ଭୁବନେଶ୍ୱର,୧।୬(ବ୍ୟୁରୋ): ଉଚ୍ଚ ମାଧ୍ୟମିକ ଶିକ୍ଷା ପରିଷଦ(ସିଏଚ୍ଏସ୍ଇ) ପକ୍ଷରୁ ଯୁକ୍ତ୨ ବିଜ୍ଞାନ ଓ ବାଣିଜ୍ୟ ପରୀକ୍ଷାଫଳ ପ୍ରକାଶ ପାଇଛି। ବୁଧବାର ପୂର୍ବାହ୍ନ ୧୦ଟା ୩୦ରେ ବିଦ୍ୟାଳୟ ଓ ଗଣଶିକ୍ଷା ମନ୍ତ୍ରୀ ସୁଦାମ ମାର୍ଣ୍ଡି ପରିଷଦର ମୁଖ୍ୟ କାର୍ଯ୍ୟାଳୟଠାରେ ଫଳାଫଳ ଘୋଷଣା କରିଛନ୍ତି। ବିଜ୍ଞାନରେ ୮୪.୯୩% ଛାତ୍ରୀଛାତ୍ର ପାସ୍ କରିଥିବାବେଳେ ବାଣିଜ୍ୟରେ ପାସ୍ ହାର ୮୧.୧୨% ରହିଛି। ବାଣିଜ୍ୟରେ ୧୦୨ଜଣ ଛାତ୍ରୀଛାତ୍ର ୯୦ ପ୍ରତିଶତରୁ ଊର୍ଦ୍ଧ୍ୱ ମାର୍କ ରଖି କୃତକାର୍ଯ୍ୟ ହୋଇଛନ୍ତି। ଗତବର୍ଷ ତୁଳନାରେ ଚଳିତବର୍ଷ ଉଭୟ ପାସ୍ ହାର ଯଥେଷ୍ଟ କମ୍ ରହିଛି। ଗତବର୍ଷ ବିଜ୍ଞାନରେ ୯୪.୧୨ ପ୍ରତିଶତ ଛାତ୍ରୀଛାତ୍ର ପାସ୍ କରିଥିବାବେଳେ ବାଣିଜ୍ୟରେ ପାସ୍ ହାର ଥିଲା ୮୯.୨୦ ପ୍ରତିଶତ। ତେବେ ଚଳିତବର୍ଷ ରାଜ୍ୟରେ ନୟାଗଡ଼ ଜିଲାରେ ଉଭୟ ବିଜ୍ଞାନ ଓ ବାଣିଜ୍ୟରେ ପାସ୍ ହାର ସର୍ବାଧିକ ରହିଛି। ବିଜ୍ଞାନରେ ୯୬.୪୧ ପ୍ରତିଶତ ଓ ବାଣିଜ୍ୟରେ ୯୩.୯ ପ୍ରତିଶତ ପିଲା ପାସ୍ କରି ଜିଲା ପାଇଁ ଗୌରବ ବଢ଼ାଇଛନ୍ତି। ଅନ୍ୟପକ୍ଷରେ ବିଜ୍ଞାନରେ ଗଜପତି ଜିଲାରେ ସର୍ବନିମ୍ନ ୬୧.୫୫ ପ୍ରତିଶତ ଛାତ୍ରୀଛାତ୍ର ପାସ୍ କରିଥିବାବେଳେ ବାଣିଜ୍ୟରେ ବୌଦ୍ଧ ଜିଲାରେ ସର୍ବନିମ୍ନ ପାସ୍ ହାର ୫୫.୫୫ ପ୍ରତିଶତ ରହିଛି। ସେହିଭଳି ବାଣିଜ୍ୟରେ ୯୪ଟି ବିଦ୍ୟାଳୟ ଓ ବିଜ୍ଞାନରେ ୨୯୧ ବିଦ୍ୟାଳୟର ଶତପ୍ରତିଶତ ରେଜଲ୍ଟ ହୋଇଥିବାବେଳେ ବିଜ୍ଞାନରେ ୨ଟି ଉଚ୍ଚ ମାଧ୍ୟମିକ ବିଦ୍ୟାଳୟର ଫଳାଫଳ ଶୂନ ରହିଛି।
