ପଦ୍ମପୁର, ୧୬।୫ (ଡି.ଏନ.ଏ.): ଭଦ୍ରକ ଜିଲାର ବାସୁଦେବପୁର ବ୍ଲକ ବାତ୍ୟା ଓ ବନ୍ୟା ପ୍ରବଣ ଅଞ୍ଚଳ। ପ୍ରତିବର୍ଷ ଲଘୁଚାପ ଜନିତ ବନ୍ୟା ଓ ବାତ୍ୟାରେ କ୍ଷୟକ୍ଷତିକୁ ରୋକିବା ପାଇଁ ଆରମ୍ଭ ହୋଇଛି ପୂର୍ବ ପ୍ରସ୍ତୁତି। ବ୍ଲକର ମନ୍ତେଈ ନଦୀକୂଳବର୍ତ୍ତୀ ବାଲିମେଦ ଓ ଆନ୍ଦୋଳା ପଞ୍ଚାୟତରେ ବାଲେଶ୍ୱର ସୋସିଆଲ ସଭିର୍ର୍ସ ସୋସାଇଟି ପକ୍ଷରୁ ବିଭିନ୍ନ ଗ୍ରାମରେ ବନ୍ୟା ବାତ୍ୟାର କ୍ଷୟକ୍ଷତିକୁ ରୋକିବା ଲାଗି ପ୍ରଶାସନ ସହଯୋଗରେ ପ୍ରସ୍ତୁତି ଚାଲିଛି। ଗ୍ରାମର ସମ୍ବଳ, ସାମାଜିକ, ବିପଦପୂର୍ଣ୍ଣ, ସୁରକ୍ଷିତ ସ୍ଥାନଗୁଡ଼ିକୁ ଚିହ୍ନଟ କରାଯିବା ସହ ବିଭିନ୍ନ ଟାସ୍କଫୋର୍ସକୁ ମଧ୍ୟ ତାଲିମ ପ୍ରଦାନ କରାଯାଉଛି। ଏସବୁର ତଦାରଖ କରିବା ପାଇଁ କାରିଟାସ ଜର୍ମାନୀର ମାଟ୍ରିନା ରବିବାର କ୍ଷେତ୍ର ପରିଦର୍ଶନ କରି ବିଭିନ୍ନ ଦିଗ ବିଷୟରେ ଗ୍ରାମବାସୀଙ୍କ ସହ ଆଲୋଚନା କରିଛନ୍ତି। ଆଗକୁ ବର୍ଷାଋତୁ ଆସୁଥିବାରୁ ପ୍ରସ୍ତୁତି ସାରିବାକୁ ସେ ସମସ୍ତଙ୍କ ସହଯୋଗ ଲୋଡ଼ିଥିଲେ। ତାଙ୍କ ସହ ସଂସ୍ଥାର ନିର୍ଦ୍ଦେଶକ ଫାଦେର ଲିଜୋ, ପ୍ରକଳ୍ପ ସଂଯୋଜକ ଜନ୍ ଉଇଲିଅମ ବାରିକ, ଦୀପାଞ୍ଜଳି ଦାସ ପ୍ରମୁଖ ଉପସ୍ଥିତ ଥିଲେ। ସେ ବାଲିମେଦ ପଞ୍ଚାୟତର କାଳିଦାସପୁର ଓ ଚାରବାଟିଆ ଗ୍ରାମକୁ ଯାଇ ପରିଦର୍ଶନ କରି ଫେରିଯାଇଛନ୍ତି।
