ଓସ୍ଲୋ ୧୦ା୧୧: ନରଓ୍ବେ ପ୍ରିନ୍ସେସ୍ ମାର୍ଥା ଲୁଇସ୍ ତାଙ୍କ ପ୍ରେମିକଙ୍କ ପାଇଁ ରାଜକାର୍ଯ୍ୟ ପରିତ୍ୟାଗ କରିଛନ୍ତି। ହଲିଉଡ୍ର ଆଧ୍ୟାତ୍ମିକ ଗୁରୁ ଡୁରେକ୍ ଭେରେଟ୍ଙ୍କ ସହ ୨୧ବର୍ଷୀୟା ରାଜକୁମାରୀଙ୍କ ସମ୍ବନ୍ଧକୁ ନେଇ ଦେଶସାରା ଚର୍ଚ୍ଚା। ଆତ୍ମଘୋଷିତ ଗଡ୍ମ୍ୟାନ୍ ଡୁରେକ୍ଙ୍କ ସାଙ୍ଗରେ ସେ ନିଜ ଅଲ୍ଟରନେଟିଭ୍ ମେଡିସିନ୍ ବ୍ୟବସାୟ ଉପରେ ଫୋକସ୍ କରିବା ପାଇଁ ଏଭଳି ନିଷ୍ପତ୍ତି ନେଇଥିବା କହିଛନ୍ତି।
୪୭ ବର୍ଷୀୟ ଆଫ୍ରିକୀୟ-ଆମେରିକୀୟ ଅଲ୍ଟରନେଟିଭ୍ ଥେରାପିଷ୍ଟ ଡୁରେକ୍ ନିଜ ପୁସ୍ତକ ‘ସ୍ପିରିଟ୍ ହ୍ୟାକିଂ’ରେ କ୍ୟାନ୍ସର ସମ୍ପର୍କରେ ଉଲ୍ଲେଖ କରିଛନ୍ତି। ତାଙ୍କ ଓ୍ବେ୍ବ୍ ସାଇଟ୍ ଜରିଆରେ ସେ ‘ସ୍ପିରିଟ୍ ଅପ୍ଟିମାଇଜର୍’ ନାମରେ ଏକ ଲକେଟ୍ ବିକ୍ରି କରନ୍ତି। ଏହାର ଦାମ୍ ୨୨୨ ଡଲାର। ଏହି ଲକେଟ୍ ପିନ୍ଧି କୋଭିଡ୍-୧୯ ମହାମାରୀ କବଳରୁ ସେ ମୁକ୍ତ ହୋଇଥିବା ଦାବି କରିଛନ୍ତି। ଗତ ସେପ୍ଟେମ୍ବରରେ ନରଓ୍ବେରେ କରାଯାଇଥିବା ଏକ ଜନମତ ସର୍ଭେରେ ଜଣାପଡ଼ିଛି ଯେ, ପ୍ରିନ୍ସେସ୍ ଏବଂ ସ୍ପିରିଚୁଆଲ ଗୁରୁଙ୍କ ଏହି ସମ୍ପର୍କ ଯୋଗୁ ରାଜ ପରିବାର ଲୋକପ୍ରିୟତା ହରାଇ ଦେଇଛି। ପ୍ରିନ୍ସେସ୍ ମାର୍ଥା ଲୁଇସ ଇନ୍ଷ୍ଟାଗ୍ରାମରେ ରୟାଲ୍ ହାଉସ୍ (ରାଜପ୍ରାସାଦ)ରେ ଶାନ୍ତି ଆଣିବା ପାଇଁ ରାଜକୀୟ କର୍ତ୍ତବ୍ୟରୁ ଓହରିଯିବା ନେଇ ମଙ୍ଗଳବାର ସୂଚନା ଦେଇଛନ୍ତି।
ଉକ୍ତ ଭିଡିଓରେ ସେ କହିଛନ୍ତି, ବର୍ତ୍ତମାନ ସମୟରେ ସେ ଆଉ ରୟାଲ୍ ହାଉସ୍ର ପ୍ରତିନିଧିତ୍ୱ କରିବେ ନାହିଁ। ତେବେ ରାଜାଙ୍କ ଇଚ୍ଛା ଅନୁସାରେ ତାଙ୍କ ପ୍ରିନ୍ସେସ୍ ଟାଇଟଲ ବଳବତ୍ତର ରହିବ। କୁଇନ୍ ସୋନ୍ଜାଙ୍କ ସହ କିଙ୍ଗ୍ ହରାଲ୍ଡ ଗଣମାଧ୍ୟମ ଆଗରେ ଝିଅଙ୍କ ଏହି ନିଷ୍ପତ୍ତିକୁ ନେଇ ଚିନ୍ତା ବ୍ୟକ୍ତ କରିଛନ୍ତି। ପରୀମାନଙ୍କ ସହ କଥା ହୁଅନ୍ତି ବୋଲି ଦାବି କରୁଥିବା ମାର୍ଥା ୨୦୦୨ରେ ଭବିଷ୍ୟବକ୍ତା ସାଜିଥିଲେ। ଏଥିଯୋଗୁ ତାଙ୍କୁ ‘ହର୍ ରୟାଲ୍ ହାଇନେସ୍’ ଉପାଧି ହରାଇବାକୁ ପଡ଼ିଥିଲା। ୩ ସନ୍ତାନଙ୍କ ଜନନୀ ମାର୍ଥା ଲେଖକ ଆରି ମିକାଏଲ ବେନ୍ଙ୍କୁ ୨୦୧୭ରେ ଛାଡ଼ପତ୍ର ଦେଇଥିଲେ।
