ନୂଆଦିଲ୍ଲୀ,୨୭।୨: ପାଖେଇ ଆସୁଛି ରଙ୍ଗର ପର୍ବ ହୋଲି। ଏଥର ହୋଲିରେ ଦେଶର କୋଟି କୋଟି ଚାଷୀଙ୍କୁ ମୋଦି ସରକାରଙ୍କ ପକ୍ଷରୁ ଏକ ଉପହାର ଭେଟି ଦିଆଯାଇଛି। ପ୍ରଧାନମନ୍ତ୍ରୀ କିଷାନ ଯୋଜନାର ୧୩ତମ କିସ୍ତି କେନ୍ଦ୍ରସରକାର କୃଷକଙ୍କ ଆକାଉଣ୍ଟକୁ ପଠାଯାଇଥିବା ଜଣାପଡ଼ିଛି। ସୂଚନାଯୋଗ୍ୟ, ସୋମବାର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅନୁମୋଦନକ୍ରମେ କୃଷି ବିଭାଗ ପକ୍ଷରୁ ପ୍ରଧାନମନ୍ତ୍ରୀ କିଷାନ ଯୋଜନାର ୧୩ତମ କିସ୍ତି ୮କୋଟିରୁ ଊର୍ଦ୍ଧ୍ୱ ଚାଷୀଙ୍କ ଆକାଉଣ୍ଟରେ ୧୬,୮୦୦ କୋଟିରୁ ଊର୍ଦ୍ଧ୍ୱ ଟଙ୍କା ଜମା କରାଯାଇଛି। ଫଳରେ ପ୍ରତି ଚାଷୀଙ୍କୁ ୨ହଜାର ଟଙ୍କା ଲେଖାଏ ମିଳିଛି। ଏନେଇ କୃଷି ଏବଂ କୃଷକ କଲ୍ୟାଣ ମନ୍ତ୍ରଣାଳୟ ପକ୍ଷରୁ ଏକ ବିବୃତ୍ତିରେ ସୂଚନା ଦିଆଯାଇଛି। ଉକ୍ତ ୧୩ ତମ କିସ୍ତିର ଲାଭ କେବଳ ସେହି କୃଷକମାନେ ପାଇପାରିବେ, ଯେଉଁମାନଙ୍କର ନାମ ଏହି ଯୋଜନାର ଅଫିସିଆଲ ୱେବସାଇଟର ତାଲିକାରେ ଉପଲବ୍ଧ। ଯଦି କୌଣସି କାରଣରୁ ପୂର୍ବରୁ ଥିବା ତାଲିକାରେ ଚାଷୀଙ୍କ ନାମ ବାଦ୍ ପଡ଼ିଛି ତେବେ ସେମାନେ ହେଲ୍ପଲାଇନ ନମ୍ବରର ସାହାଯ୍ୟ ନେଇପାରିବେ ବୋଲି ମନ୍ତ୍ରଣାଳୟ ପକ୍ଷରୁ ଅବଗତ କରାଯାଇଛି।
