ନୂଆଦିଲ୍ଲୀ,୨୭।୧୦ : ଦିଲ୍ଲୀରେ ଆବର୍ଜନାକୁ ନେଇ ରାଜନୀତି ଆରମ୍ଭ ହୋଇଛି। ଏନେଇ ଏଏପି-ଭାଜପା କର୍ମୀ ମୁହାଁମୁହିଁ ହୋଇଛନ୍ତି। ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଗୁରୁବାର ପୂର୍ବ ଦିଲ୍ଲୀର ଗାଜିପୁର ଲ୍ୟାଣ୍ଡଫିଲ ପରିଦର୍ଶନ କରିବାକୁ ଯାଉଥିବାବେଳେ ଏ ସମ୍ପର୍କରେ ସୂଚନା ପାଇ ଭାଜପା କର୍ମୀମାନେ କଳା ପତାକା ପ୍ରଦର୍ଶନ କରିବା ସହିତ ସ୍ଲୋଗାନ ଦେଇ ବିରୋଧ ଆରମ୍ଭ କରିଛନ୍ତି।
ଏଏପି କର୍ମୀମାନେ ମଧ୍ୟ ଗାଜିପୁର ଲ୍ୟାଣ୍ଡଫିଲରେ ପହଞ୍ଚି ଭାଜପା ବିରୋଧରେ ସ୍ଲୋଗାନ ଦେବା ଆରମ୍ଭ କରିଥିଲେ। ଏକ ଦଶନ୍ଧି ଧରି ଦିଲ୍ଲୀ ମ୍ୟୁନିସିପାଲ କର୍ପୋରେଶନକୁ ଭାଜପା ଦଖଲ କରି ରଖିଛି ବୋଲି ଏଏପି କର୍ମୀମାନେ ଅଭିଯୋଗ କରିଛନ୍ତି। ଏହା ପରେ ମଧ୍ୟ ଲ୍ୟାଣ୍ଡଫିଲ ସମସ୍ୟାର ସମାଧାନ ହୋଇପାରି ନାହିଁ। ଚଳିତ ବର୍ଷ ଶେଷ କିମ୍ବା ୨୦୨୩ ପ୍ରାରମ୍ଭରେ ଏମସିଡି ନିର୍ବାଚନ ହେବାର ସମ୍ଭାବନା ଅଛି । ଏହି ନିର୍ବାଚନ ପାଇଁ ସ୍ବଚ୍ଛତା ମୁଖ୍ୟ ପ୍ରସଙ୍ଗ ରହିଛି। ଏହାକୁ ଦୃଷ୍ଟିରେ ରଖି ଅରବିନ୍ଦ କେଜ୍ରିୱାଲଙ୍କ ଗାଜିପୁର ଲ୍ୟାଣ୍ଡଫିଲ ପରିଦର୍ଶନକୁ ଗୁରୁତ୍ୱପୂର୍ଣ୍ଣ ବୋଲି ରାଜନୈତିକସ୍ତରରେ ଚର୍ଚ୍ଚା ହେଉଥିଲା। ଅପରପକ୍ଷରେ ଭାଜପା କର୍ମୀମାନେ ଯୁକ୍ତି କରୁଛନ୍ତି ଯେ ଆମ ଆଦମୀ ପାର୍ଟି ମିଛ କହୁଛି।
ସୂଚନାଯୋଗ୍ୟ, ତାଜମହଲଠାରୁ ଉଚ୍ଚ ଏବଂ କୁତୁବ ମିନାରଠାରୁ ଆଠ ମିଟର ଛୋଟ ଗାଜିପୁର ଲ୍ୟାଣ୍ଡଫିଲ ସାଇଟରେ ଅବସ୍ଥିତ ଆବର୍ଜନା ପାହାଡରେ ପ୍ରତିଦିନ ଶହ ଶହ ଟ୍ରକ ଆବର୍ଜନା ପକାଯାଉଛି। ଏଥିରେ ୩୫ ବର୍ଷ ମଧ୍ୟରେ ୭୦ ଏକର ଜମିରେ ୨୭୦ ଫୁଟ ଉଚ୍ଚ ଅଳିଆ ପାହାଡ଼ ଜମା ହୋଇଛି। ଅଳିଆ ଆବର୍ଜନା ଯୋଗୁ ଏହାର ଆଖପାଖର ଲୋକମାନେ ମଇଳା ଏବଂ ଦୁର୍ଗନ୍ଧ ପାଇଁ ଅସୁବିଧାରେ ପଡୁଛନ୍ତି।