ସୂଚନାଥାଉକି, ଚଳିତବର୍ଷ ବିଜ୍ଞାନରେ ୯୨ ହଜାର ୯୫୦ଜଣ ଛାତ୍ରୀଛାତ୍ର ପରୀକ୍ଷା ଦେଇଥିବାବେଳେ ୭୮ ହଜାର ୯୩୮ଜଣ କୃତକାର୍ଯ୍ୟ ହୋଇଛନ୍ତି। ବିଜ୍ଞାନରେ ପ୍ରଥମ ଶ୍ରେଣୀରେ ୩୯ ହଜାର ୫୭୩ ଜଣ, ଦ୍ୱିତୀୟ ଶ୍ରେଣୀରେ ୨୪ ହଜାର ୨୫୭ ଜଣ ଓ ତୃତୀୟ ଶ୍ରେଣୀରେ ୧୪ ହଜାର ୮୫୨ଜଣ ଛାତ୍ରୀଛାତ୍ର ଉତ୍ତୀର୍ଣ୍ଣ ହୋଇଛନ୍ତି। ୯୦ ପ୍ରତିଶତରୁ ଊର୍ଦ୍ଧ୍ୱ ମାର୍କ ରଖି ୩୫୮ଜଣ ଛାତ୍ରୀଛାତ୍ର କୃତକାର୍ଯ୍ୟ ହୋଇଛନ୍ତି। ମୋଟ ୪୯,୯୭୫ଜଣ ଛାତ୍ର ପରୀକ୍ଷା ଦେଇଥିବାବେଳେ ୪୨,୧୨୧ଜଣ ପାସ୍ କରିଛନ୍ତି। ଫଳରେ ଛାତ୍ରଙ୍କ ପାସ୍ହାର ୮୪.୨୮ ପ୍ରତିଶତ ରହିଛି। ୪୨,୯୭୫ ଜଣ ଛାତ୍ରୀ ବିଜ୍ଞାନ ପରୀକ୍ଷା ଦେଇଥିବାବେଳେ ୩୬,୮୧୭ଜଣ କୃତକାର୍ଯ୍ୟ ହୋଇଛନ୍ତି। ପାସ୍ହାର ରହିଛି ୮୫.୬୭ ପ୍ରତିଶତ।
ସେହିପରି ବାଣିଜ୍ୟରେ ୨୪ ହଜାର ୮୨ ଜଣ ଛାତ୍ରୀଛାତ୍ର ପରୀକ୍ଷା ଦେଇଥିବାବେଳେ ୧୯ ହଜାର ୫୩୬ଜଣ କୃତକାର୍ଯ୍ୟ ହୋଇଛନ୍ତି। ପ୍ରଥମ ଶ୍ରେଣୀରେ ୭ ହଜାର ୪୧୦ଜଣ, ଦ୍ୱିତୀୟ ଶ୍ରେଣୀରେ ୪ ହଜାର ୫୪୩ଜଣ ଏବଂ ତୃତୀୟ ଶ୍ରେଣୀରେ ୭ ହଜାର ୪୯୨ ଜଣ ଛାତ୍ରୀଛାତ୍ର କୃତକାର୍ଯ୍ୟ ହୋଇଛନ୍ତି। ୧୫,୨୪୧ ପୁଅ ପରୀକ୍ଷା ଦେଇଥିବାବେଳେ ୧୨,୧୨୧ଜଣ ପାସ୍ କରିଛନ୍ତି। ପାସ୍ ହାର ୭୯.୫୨ ପ୍ରତିଶତ ରହିଛି। ଅନ୍ୟପଟେ ୮୮୪୧ ଛାତ୍ରୀ ବାଣିଜ୍ୟରେ ପରୀକ୍ଷା ଦେଇଥିବାବେଳେ ୭୪୧୫ଜଣ ଉତ୍ତୀର୍ଣ୍ଣ ହୋଇଛନ୍ତି। ଛାତ୍ରୀଙ୍କ ପାସ୍ ହାର ୮୩.୮୭ ପ୍ରତିଶତ ରହିଛି। ଉଭୟରେ ଛାତ୍ରଙ୍କ ତୁଳନାରେ ଛାତ୍ରୀଙ୍କ ପାସହାର ଅଧିକ ରହିଛି।
