ନୂଆଦିଲ୍ଲୀ,୪।୪: ଭୁଟାନର ରାଜା ଜିଗମେ ଖେସର ନାମଗ୍ୟାଲ ଓ୍ବାଂଗଚୁକ ମଙ୍ଗଳବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସାକ୍ଷାତ୍ କରିଛନ୍ତି। ସେ ଭାରତର ରାଷ୍ଟ୍ରପତି ଦ୍ରୌପଦୀ ମୁର୍ମୁଙ୍କ ଆମନ୍ତ୍ରଣ ରକ୍ଷା କରି ୩ ଦିନିଆ ଭାରତ ଗସ୍ତରେ ଆସିଛନ୍ତି। ସୋମବାର ସେ ଭାରତରେ ପହଞ୍ଚିଥିଲେ। ବିମାନ ବନ୍ଦରରେ ବୈଦେଶିକ ମନ୍ତ୍ରୀ ଏସ ଜୟଶଙ୍କର ତାଙ୍କୁ ସ୍ବାଗତ କରିଥିଲେ। ଅନୁମାନ କରାଯାଉଛି କି ଭୁଟାନ ରାଜାଙ୍କ ଏହି ଭାରତ ଗସ୍ତ ଦୁଇ ଦେଶ ମଧ୍ୟରେ ଦ୍ୱିପାକ୍ଷିକ ସମ୍ପର୍କରେ ପ୍ରଗତିର ଆକଳନ କରିବାର ଏକ ଭଲ ସୁଯୋଗ। ଭୁଟାନ ରାଜାଙ୍କ ଏହି ଗସ୍ତକୁ ବେଶ ଗୁରୁତ୍ୱପୂର୍ଣ୍ଣ ବୋଲି କୁହାଯାଉଛି।
ବୈଦେଶିକ ସଚିବ ବିନୟ ମୋହନ କ୍ୱାତ୍ରା କହିଛନ୍ତି, ଭୁଟାନ ରାଜ ଜିଗ୍ମେ ଖେସର ନାମଗ୍ୟାଲ ଓ୍ବାଂଗଚୁକ ବିଶେଷ ଗସ୍ତରେ ଭାରତ ଆସିଛନ୍ତି। ତାଙ୍କର ଏହି ଯାତ୍ରା ଦୀର୍ଘନିନ ଧରି ପ୍ରଭାବିତ ଥିଲା। ଏହା ଭାରତ ଓ ଭୁଟାନ ମଧ୍ୟରେ ଦୀର୍ଘ ଦିନ ଧରି ଚାଲି ଆସିଥିବା ଦ୍ୱିପାକ୍ଷିକ ଆଦାନ ପ୍ରଦାନକୁ ଆଗକୁ ନେଇଯିବ।
ସେ କହିଛନ୍ତି, ଭୁଟାନ ରାଜାଙ୍କ ସହ ମଙ୍ଗଳବାର ମୋଦିଙ୍କ ବୈଠକ ସମୟରେ ପ୍ରଧାନମନ୍ତ୍ରୀ ଭୁଟାନର ସାମଜିକ-ଆର୍ଥିକ ସୁଧାର ପାଇଁ ଲଗାତାର ସମର୍ଥନ ଦେବାର କଥାକୁ ଦୋହରାଇଛନ୍ତି।
