ଭୋଗରାଇ,୫ା୯:ଛାତ୍ରଜୀବନରୁ ଆର୍ଥିକ ସଙ୍କଟ ଓ ସଂଘର୍ଷ ମଧ୍ୟରେ ଆଗକୁ ବଢ଼ିବାର ସଂକଳ୍ପ ନେଇଥିବା ନିଆରା ଶିକ୍ଷକ ହେଉଛନ୍ତି ସନ୍ତୋଷ କୁମାର ପାତ୍ର। ବାଲେଶ୍ୱର ଜିଲା ଭୋଗରାଇ ବ୍ଲକ ଅଧୀନ ନସ୍କରପୁର ଗ୍ରାମରେ ତାଙ୍କର ଘର। ତାଙ୍କ ମା’ ଶାରଦା ମଣି ଓ ପିତା ହେଉଛନ୍ତି ଉମାକାନ୍ତ ପାତ୍ର। ଜଣେ ସରଳ ନିଷ୍କପଟ ସାଧାରଣ ମଣିଷ ଭାବେ ସେ ସବୁଠି ସନ୍ତୋଷ ସାର ଭାବେ ପରିଚିତ। ସଭା, ସମିତି, ସାଂସ୍କୃତିକ କାର୍ଯ୍ୟକ୍ରମ , ରୋଗୀସେବା କି ସାଙ୍ଗଠନିକ କାର୍ଯ୍ୟ ହେଉ ତାଙ୍କର ଉପସ୍ଥିତି ଆବଶ୍ୟକତା ଲୋଡ଼ାଯାଇ ଥାଏ। ଛାତ୍ର ବତ୍ସଳ, ଆଦର୍ଶ ଶିକ୍ଷକ ଭାବେ ଶିକ୍ଷା ପ୍ରେମୀ ମହଲରେ ସେ ସ୍ବତନ୍ତ୍ର ସ୍ଥାନ ଅଧିକାର କରିଛନ୍ତି। ଛାତ୍ର ଜୀବନରୁ ଭବିଷ୍ୟତ ସ୍ବପ୍ନ ଦେଖୁଥିବା ଏବଂ ଏହାକୁ ସଫଳ କରିବା ପାଇଁ ଅକ୍ଲାନ୍ତ ସାଧନାରେ ବ୍ରତୀହୋଇ ଏମ୍ଏ ଠାରୁ ଏମ୍ ଫିଲ୍ ପର୍ଯ୍ୟନ୍ତ ଉଚ୍ଚ ଶିକ୍ଷା ଅର୍ଜନ କରିଛନ୍ତି। ଶିକ୍ଷା ସମାପ୍ତିପରେ ୧୯୭୯ଠାରୁ ୨୦୨୦ ଜୁନ ୨୬ ତାରିଖ ପର୍ଯ୍ୟନ୍ତ ଭୋଗରାଇ ସୀମାନ୍ତ ଭୋଳାନାଥ ବିଦ୍ୟାପୀଠ, ବାଡ଼ସରିସାଠାରେ ଗଣିତ ଶିକ୍ଷକ ଭାବେ ଶିକ୍ଷକତା ବୃତ୍ତି ସେ ଆପଣେଇ ଥିଲେ। ସାହିତ୍ୟ, ଇଂରାଜୀରେ ମଧ୍ୟ ତାଙ୍କର ଅଗାଧ ପାଣ୍ଡିତ୍ୟ ରହିଛି। ଇଂରାଜୀ ବ୍ୟାକରଣକୁ କବିତା ମାଧ୍ୟମରେ ପ୍ରକାଶ କରିବା ତାଙ୍କର ଏକ ଅନବଦ୍ୟ ସୃଷ୍ଟି। ଛାତ୍ର ଜୀବନରୁ କବିତା ରଚନା କରିବା ସହିତ ଅଦ୍ୟାବଧି ୧୦ରୁ ଊଦ୍ଧ୍ୱର୍ର୍ କବିତା ପୁସ୍ତକ, ଉପନ୍ୟାସ, ପ୍ରବନ୍ଧ, ନାଟକ ଓ ଗବେଷଣାତ୍ମକ ପୁସ୍ତକ ରଚୟିତା ଭାବେ ସାରସ୍ବତ ଜଗତକୁ ସେ କରିଛନ୍ତି ରୁଦ୍ଧିମନ୍ତ। ସୀମାନ୍ତ ହାଇସ୍କୁଲରେ ପ୍ରଧାନ ଶିକ୍ଷକ ଥିବାବେଳେ ଓଡ଼ିଆ ଭାଷା, ସାହିତ୍ୟ ଓ ସଂସ୍କୃତିକୁ ପ୍ରସାର କରିବା ଦିଗରେ ତାଙ୍କର ଭୂମିକା ଅତୁଳନୀୟ। ତାଙ୍କ ଉଦ୍ୟମରେ ଓଡ଼ିଶା ସମେତ ପଶ୍ଚିମବଙ୍ଗର ବହୁ ଛାତ୍ରୀଛାତ୍ର ଆଜି ଉଚ୍ଚ ସ୍ଥାନରେ ପ୍ରତିଷ୍ଠିତ ହୋଇ ପାରିଛନ୍ତି। ରୁପ୍ସା ଓ ସୋହରିଆ ହାଇସ୍କୁଲରେ ନିଷ୍ଠାପର ଭାବେ କାର୍ଯ୍ୟକରି ଅବସର ନେଇଥିଲେ ମଧ୍ୟ ସେ ଥକି ପଡ଼ି ନାହାନ୍ତି। ବିନା ଅର୍ଥରେ ଛାତ୍ରୀଛାତ୍ରମାନଙ୍କୁ ପାଠ ପଢ଼ାଇବା ସହିତ ସାହିତ୍ୟ ସାଧନା ଜାରି ରଖିଛନ୍ତି। ଜଣେ ଆଦର୍ଶ ଶିକ୍ଷକ ଭାବେ ଶିକ୍ଷାପ୍ରେମୀ ମହଲରେ ସ୍ବତନ୍ତ୍ର ପରିଚିତି ସୃଷ୍ଟି କରିଛନ୍ତି। କେନ୍ଦ୍ର, ରାଜ୍ୟ ଓ ବହୁ ଅନୁଷ୍ଠାନ ପକ୍ଷରୁ ମଧ୍ୟ ସେ ସମ୍ମାନିତ ହୋଇଛନ୍ତି।
ପ୍ରଦୀପ ଦାସ
