ଇମ୍ଫାଲ,୨୮ା୯: ଜାତିଆଣ ହିଂସା ପ୍ରଭାବିତ ମଣିପୁରରେ ମେଇତି ସମ୍ପ୍ରଦାୟର ନିଖୋଜ ଛାତ୍ରୀ ଲୁଓ୍ବାଙ୍ଗ୍ବି ହିଜାମ୍ ଏବଂ ଛାତ୍ର ଫିଜାମ୍ ହେମନ୍ଜିତଙ୍କୁ ଅପହରଣ ଓ ହତ୍ୟା କରାଯାଇଥିବା ଜଣାପଡ଼ିବା ପରେ ଉତ୍ତେଜନା ପ୍ରକାଶ ପାଇ ସ୍ଥିତି ଅଣାୟତ୍ତ ହୋଇଛି। ଇମ୍ଫାଲରେ ପୋଲିସ ନିଷ୍କ୍ରିୟତା ପ୍ରତିବାଦରେ ଛାତ୍ରୀଛାତ୍ରମାନେ ରାସ୍ତାକୁ ଓହ୍ଲାଇ ବିକ୍ଷୋଭ ପ୍ରଦର୍ଶନ କରିଛନ୍ତି। ପୋଲିସ ସେମାନଙ୍କୁ ଘଉଡ଼ାଇବାକୁ ଯାଇ ଲୁହବୁହା ବାଷ୍ପ ପ୍ରୟୋଗ ସହ ଲାଠିମାଡ଼ କରିଛି। ପୋଲିସ ଓ ବିକ୍ଷୋଭକାରୀଙ୍କ ମଧ୍ୟରେ ସଂଘର୍ଷ ଘଟି ଉଭୟ ପକ୍ଷର ଅନେକେ ଆହତ ହୋଇଛନ୍ତି। ସଂଘର୍ଷ ପରେ ତତ୍କାଳ ରାଜଧାନୀରେ କର୍ଫ୍ୟୁ ଜାରି କରାଯାଇଛି।
ଜୁଲାଇ ୬ରେ ମେଇତି ସମ୍ପ୍ରଦାୟର ଲୁଓ୍ବାଙ୍ଗ୍ବି ହିଜାମ୍ ଏବଂ ଫିଜାମ୍ ହେମନ୍ଜିତ ନିଖୋଜ ହୋଇଯାଇଥିଲେ। ଜଙ୍ଗଲରେ ଥିବା ଏକ ସଶସ୍ତ୍ର ଗୋଷ୍ଠୀର ଶିବିରରେ ଉଭୟେ ବସିଥିବାବେଳେ ୨ ଜଣ ବନ୍ଧୁକଧାରୀ ସେମାନଙ୍କ ପଛରେ ଛିଡ଼ା ହୋଇଥିଲେ। ଏହି ଫଟୋ ସୋମବାର ସାମ୍ନାକୁ ଆସିଥିଲା। ଏହା ପରେ ଲୁଓ୍ବାଙ୍ଗ୍ବି ଏବଂ ଫିଜାମ୍ଙ୍କ ମୃତଦେହ ତଳେ ପଡ଼ିଥିବାର ଫଟୋ ସାମାଜିକ ଗଣମାଧ୍ୟମରେ ବହୁଳ ପ୍ରସାରିତ ହୋଇଥିଲା। କୁକି ଉଗ୍ରପନ୍ଥୀମାନେ ଦୁହିଁଙ୍କୁ ଅପହରଣ ପରେ ହତ୍ୟା କରିଥିବା ରାଜ୍ୟ ସରକାର ସୂଚନା ଦେଇଥିଲେ। ବିକ୍ଷୋଭକାରୀମାନେ ବୁଧବାର ମୁଖ୍ୟମନ୍ତ୍ରୀ ଏନ୍. ବୀରେନ୍ ସିଂଙ୍କ ବାସଭବନ ଆଡ଼କୁ ଶୋଭାଯାତ୍ରାରେ ଯାଉଥିବାବେଳେ ପୋଲିସ କାଙ୍ଗ୍ଲା ଗେଟ୍ ନିକଟରେ ଅଟକାଇଥିଲା। ଫଳରେ ପୋଲିସ ଓ ବିକ୍ଷୋଭକାରୀଙ୍କ ମଧ୍ୟରେ ସଂଘର୍ଷ ଘଟିଥିଲା। ଅନେକ ବିକ୍ଷୋଭକାରୀ ଆହତ ହୋଇଥିବାବେଳେ ସେମାନଙ୍କ ମଧ୍ୟରୁ କେତେଜଣ ଗୁରୁତର ଥିବା ଜଣାପଡ଼ିଛି।
୬ ମାସ ବଢ଼ିଲା ଏଏଫ୍ଏସ୍ଏ
