ନୂଆଦିଲ୍ଲୀ,୧୦।୧: କର୍ନାଟକ ବିଧାନସଭା ନିର୍ବାଚନ ପୂର୍ବରୁ ରାଜ୍ୟରେ ରାଜନୈତିକ ଟଣାଓଟରା ଆରମ୍ଭ ହୋଇଯାଇଛି। ଶାସକ ଭାଜପା ପ୍ରକାଶ କରିବାକୁ ଯାଉଥିବା ଏକ ପୁସ୍ତକର କଭରରେ କଂଗ୍ରେସ ନେତା ସିଦ୍ଧରମୈୟା ଟିପୁ ସୁଲ୍ତାନ ପୋଷାକ ପିନ୍ଧି ହାତରେ ଖଣ୍ଡା ଧରିଥିବା ପୋଷ୍ଟର ବିଭିନ୍ନ ସ୍ଥାନରେ ଲଗାଯାଇଥିଲା। ଏହାକୁ ନେଇ ବିବାଦ ଦେଖାଦେବା ସହ କଂଗ୍ରେସ ନେତା ଅଦାଲତଙ୍କ ଦ୍ୱାରସ୍ଥ ହୋଇଥିଲେ। ନିର୍ବାଚନ ପୂର୍ବରୁ ତାଙ୍କ ବଦ୍ନାମ କରିବା ପାଇଁ ଏଭଳି ପୁସ୍ତକ ଶାସକ ଦଳ ଛାପୁଥିବା ସିଦ୍ଦରମୈୟା ଅଭିଯୋଗ କରିଥିଲେ। ମାନହାନିକାରୀ ଉକ୍ତ ପୁସ୍ତକର ପ୍ରକାଶନ ଉପରେ ବେଙ୍ଗାଲୁରୁର ଏକ ଅଦାଲତ ସୋମବାର ସ୍ଥଗିତାଦେଶ ଜାରି କରିଛନ୍ତି।
ଅଷ୍ଟାଦଶ ଶତାବ୍ଦୀର ମହୀଶୂର ଶାସକ ଟିପୁ ସୁଲ୍ତାନଙ୍କୁ ସିଦ୍ଦରମୈୟା କିଛିଦିନ ପୂର୍ବରୁ ପ୍ରଶଂସା କରିଥିଲେ। ଭାଜପା ସିଦ୍ଦରମୈୟାଙ୍କୁ ଉକ୍ତ ପୁସ୍ତକରେ ସିଦ୍ଦରମୁଲ୍ଲା ଖାନ୍ ବୋଲି ଲେଖିଛି। ପୁସ୍ତକର ନାମ ରଖାଯାଇଛି ସିଦ୍ଦୁ ନିଜାକାନାସୁଗାଲୁ (ସିଦ୍ଦୁଙ୍କ ପ୍ରକୃତ ସ୍ବପ୍ନ)। ଏଥିରେ ବରିଷ୍ଠ କଂଗ୍ରେସ ନେତା ତଥା କର୍ନାଟକର ପୂର୍ବତନ ମୁଖ୍ୟମନ୍ତ୍ରୀ ସିଦ୍ଦରମୈୟାଙ୍କୁ ଅପମାନିତ କରାଯାଇଥିଲା। ଏହା ବିରୋଧରେ ସିଦ୍ଦରମୈୟାଙ୍କ ପୁଅ କଂଗ୍ରେସ ବିଧାୟକ ୟଥିନ୍ଦ୍ର ସିଦ୍ଦରମୈୟା କୋର୍ଟଙ୍କ ଦ୍ୱାରସ୍ଥ ହୋଇଥିଲେ। ସୋମବାର ପୁସ୍ତକ ପ୍ରକାଶ ପାଇବାକୁ ଥିବାବେଳେ ବେଙ୍ଗାଲୁରୁର ସେସନ୍ସ କୋର୍ଟ ଏହା ଉପରେ ରୋକ୍ ଲଗାଇଛନ୍ତି। ପରବର୍ତ୍ତୀ ଶୁଣାଣି ପର୍ଯ୍ୟନ୍ତ ଉକ୍ତ ପୁସ୍ତକର ପ୍ରକାଶନ, ଉନ୍ମୋଚନ, ବିକ୍ରି କିମ୍ବା ପ୍ରଦର୍ଶନ କରାଯାଇପାରିବ ନାହଁ ବୋଲି କୋର୍ଟ ରାଜ୍ୟର ଉଚ୍ଚଶିକ୍ଷା ମନ୍ତ୍ରୀ ସି.ଏନ୍. ଅଶ୍ୱଥ ନାରାୟଣ ଓ ଅନ୍ୟମାନଙ୍କୁ କହିଛନ୍ତି। ମନ୍ତ୍ରୀ ଅଶ୍ୱଥ ଉକ୍ତ ପୁସ୍ତକ ଉନ୍ମୋଚନ କରିବା କାର୍ଯ୍ୟକ୍ରମ ଥିଲା।
