ନୟାଗଡ଼, ୨।୫(ଲୋକନାଥ ମିଶ୍ର): ନୟାଗଡ଼ ଚାଇଲ୍ଡ ହେଲ୍ପ ଲାଇନ ଦ୍ୱାରା ଇଟାମାଟି ଥାନା ଅଧୀନସ୍ଥ ଡେଂଗେରାଗୋଡି ଅଞ୍ଚଳରେ ଚତୁର୍ଥୀ ପୂର୍ବରୁ ଶାଶୁଘରୁ କନ୍ୟାକୁ ଉଠାଇ ନେଲା ପୋଲିସ । ନୟାଗଡ଼ ଚାଇଲ୍ଡ ହେଲ୍ପ ଲାଇନ ଓ ପୋଲିସର ଚଢ଼ାଉ ଦେଖି ବର ମାରିଲା ଛୁ। ପ୍ରାପ୍ତ ସୂଚନା ଅନୁସାରେ କନ୍ୟା ନାବାଳିକା ଥିବାରୁ ବାଲ୍ୟ ବିବାହ ଆଇନ ଅନୁସାରେ ବିବାହ ଅବୈଧ। ଟିମ ପକ୍ଷରୁ ପରିବାର ସଦସ୍ୟମାନଙ୍କୁ ସଚେତନ କରାଯାଇଥିଲା ଓ ନାବାଳିକାକୁ ପୁଅ ଘରୁ ଉଦ୍ଧାର କରାଯାଇଥିଲା । ତେବେ ବିବାହ ପୂର୍ବରୁ ଶେଷ ହୋଇଯାଇଥିଲା। ରବିବାର ଦିଲୀପ କୁମାର ପରିଡା (୨୭) ଙ୍କ ଘର ଲୋକ ଚତୁର୍ଥୀ କାର୍ଯ୍ୟ କରି ଭୋଜି ଭାତର ଆୟୋଜନ କରିଥାନ୍ତେ। ଶୁକ୍ରବାର ଚାଇଲ୍ଡ ହେଲ୍ପ ଲାଇନ ଟିମ ତୁରନ୍ତ ଘଟଣାସ୍ଥଳକୁ ପହଞ୍ଚି ପୋଲିସ ଓ ଶିଶୁ ସୁରକ୍ଷା ୟୁନିଟ ସହଯୋଗରେ ବିବାହକୁ ବନ୍ଦ କରି ଜିଲା ଶିଶୁ ମଙ୍ଗଳ ସମିତିରେ ହାଜର କରାଇଥିଲେ। ଶିଶୁମଙ୍ଗଳ କମିଟି ନିର୍ଦେଶ କର୍ମେ ନାବାଳିକାଙ୍କୁ ସଖୀ କେନ୍ଦ୍ରରେ ରଖାଯାଇଛି । ଚାଇଲ୍ଡ ହେଲ୍ପ ଲାଇନ ଟିମ ଅଳକା ପାହାଡା ସିଂ, ବିଭୁତି ଭୂଷଣ ସାହୁ ଓ ଜିଲ୍ଲା ଶିଶୁ ସୁରକ୍ଷା ୟୁନିଟ ମିଳିତ ଭାବେ ସହଯୋଗ କରିଥିଲେ।