ମଣିପୁରକୁ ପୁଣି ଉତ୍ତେଜନା ଫେରିଥିବାରୁ ଉଗ୍ରପନ୍ଥୀ ଓ କଠୋରପନ୍ଥୀ ଗୋଷ୍ଠୀଙ୍କ କାର୍ଯ୍ୟକାଳପକୁ ଦୃଷ୍ଟିରେ ରଖି ସରକାର ରାଜ୍ୟକୁ ଅସ୍ଥିର ଅଞ୍ଚଳ ଘୋଷଣା କରିଛନ୍ତି। ରାଜ୍ୟପାଳ ରାଜ୍ୟରେ ସଶସ୍ତ୍ର ବଳ (ସ୍ବତନ୍ତ୍ର କ୍ଷମତା) ଆଇନ (ଏଏଫ୍ଏସ୍ଏ)କୁ ଆଉ ୬ ମାସ ପାଇଁ ବୃଦ୍ଧି କରିଛନ୍ତି। ଏହି ବିବାଦୀୟ ଆଇନ ଅକ୍ଟୋବର ୧ରୁ ଲାଗୁ ହେବ। ତେବେ ଇମ୍ଫାଲ ଉପତ୍ୟକା ଅଧୀନ ୧୯ ଥାନା ଅଞ୍ଚଳରେ ଏହା ଲାଗୁହେବ ନାହିଁ ବୋଲି ଏକ ସରକାରୀ ବିଜ୍ଞପ୍ତିରେ କୁହାଯାଇଛି।
ଇମ୍ଫାଲରେ ସିବିଆଇ ଟିମ୍
ଇତିମଧ୍ୟରେ ଘଟଣାର ତଦନ୍ତ ପାଇଁ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ସ୍ବତନ୍ତ୍ର ନିର୍ଦ୍ଦେଶକ ଅଜୟ ଭଟ୍ଟନାଗରଙ୍କ ନେତୃତ୍ୱରେ ଏକ ଟିମ୍ ଇମ୍ଫାଲରେ ପହଞ୍ଚତ୍ ତନାଘନା ଆରମ୍ଭ କରିଛି। ମୁଖ୍ୟମନ୍ତ୍ରୀ କହିଛନ୍ତି, ରାଜ୍ୟ ଓ କେନ୍ଦ୍ର ସରକାର ଏହି ମାମଲାକୁ ନେଇ ସମ୍ବେଦନଶୀଳ ଅଛନ୍ତି। ସ୍ବରାଷ୍ଟ୍ରମନ୍ତ୍ରୀ ଅମିତ ଶାହା ତଦନ୍ତ ପାଇଁ ସିବିଆଇ ଟିମ୍ ପଠାଇଛନ୍ତି।
ଅଯୋଗ୍ୟ ମୁଖ୍ୟମନ୍ତ୍ରୀଙ୍କୁ ବହିଷ୍କାର କର
ଭାଜପା ଯୋଗୁ ୧୪୭ ଦିନ ହେଲା ମଣିପୁର ଯୁଦ୍ଧଭୂମିରେ ପରିଣତ ହୋଇଛି। ରାଜ୍ୟରେ ମହିଳା ବିରୋଧୀ ହିଂସା ବଢ଼ୁଥିବାବେଳେ ଶିଶୁମାନଙ୍କୁ ଅସ୍ତ୍ର ଭାବେ ବ୍ୟବହାର କରାଯାଉଛି। ସ୍ଥିତି ନିୟନ୍ତ୍ରଣ କରିବାରେ ମୁଖ୍ୟମନ୍ତ୍ରୀ ଏନ୍. ବୀରେନ୍ ସିଂ ସମ୍ପୂର୍ଣ୍ଣ ବିଫଳ ହୋଇଛନ୍ତି। ଭାଜପାର ଏହି ଅଯୋଗ୍ୟ ମୁଖ୍ୟମନ୍ତ୍ରୀଙ୍କୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ତୁରନ୍ତ ବହିଷ୍କାର କରନ୍ତୁ।
-ମଲ୍ଲିକାର୍ଜୁନ ଖାର୍ଗେ, କଂଗ୍ରେସ ଅଧ୍ୟକ୍ଷ
ଅପରାଧୀଙ୍କୁ ଛଡ଼ାଯିବ ନାହିଁ: ଭାଜପା
ମଣିପୁରରେ ୨ ଛାତ୍ରୀ ଓ ଛାତ୍ରଙ୍କୁ ଅପହରଣ ପରେ ହତ୍ୟା କରିଥିବା ଅପରାଧୀଙ୍କୁ ଛଡ଼ାଯିବ ନାହିଁ। ସ୍ବରାଷ୍ଟ୍ରମନ୍ତ୍ରୀ ସିବିଆଇ ଅଧିକାରୀମାନଙ୍କ ଏକ ଟିମ୍କୁ ତଦନ୍ତ ପାଇଁ ପଠାଇଛନ୍ତି। ପୀଡ଼ିତ ପରିବାରକୁ ଯଥାଶୀଘ୍ର ସମ୍ଭବ ନ୍ୟାୟ ପ୍ରଦାନ କରାଯିବ।
-ସମ୍ବିତ ପାତ୍ର, ଭାଜପା ମୁଖପାତ୍ର
