ନୂଆଦିଲ୍ଲୀ,୩୦।୧୧(ପି.ଟି.): ଜାମିନ ସତ୍ତ୍ୱେ ମାମୁଲି ଅପରାଧରେ ଜେଲରେ ଥିବା ଗରିବ ଆଦିବାସୀ ମୁକୁଳି ପାରୁନାହାନ୍ତି। ଏନେଇ ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଆବେଗଭରା ଉଦ୍ବୋଧନ ପରେ ସୁପ୍ରିମକୋର୍ଟ ମଙ୍ଗଳବାର ସାରା ଦେଶରେ ଥିତ୍ବା ଜେଲ କର୍ତ୍ତୃପକ୍ଷଙ୍କୁ ଏଭଳି ବନ୍ଦୀଙ୍କ ସବିଶେଷ ରିପୋର୍ଟ ମାଗିଛନ୍ତି। ସେମାନଙ୍କ ମୁକ୍ତି ଲାଗି ଏକ ଜାତୀୟ ଯୋଜନା ପ୍ରସ୍ତୁତି ନିମନ୍ତେ ଉକ୍ତ ବନ୍ଦୀମାନଙ୍କ ରିପୋର୍ଟ ୧୫ ଦିନ ମଧ୍ୟରେ ଜାତୀୟ ନ୍ୟାୟିକ ସେବା କର୍ତ୍ତୃପକ୍ଷ (ଏନ୍ଏଏଲ୍ଏସ୍ଏ)ରେ ଦାଖଲ କରିବାକୁ କୁହାଯାଇଛି। ସୁପ୍ରିମକୋର୍ଟରେ ଗତ ୨୬ ତାରିଖ ସମ୍ବିଧାନ ଦିବସ ପାଳନ ଅବସରରେ ରାଷ୍ଟ୍ରପତି ନିଜ ରାଜ୍ୟ ଓଡ଼ିଶା ସମେତ ଝାଡ଼ଖଣ୍ଡର ଗରିବ ଆଦିବାସୀମାନଙ୍କ ଅସୁବିଧା ସମ୍ପର୍କରେ ଅବତାରଣା କରିଥିଲେ। ଜାମିନ ପାଇବା ସତ୍ତ୍ୱେ ଜମାନତ ଅର୍ଥ ଜମା କରି ନ ପାରି ସେମାନେ ଜେଲରେ ରହିବାକୁ ବାଧ୍ୟ ହେଉଛନ୍ତି। ନ୍ୟାୟପାଳିକା ସେମାନଙ୍କ ପାଇଁ କିଛି କରିବା ନିମନ୍ତେ ରାଷ୍ଟ୍ରପତି ଅନୁରୋଧ କରିଥିଲେ। ବଡ଼ ଅପରାଧରେ ସମ୍ପୃକ୍ତ ବ୍ୟକ୍ତି ଅନାୟାସରେ ଖସିଯାଉଥିବାବେଳେ କାହାକୁ ଚାପୁଡ଼ାଟିଏ ମାରି ଗରିବ ଲୋକ ବର୍ଷ ବର୍ଷ ଧରି ସଜା କାଟୁଛନ୍ତି। ରାଷ୍ଟ୍ରପତି ଭାଷଣ ଦେଉଥିବାବେଳେ ମଞ୍ଚରେ ପ୍ରଧାନ ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼ ଏବଂ ଜଷ୍ଟିସ୍ ଏସ୍.କେ. କୌଲ ଉପସ୍ଥିତ ଥିଲେ। ଏଭଳି ବନ୍ଦୀଙ୍କ ସବିଶେଷ ବିବରଣୀ ଦାଖଲ କରିବା ଲାଗି ମଙ୍ଗଳବାର ଜଷ୍ଟିସ୍ କୌଲଙ୍କ ଖଣ୍ଡପୀଠ ଜେଲ୍ କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦେଇଛନ୍ତି।
