ସୋରଡା,୧୦।୧: ଗଞ୍ଜାମ ଜିଲା ସୋରଡା ବ୍ଲକ ଆସିକା ଜାତୀୟ ରାଜପଥ ୫୯ ରାସ୍ତା ପାର୍ଶ୍ୱ ସୁରମଣି ଗ୍ରାମରେ ସୋମବାର ବିଳମ୍ବିତ ରାତିରେ ବଡ଼ ଧରଣର ଅଗ୍ନିକାଣ୍ଡ ଘଟିଛି। ଅଗ୍ନିକାଣ୍ଡରେ ଗ୍ରାମର ୧୪ ପରିବାରର ୪୨ ବଖରା ଘର ସମ୍ପୂର୍ଣ୍ଣ ପୋଡ଼ି ପାଉଁଶ ହୋଇଯାଇଛି। ଅନ୍ୟପକ୍ଷେ ରାସ୍ତାରେ ଦାରିଙ୍ଗବାଡି ଯାଉଥିବା ପର୍ଯ୍ୟଟକମାନେ ପାଟିକରି ଲୋକଙ୍କ ଘର କବାଟ ବାଡେଇ ଉଠାଇଥିଲେ। ଫଳରେ ଲୋକେ ବାହାରକୁ ଚାଲିଆସିଥିଲେ। ବର୍ତ୍ତମାନ ସୁଦ୍ଧା କେହି ମୃତାହତ ହୋଇ ନ ଥିବା ଜଣାପଡିଛି।
ଖବର ପାଇ ଆଇଆଇସି ରମେଶ କୁମାର ପ୍ରଧାନଙ୍କ ସମେତ ଦମକଳବାହିନୀ ଘଟଣାସ୍ଥଳରେ ପହଞ୍ଚି ନିଆଁ ଲିଭା ଆରମ୍ଭ କରିଥିଲେ । ନିଆଁ ଏତେ ମାତ୍ରାରେ ବ୍ୟାପି ଯାଇଥିଲା ଯେ, ରାତି ୧୨ଟାରୁ ମଙ୍ଗଳବାର ସକାଳ ୯ ଘଣ୍ଟା ପର୍ଯ୍ୟନ୍ତ ଦମକଳ ବାହିନୀ ନିଆଁ ଲିଭାରେ ଲାଗିଛନ୍ତି । ତହସିଲଦାର ପ୍ରଫୁଲ୍ଲ ଚନ୍ଦ୍ର ଡାକୁଆ ରାଜସ୍ବ ନିରୀକ୍ଷକଙ୍କ ସହ ପହଞ୍ଚି କ୍ଷୟକ୍ଷତି ଆକଳନ ଆରମ୍ଭ କରିଛନ୍ତି । ବିଧାୟକ ପୂର୍ଣ୍ଣଚନ୍ଦ୍ର ସାଇଁ ପହଞ୍ଚି ଲୋକଙ୍କୁ ଆଶ୍ୱାସନା ଦେବା ସହ ସମସ୍ତ ସୁବିଧା ଯୋଗାଇବାକୁ ପ୍ରତିଶ୍ରୁତି ଦେଇଛନ୍ତି।
ଅନ୍ୟପକ୍ଷେ ଅଗ୍ନିକାଣ୍ଡରେ ଲୋକଙ୍କ ଗଚ୍ଛିତ ଧାନ ଚାଉଳ, ଲୁଗାପଟା, ଆସବାବପତ୍ର ପୋଡିଯାଇଥିବା ବେଳେ ଅତ୍ୟନ୍ତ ଦୟନୀୟ ପରିବେଶ ସୃଷ୍ଟି ହୋଇଛି। ପୀଡିତମାନେ ହେଲେ ଦମୟନ୍ତୀ, ଦୟାନିଧି, ପରୀ, ଚିନ୍ତାମଣି, ବସୁଦେବ, ଗନ୍ତେଇ, ଧୋବା, କାଳିଆ, ସୁରେନ୍ଦ୍ର, କନ୍ଧ, ସଞ୍ଜୟ, ଭାଗ୍ୟ, ରଚନା, ପ୍ରତିମା। ସମସ୍ତ ପରିବାର ଗରିବ ଶ୍ରେଣୀର ହୋଇଥିବା ବେଳେ ତୁରନ୍ତ ଆର୍ଥିକ ସହାୟତା, ପାଲ, ଶୁଖିଲା ଖାଦ୍ୟ, ରନ୍ଧା ଖାଦ୍ୟ ସହ ଯଥାଶୀଘ୍ର ଗୃହ ଯୋଗାଇବାକୁ ଜିଲା ପ୍ରଶାସନକୁ ଅନୁରୋଧ କରାଯାଇଛି।
