ଚମୋଲି,୨୧ ।୧୦: ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ଉତ୍ତରାଖଣ୍ଡ ଗସ୍ତ କରିଛନ୍ତି । ସେଠାରେ ସେ ପ୍ରଥମେ କେଦାରନାଥରେ ପହଞ୍ଚିବା ପରେ ସେଠାରୁ ବଦ୍ରିନାଥ ଗସ୍ତ କରିଥିଲେ । ସୀମାନ୍ତ ଗାଁ ମାଣାରେ ମୋଦି କନେକ୍ଟିଭିଟି ପରିଯୋଜନାର ଶିଳାନ୍ୟାସ କରିବା ପରେ ଏକ ଜନସଭାକୁ ସମ୍ବୋଧିତ କରିଛନ୍ତି । ବଦ୍ରିନାଥରେ ସେ ରାତ୍ରୀ ଯାପନ କରିବେ । ପ୍ରଧାନମନ୍ତୀ ମାଣା ଗାଁରେ ସଡ଼କ ଓ ରୋପ ୱେ ପରିଯୋଜନାର ଶିଳାନ୍ୟାସ କରିଛନ୍ତି । ଏହାପରେ ସେ ଆଗମନ ପ୍ଲାଜା ଓ ହ୍ରଦ ବିକାଶ କାର୍ଯ୍ୟର ସମୀକ୍ଷା କରିଛନ୍ତି ।
ପ୍ରଧାନମନ୍ତ୍ରୀଙ୍କ ଜନସଭା ମାଣା ଗାଁରେ ଆର୍ମି କ୍ୟାମ୍ପସ ନିକଟରେ ଆୟୋଜନ କରାଯାଇଥିଲା । ଜନସଭାରେ ୧୫୦୦-୨୦୦୦ ଲୋକ ପହଞ୍ଚିଥିଲେ । ଦେଶର ଏହି ଶେଷ ଗାଁ ମାଣାରେ ଭୋଟିୟା ଜନଜାତିର ଗ୍ରାମୀଣ ଓ ସ୍ୱୟଂ ସହାୟକ ଗୋଷ୍ଠୀର ମହିଳାମାନେ ଓ ସ୍ଥାନୀୟ ନାଗରିକ ଯୋଗ ଦେଇଥିଲେ ।
ପ୍ରଧାନମନ୍ତ୍ରୀ ତାଙ୍କର ସମ୍ବୋଧନରେ ପ୍ରଥମେ ବଦ୍ରି ବିଶାଲ ଓ ବାବା କେଦାରନାଥଙ୍କ ଜୟ ଜୟକାରରୁ ଆରମ୍ଭ କରିଥିଲେ । ଏହାସହ ସେ ନାମ ନ ନେଇ ବିରୋଧିଙ୍କୁ ଟାର୍ଗେଟ କରିଥିଲେ । ମୋଦି କହିଥିଲେ ଆମ ଦେଶକୁ ଗୁଲାମର ଜଞ୍ଜିରରେ ଏମିତି ବାନ୍ଧି ରଖାଯାଇଛି ଯେ କେତେକେ ଲୋକେ ବିକାଶର କାର୍ଯ୍ୟକୁ ନେଇ ପ୍ରଶ୍ନ ଉଠାଉଛନ୍ତି । ପୂର୍ବରୁ ଦେଶରେ ନିଜ ସଂସ୍କୃତିକୁ ନେଇ ହୀନ ଭାବନା ଥିଲା । ହେଲେ ଏବେ କେଦାରନାଥ, ବଦ୍ରିନାଥ, ହେମକୁଣ୍ଡ ସାହିବ, କାଶୀ ଉଜ୍ଜୟିନି ଅଯୋଧ୍ୟା ଭଳି ଶ୍ରଦ୍ଧାର କେନ୍ଦ୍ର ନିଜର ଭବ୍ୟତାକୁ ଦର୍ଶାଉଛି । ଦେଶରେ ଏବେ ଗୁଲାମିର ମାନସିକତାକୁ ଶେଷ କରିବାର ଅଛି । ପୂର୍ବରୁ ସରକାର ସୀମାନ୍ତର ଲୋକଙ୍କ ସାମର୍ଥ୍ୟକୁ ସେମାନଙ୍କ ବିରୋଧରେ ବ୍ୟବହାର କରୁଥିଲେ ହେଲେ ଏବେ ସୀମାନ୍ତର ଲୋକେ ସନ୍ତୋଷରେ ରହିଛନ୍ତି ।
ମୋଦି ଆହୁରି ମଧ୍ୟ କହିଛନ୍ତି, ମୋ ପାଇଁ ସୀମାରେ ଥିବା ଗାଁ ଦେଶର ପ୍ରଥମ ଗାଁ ଓ ସୀମାରେ ରହୁଥିବା ଲୋକେ ଦେଶର ସଶକ୍ତ ପ୍ରହରୀ । ପୁରୁଣା ସ୍ମୃତିକୁ ମନେପକାଇ ମୋଦି କହିଥିଲେ ମୁଁ ପ୍ରଧାନମନ୍ତ୍ରୀ ହୋଇଛି ସେଥିପାଇଁ ଏହି ଗାଁକୁ ମନେପକାଉଛି ତା’ ନୁହେଁ । ୨୫ ବର୍ଷ ପୂର୍ବରୁ ବି ମୁଁ ମାଣା ଗାଁରେ ଭାଜପାର କାର୍ଯ୍ୟ ସମିତି ବୈଠକ ଡାକିଥିଲି । ସେତେବେଳେ କେତେଜଣ କର୍ମୀ ମୋ ଉପରେ ଅସନ୍ତୁଷ୍ଟ ଥିଲେ ଯେ ଏତେ ଦୂରରେ ମୁଁ କାହିଁକି ବୈଠକ ଡାକିଲି । ସେଦିନ ମୁଁ କହିଥିଲି ଯେଉଁଦିନ ଉତ୍ତରାଖଣ୍ଡ ଭାଜପାର ହୃଦୟରେ ମାଣା ଗାଁ ପାଇଁ ସ୍ଥାନ ମିଳିବ, ସେହିଦିନ ସେଠାକାର ଲୋକଙ୍କ ହୃଦୟରେ ଭାଜପାର ସ୍ଥାନ ତିଆରି ହୋଇଯିବ ।
