ଦାରିଙ୍ଗବାଡ଼ି,୨୪।୩(ଡି.ଏନ.ଏ): ଛାତ୍ରୀଛାତ୍ରଙ୍କ ମୂଳମନ୍ତ୍ର ହେଲା ଶିକ୍ଷାନୁଷ୍ଠାନଗୁଡ଼ିକରୁ ବିଦ୍ୟା ପ୍ରାପ୍ତ କରିବା ସହ ଖେଳକୁଦ, ସାମାଜିକ ଜ୍ଞାନ, କବିତା, ଚିତ୍ରାଙ୍କନ, ଦେଶବିଦେଶର ସୂଚନା ସମ୍ପର୍କରେ ଶିକ୍ଷା ଲାଭ କରିବା। ସକାଳେ ନିଜ ବିଦ୍ୟାଳୟକୁ ପ୍ରବେଶ କରି ପଢ଼ା ଆଗରୁ ପ୍ରଥମେ ସାମୂହିକ ପ୍ରାର୍ଥନା କରାଯାଇଥାଏ। ଏହା ଦ୍ୱାରା ପିଲାଙ୍କ ମନ ଶାନ୍ତି ରହିଥାଏ। ସେହିପରି ଜାତୀୟ ସଙ୍ଗୀତ ଗାନ କରିବା ସହ ପ୍ରତିଦିନ ଘଟୁଥିବା ଘଟଣା ସମ୍ପର୍କରେ ସେମାନଙ୍କୁ ଉପସ୍ଥିତ ଶିକ୍ଷୟିତ୍ରୀ ଶିକ୍ଷକ ଖବରକାଗଜ ପଢ଼ାଇ ଶୁଣାଇଥାନ୍ତି ା ଏଥିସହ ବିଦ୍ୟାଳୟକୁ ଆସୁଥିବା ଛାତ୍ରୀଛାତ୍ରଙ୍କ ୟୁନିଫର୍ମ ଯାଞ୍ଚ ମଧ୍ୟ କରାଯାଇଥାଏ। ସେହିପରି ସାଧାରଣ ଜ୍ଞାନ ପଠନ ସହ ବିଭିନ୍ନ ସ୍ବତନ୍ତ୍ର କାର୍ଯ୍ୟକ୍ରମ ସମ୍ପର୍କରେ ଛାତ୍ରୀଛାତ୍ରଙ୍କ ସମ୍ମୁଖରେ ପ୍ରାର୍ଥନା କ୍ଲାସରେ ଜଣାଯାଇଥାଏ। କିନ୍ତୁ ୨୦୨୦ କରୋନା ସଂକ୍ରମଣ ଲାଗି ବିଦ୍ୟାଳୟ ବନ୍ଦ ପୂର୍ବରୁ ପ୍ରାର୍ଥନା ଉପରେ କଟକଣା ଲଗାଯାଇଥିଲା। ପରେ ବିଦ୍ୟାଳୟ ବନ୍ଦ କରାଯାଇଥିଲା। ୨୦୨୧ ଅକ୍ଟୋବରରୁ ଧୀରେ ଧୀରେ ବିଦ୍ୟାଳୟ ଖୋଲାଯାଇଥିଲା। ଫେବୃୟାରୀ ୨୮ରେ ପ୍ରଥମରୁ ପଞ୍ଚମ ଯାଏ ବିଦ୍ୟାଳୟ ଖୋଲାଯାଇଥିଲେ ମଧ୍ୟ ନିୟମିତ ପ୍ରାର୍ଥନା କରିବା ପାଇଁ କୌଣସି ଚିଠି ଆସିନାହିଁ। ଫଳରେ ବ୍ଲକର ୨୫ ପଞ୍ଚାୟତ ଅଞ୍ଚଳରେ ରହିଥିବା ଶତାଧିକ ବିଦ୍ୟାଳୟର ହଜାର ହଜାର ଛାତ୍ରୀଛାତ୍ର ଏହି ପ୍ରାର୍ଥନାରୁ ବଞ୍ଚିତ ହୋଇଛନ୍ତି। ସରକାରଙ୍କ କୋଭିଡ ଗାଇଡ ଲାଇନକୁ ପାଳନ କରି ଏହି ପ୍ରାର୍ଥନା କରାଯାଉ ନ ଥିବା ବିଭିନ୍ନ ବିଦ୍ୟାଳୟର ପ୍ରଧାନ ଶିକ୍ଷକମାନେ କହିଛନ୍ତି। କେବଳ ଏପ୍ରିଲରୁ ମଧ୍ୟାହ୍ନ ଭୋଜନ ପାଇଁ ଚିଠି ହୋଇଛି, ପ୍ରାର୍ଥନା ପାଇଁ ହୋଇ ନ ଥିବା ସ୍ଥାନୀୟ ବିଇଓ ରସାନନ୍ଦ କର କହିଛନ୍ତି ା ଜିଲା ପ୍ରଶାସନର ଅନୁମତି ମିଳିଲେ ପ୍ରାର୍ଥନା କରାଯିବ ବୋଲି କୁହାଯାଇଛି। ଛାତ୍ରୀଛାତ୍ରଙ୍କୁ ଏହି ଅନୁମତି ଦିଆଯିବା ସହ ବିଦ୍ୟାଳୟଗୁଡ଼ିକରେ ପୁଣି ବିଜ୍ଞାନ ମେଳା ସହ ବାର୍ଷିକ ଉତ୍ସବ, ଖେଳକୁଦ ପ୍ରତିଯୋଗିତା ଆଦି ପାଇଁ ଅନୁମତି ପ୍ରଦାନ କରିବାକୁ ଅଭିଭାବକ ମହଲରେ ଦାବି ହେଉଛି ା
