ଗୁଆହାଟୀ,୧୩।୭: ଦେଶସାରା ୟୁନିଫର୍ମ ସିଭିଲ କୋର୍ଡ (ୟୁସିସି)କୁ ନେଇ ହେଉଥିବା ଚର୍ଚ୍ଚାକୁ ନେଇ ଲକ୍ଷ ଲକ୍ଷ ଲୋକ ସେମାନଙ୍କ ମତାମତ ଦେଉଛନ୍ତି। ସେପଟେ ବର୍ତ୍ତମାନ ଆସାମ ମୁଖ୍ୟମନ୍ତ୍ରୀ ହିମନ୍ତ ବିଶ୍ୱ ଶର୍ମା ମଧ୍ୟ ୟୁସିସି ସମ୍ପର୍କରେ ଏକ ବିବୃତ୍ତି ଦେଇଛନ୍ତି। ଯେଉଁଥିରେ ସେ କହିଛନ୍ତି ଯେ ସେ ପୂର୍ବରୁ ୟୁସିସିର ସମର୍ଥନରେ ଅଛନ୍ତି। ଏହା ବ୍ୟତୀତ ଆସାମ ମୁଖ୍ୟମନ୍ତ୍ରୀ କହିଛନ୍ତି, ସେ ତୁରନ୍ତ ପ୍ରଭାବରେ ରାଜ୍ୟରେ ବହୁବିବାହ ୟଉପରେ ପ୍ରତିବନ୍ଧକ ଲଗାଇବାକୁ ଚାହୁଁଛନ୍ତି।
ଗୁଆହାଟୀରେ ଗଣମାଧ୍ୟମ ସହ କଥାବାର୍ତ୍ତା କରୁଥିବାବେଳେ ହିମନ୍ତ ବିଶ୍ୱ ଶର୍ମା ୟୁସିସି ବିଷୟରେ ଉଲ୍ଲେଖ କରିଛନ୍ତି। ଯେଉଁଥିରେ ସେ କହିଛନ୍ତି, ସଂସଦ ୟୁସିସିର ନିଷ୍ପତ୍ତି ନେବ। ରାଜ୍ୟମାନେ ମଧ୍ୟ ଏଥିରେ ସହଯୋଗ କରିବେ। ୟୁସିସିରେ ଅନେକ ପ୍ରସଙ୍ଗ ରହିଛି, ଆଇନ ଆୟୋଗ ଏବଂ ସଂସଦୀୟ କମିଟି ଏହାର ସମୀକ୍ଷା କରୁଛନ୍ତି। ଆମେ ଏହା କହିସାରିଛୁ ଯେ, ଆମେ ୟୁସିସି ସମର୍ଥନରେ ଅଛୁ। ତୁରନ୍ତ ଆସାମରେ ବହୁବିବାହକୁ ବ୍ୟାନ କରିବାକୁ
ଚାହୁଁଛି।
କଂଗ୍ରେସକୁ ଟାର୍ଗେଟ କରି ବିଶ୍ୱଶର୍ମା କହିଛନ୍ତି, କୌଣସି କଂଗ୍ରେସ ନେତା ତାଙ୍କ ଝିଅକୁ କ’ଣ ସେହି ପୁରୁଷକୁ ଦେବେ ଯାହାର ପୂର୍ବରୁ ଦୁଇ ପତ୍ନୀ ଅଛନ୍ତି? ସେମାନେ (କଂଗ୍ରେସ) ମୁସଲମାନ ମହିଳାଙ୍କ ଦୁଃଖ ବୁଝୁନାହାଁନ୍ତି, ସେମାନେ କେବଳ ମୁସଲମାନ ପୁରୁଷଙ୍କ ପାଇଁ କାମ କରନ୍ତି। ଆସନ୍ତା ବିଧାନସଭା ଅଧିବେଶନରେ ବହୁବିବାହକୁ ନିଷିଦ୍ଧ କରିବା ପାଇଁ ଏକ ବିଲ ଆଗତ କରାଯିବ ବୋଲି ସେ କହିଛନ୍ତି। ଯଦି କୌଣସି କାରଣରୁ ଏହି ଅଧିବେଶନରେ ବିଲ୍ ନ ଅଣାଯିବ, ତେବେ ଏହାକୁ ଜାନୁୟାରୀରେ ବିଧାନସଭା ଅଧିବେଶନରେ ଅଣାଯିବ।
