ମେଲବୋର୍ନ, ୨୪ା୧୧:ଅଷ୍ଟ୍ରେଲିଆର ବ୍ୟାଟିଂ କିମ୍ବଦନ୍ତୀ ରିକି ପଣ୍ଟିଂ ତାଙ୍କ ଦେଶର ଅଲରାଉଣ୍ଡର ମାର୍କସ ଷ୍ଟୋଇନିସ୍ଙ୍କ ଉଚ୍ଚ ପ୍ରଶଂସା କରିଛନ୍ତି। ଷ୍ଟୋଇନିସ ବର୍ଷକ ପୂର୍ବେ ଯେପରି ଖେଳୁଥିଲେ ଏବେ ସେ ତା’ଠାରୁ ୫ ଗୁଣା ଉନ୍ନତ ପ୍ରଦର୍ଶନ କରୁଛନ୍ତି। ଫିନିଶର ଦାୟିତ୍ୱ ତୁଲାଇବା ସହ ଅଷ୍ଟ୍ରେଲିଆ କ୍ରିକେଟ ପାଇଁ ସେ ବହୁବିଧ ଭୂମିକା ଗ୍ରହଣ କରିପାରିବେ। ନିକଟରେ ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ଅନୁଷ୍ଠିତ ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଦିଲ୍ଲୀ କ୍ୟାପିଟାଲ୍ସକୁ ଫାଇନାଲରେ ପ୍ରବେଶ କରାଇବାରେ ଷ୍ଟାଇନିସ୍ ପ୍ରମୁଖ ଭୂମିକା ଗ୍ରହଣ କରିଥିଲେ। ସେ ୩୫୨ ରନ କରିବା ସହ ୧୩ ଉଇକେଟ ଅକ୍ତିଆର କରିଥିଲେ। ପଣ୍ଟିଂ ଏହି ଦଳର କୋଚ୍ ରହିଥିଲେ। ଶୁକ୍ରବାରଠାରୁ ଆରମ୍ଭ ହେବାକୁଥିବା ଭାରତ ବିପକ୍ଷ ସିରିଜ ପାଇଁ ଷ୍ଟୋଇନିସ୍ଙ୍କୁ ଅଷ୍ଟ୍ରେଲିଆର ଟି୨୦ ଏବଂ ଦିନିକିଆ ଦଳରେ ନିଆଯାଇଛି। ଗତବର୍ଷ ୫୦ ଓଭର ବିଶିଷ୍ଟ ବିଶ୍ୱକପ୍ରେ ନୈରାଶ୍ୟଜନକ ପ୍ରଦର୍ଶନ ପାଇଁ ୩୧ ବର୍ଷୀୟ ଷ୍ଟୋଇନିସ୍ ଅଷ୍ଟ୍ରେଲିଆ ଟି୨୦ ଦଳରୁ ବାଦ୍ ପଡ଼ିଥିଲେ। ମାତ୍ର ବିଗ୍ ବାଶ ଲିଗ୍ରେ ମେଲବୋର୍ନ ଷ୍ଟାର୍ସ ତରଫରୁ ଜବରଦସ୍ତ ପ୍ରଦର୍ଶନ ପାଇଁ ସେ ସଫଳ ପ୍ରତ୍ୟାବର୍ତ୍ତନ କରିପାରିଥିଲେ। ବିଗ୍ ବାଶ୍ର ଗୋଟିଏ ସିଜନରେ ସେ ୭୦୫ ରନ ସ୍କୋର କରିଥିଲେ। ଅପରାଜିତ ୧୪୭ ରନ ସହ ସେ ଟୁର୍ନାମେଣ୍ଟରେ ବ୍ୟକ୍ତିଗତ ସର୍ବୋଚ୍ଚ ସ୍କୋର କରିବାରେ ସମର୍ଥ ହୋଇଥିଲେ। ଷ୍ଟୋଇନିସ ଜଣେ ଫିନିଶର ବୋଲି ପ୍ରମାଣ କରି ଦେଖାଇ ସାରିଛନ୍ତି। ତାଙ୍କ ନିକଟରେ ଇନିଂସ ଓପନ କରିବାର ଦକ୍ଷତା ରହିଥିବା ପଣ୍ଟିଂ କହିଛନ୍ତି। ଆସନ୍ତା ବର୍ଷ ଦିଲ୍ଲୀ ଅବା ଅନ୍ୟ ଯେ କୌଣସି ଦଳ ତରଫରୁ ଖେଳିବା ବେଳେ ଷ୍ଟୋଇନିସ୍ଙ୍କୁ ଟପ୍ ଅର୍ଡରରେ ଦେଖିବାକୁ ମିଳିବ।
