଦୁଇ ଗ୍ରାମବାସୀଙ୍କୁ ବସୁଧା ଯୋଜନାରେ ପାଇପ୍ ଯୋଗେ ପାଣି ଯୋଗାଇ ଦେବାପାଇଁ ସରକାର ନିଷ୍ପତ୍ତି ନେଇଥିଲେ। ଏବାବଦରେ ୧ କୋଟି ୧୪ଲକ୍ଷ ଟଙ୍କା ଅନୁମୋଦନ ହୋଇଥିଲା। ଗତ ଅପ୍ରେଲ ମାସ ପହିଲାରେ ସମ୍ପୃକ୍ତ ପଞ୍ଚାୟତର ସମିତିସଭ୍ୟ ବିଭୁପାଦ ଜେନା ପ୍ରକଳ୍ପ କାମ ତୁରନ୍ତ ସାରି ଲୋକଙ୍କୁ ପାଣି ଯୋଗାଇ ଦେବାପାଇଁ ଦାବି କରିଥିଲେ। ଏଥିସହ ଗୋବରାରେ ଥିବା ମହାତ୍ମାଗାନ୍ଧୀଙ୍କ ପ୍ରତିମୁର୍ତ୍ତି ସମ୍ମୁଖରେ ଆମରଣ ଅନଶନ କରିଥିଲେ। ଏହାପରେ ବିଭାଗୀୟ ଉଚ୍ଚ ପଦାଧିକାରୀ ଘଟଣାସ୍ଥଳରେ ପହଞ୍ଚତ୍ ପାଣି ଲୋକଙ୍କୁ ତୁରନ୍ତ ଯୋଗାଇ ଦିଆଯିବ ବୋଲି ପ୍ରତିଶ୍ରୁତି ଦେବାପରେ ବିଭୁ ଆନ୍ଦୋଳନରୁ ଓହରିଥିଲେ। ବର୍ତ୍ତମାନ ୧୪ଶହରୁ ଊର୍ଦ୍ଧ୍ୱ ଘରକୁ ପାଇପ୍ ଯୋଗେ ପରୀକ୍ଷା ମୁଳକ ଭାବେ ପାଣି ଯୋଗାଣ ବିଗତ କିଛିଦିନ ହେବ ଚାଲିଛି । ପାଇପ୍ ବିଛା କାମ ମଧ୍ୟ ଠିକ୍ ହୋଇନଥିବା ଯୋଗୁ ଅନେକ ସ୍ଥାନରେ ପାଇପ୍ ଫାଟିଲାଣି। ଓଭରହେଡ୍ ଟାଙ୍କି ମଧ୍ୟ ଠିକ୍ ଭାବେ ହୋଇନଥିବାରୁ ଟାଙ୍କିରୁ ପାଣି ଲିକ୍ ହେଲାଣି। ଆଗାମୀ ଦିନରେ ତାହା ଟାଙ୍କି ପ୍ରତି ବିପଦ ଆଶଙ୍କା ରହିଛି। ପାଣି ଲିକ୍ ହେଉଥିବା ନେଇ ଶନିବାର ପ୍ରଚାର ହେବାପରେ ଲୋକେ ପାଣି ଟାଙ୍କି ନିକଟରେ ରୁଣ୍ଡ ହୋଇ ପାଣି କେଉଁ ପଟେ ଲିକ୍ ହେଉଛି ଦେଖିଥିଲେ। ସେଠାରେ କାମ କରୁଥିବା ଜଣେ ଶ୍ରମିକ ଗ୍ରାମବାସୀଙ୍କୁ କହିଛନ୍ତି ଯେ ଏହା ସାମାନ୍ୟ ସମସ୍ୟା। ସିମେଣ୍ଟ ଟିକେ ଦେଇଦେଲେ ସମସ୍ୟା ଦୁର ହୋଇଯିବ। ଏ ନେଇ ବେଲଗୁଣ୍ଠା ବ୍ଲକ ଗ୍ରାମ୍ୟ ପାଇପ ଜଳ ଯୋଗାଣ ବିଭାଗ ଯନ୍ତ୍ରୀ ସୁଜିତ ପାତ୍ରଙ୍କ ସହ ଯୋଗାଯୋଗ କରିବାରୁ ସେ ଏଠାରେ କହିଛନ୍ତି ଯେ ଟାଙ୍କିରୁ କେଉଁଠି ପାଣି ଲିକ୍ ହେଉନାହିଁ। ଯେଉଁ ଠିକାଦାର କାମ ନେଇଥିଲେ ସେ ଗତ ମାର୍ଚ୍ଚ ମାସ ଶେଷ ସୁଧା କାମ ସାରିବା କଥା। କିନ୍ତୁ ସେ କାମ ସାରିଲେ ନାହିଁ। ତେଣୁ ଅନ୍ୟ ଏକ ଠିକାଦାରଙ୍କ ମାଧ୍ୟମରେ ବଳକା କାମ ଶେଷ କରିବା ପାଇଁ ପଦକ୍ଷେପ ନିଆଯାଇଛି। ବର୍ତ୍ତମାନ ସୁଧା ୧୪ଶହ ପରିବାରକୁ ପାଇପ୍ ଲାଇନ୍ ଦିଆହୋଇଛି। ବଳକା ଥିବା କାମ ଶୀଘ୍ର ସରିବ। ବର୍ତ୍ତମାନ ପରୀକ୍ଷା ମୁଳକ ଭାବେ ପାଣି ଦିଆଚାଲିଛି।