ଫଳାଫଳ ଘୋଷଣା ଅବସରରେ ମନ୍ତ୍ରୀଙ୍କ ସହ ବିଦ୍ୟାଳୟ ଓ ଗଣଶିକ୍ଷା ବିଭାଗର କମିଶନର ତଥା ଶାସନ ସଚିବ ଅଶ୍ବଥୀ ଏସ୍, ଉଚ୍ଚ ମାଧ୍ୟମିକ ଶିକ୍ଷା ପରିଷଦ ଅଧ୍ୟକ୍ଷ ଅଶ୍ୱିନୀ କୁମାର ମିଶ୍ର, ପରୀକ୍ଷା ନିୟନ୍ତ୍ରକ ଅଶୋକ କୁମାର ନାୟକଙ୍କ ସମେତ ବିଭାଗୀୟ ବରିଷ୍ଠ ପଦାଧିକାରୀ ଉପସ୍ଥିତ ଥିଲେ।
ଇ-ସ୍ପେସ୍ରେ ଫଳ ଦେଖିବାରେ ବିଳମ୍ବ
ଗତ କିଛିଦିନ ଧରି ଯୁକ୍ତ ୨ ପରୀକ୍ଷାଫଳ ଘୋଷଣା ତାରିଖ ନେଇ କଳ୍ପନାଜଳ୍ପନା ଲାଗି ରହିଥିଲା। ତାରିଖ ଘୋଷଣାରେ ବିଳମ୍ବ କାରଣରୁ ଛାତ୍ରୀଛାତ୍ର ତଥା ଅଭିଭାବକଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଥିଲା। ମାତ୍ର ବୁଧବାର ଫଳ ପ୍ରକାଶ ନେଇ ମଙ୍ଗଳବାର ରାତିରେ ସୂଚନା ପାଇବା ପରେ ପରୀକ୍ଷାର୍ଥୀଙ୍କ ମଧ୍ୟରେ ଉତ୍କଣ୍ଠା ଦ୍ୱିଗୁଣିତ ହୋଇଯାଇଥିଲା। ଦିନ ୧୧ଟା ପରଠାରୁ ପରିଷଦ ପକ୍ଷରୁ ଦିଆଯାଇଥିବା ଲିଙ୍କ୍ରେ ଲଗଇନ୍ କରି ପିଲାମାନେ ଫଳାଫଳ ଦେଖିପାରିବେ ବୋଲି ସୂଚନା ଦିଆଯାଇଥିଲା। ମାତ୍ର ନିର୍ଦ୍ଧାରିତ ସମୟର ଦୁଇଘଣ୍ଟା ପରେ ଫଳାଫଳ ଓ୍ବେବ୍ସାଇଟରେ ଉପଲବ୍ଧ ହୋଇଥିଲା। ଏହାକୁ ନେଇ ଛାତ୍ରୀଛାତ୍ର ଓ ଅଭିଭାବକମାନେ ବିରକ୍ତିଭାବ ପ୍ରକାଶ କରିଥିଲେ। ସେହିପରି ବିଭିନ୍ନ କଲେଜ କର୍ତ୍ତୃପକ୍ଷ ନିଜ କଲେଜର ଫଳାଫଳ ଜାଣିବା ପାଇଁ ବ୍ୟଗ୍ର ହୋଇପଡ଼ିଥିବାବେଳେ ଇ-ସ୍ପେସ୍ ସ୍ଲୋ ହେବା କାରଣରୁ ସନ୍ଧ୍ୟା ସୁଦ୍ଧା ଅନେକ କଲେଜ ବିସ୍ତୃତ ଫଳାଫଳ ଜାଣିପାରି ନ ଥିଲେ। ସିବିଏସ୍ଇ ଓ ଆଇସିଏସ୍ଇ ପରିଚାଳିତ ଦଶମ ଏବଂ ଦ୍ୱାଦଶ ପରୀକ୍ଷାଫଳ ଯଥେଷ୍ଟ ଆଗୁଆ ପ୍ରକାଶ ପାଇଥିବାବେଳେ ରାଜ୍ୟ ଉଚ୍ଚ ମାଧ୍ୟମିକ ପରିଷଦ ପରୀକ୍ଷା ଫଳ ପ୍ରକାଶରେ କାହିଁକି ବିଳମ୍ବ ହେଉଛି ବୋଲି ଅନେକ ପ୍ରଶ୍ନ କରିଛନ୍ତି। ଏଥିସହ ଜୁନ୍ ୮ ସୁଦ୍ଧା ଯୁକ୍ତ୨ କଳା ଓ ଧନ୍ଦାମୂଳକ ପରୀକ୍ଷା ଫଳ ପ୍ରକାଶ ନେଇ କୁହାଯାଉଥିଲେ ମଧ୍ୟ ବିଧିବଦ୍ଧ ଭାବେ ବିଜ୍ଞପ୍ତି ପ୍ରକାଶ ପାଇ ନ ଥିବାରୁ ଏହାକୁ ନେଇ ମଧ୍ୟ ଛାତ୍ରୀଛାତ୍ରଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ବାଣିଜ୍ୟରେ ଶତପ୍ରତିଶତ ପାସ୍ ହାର ଥିବା ଜିଲା ଏଥର ସର୍ବନିମ୍ନ
ଯୁକ୍ତ ୨ ବିଜ୍ଞାନ ଓ ବାଣିଜ୍ୟ ପରୀକ୍ଷାଫଳ ପ୍ରକାଶ ପାଇଛି। ବାଣିଜ୍ୟରେ ଗତବର୍ଷ ସର୍ବାଧିକ ଅର୍ଥାତ୍ ଶତପ୍ରତିଶତ ପାସ୍ ହାର ଥିବା ଜିଲା ଏଥର ସର୍ବନିମ୍ନ ରେଜଲ୍ଟ କରିଛି। ଫଳାଫଳ ଅନୁସାରେ, ଚଳିତବର୍ଷ ବୌଦ୍ଧ ଜିଲାରେ ସର୍ବନିମ୍ନ ୫୫.୫୫ ପ୍ରତିଶତ ଛାତ୍ରୀଛାତ୍ର ଉତ୍ତୀର୍ଣ୍ଣ ହୋଇପାରିଛନ୍ତି। ଗତବର୍ଷ ବାଣିଜ୍ୟରେ ଏହି ଜିଲାର ଛାତ୍ରୀଛାତ୍ର ଶତପ୍ରତିଶତ ପାସ୍ କରି ରେକର୍ଡ କରିଥିଲେ। ଏପରି ନୈରାଶ୍ୟଜନକ ପ୍ରଦର୍ଶନକୁ ନେଇ ଶିକ୍ଷାବିତ୍ମାନେ ଚିନ୍ତା ପ୍ରକଟ କରିଛନ୍ତି। ଅନ୍ୟପଟେ ଚଳିତବର୍ଷ ବିଜ୍ଞାନରେ ଗଜପତି ଜିଲାରେ ପାସ୍ ହାର ସର୍ବନିମ୍ନ ୬୧.୫୫ ପ୍ରତିଶତ ରହିଛି।
ଦୁଇଟି ପଦ୍ଧତିରେ ହୋଇଥିଲା ମୂଲ୍ୟାୟନ
ଚଳିତବର୍ଷ ଦୁଇଟି ପଦ୍ଧତିରେ ଯୁକ୍ତ୨ ମୂଲ୍ୟାୟନ କରାଯାଇଛି। ପ୍ରଥମ ପଦ୍ଧତି ଅନୁଯାୟୀ, ଉଚ୍ଚ ମାଧ୍ୟମିକ ବିଦ୍ୟାଳୟ ସ୍ତରରେ ହୋଇଥିବା ଇଣ୍ଟରନାଲ ପରୀକ୍ଷାରେ ଛାତ୍ରୀଛାତ୍ର ପାଇଥିବା ମାର୍କରୁ ୨୦ ପ୍ରତିଶତ ୱେଟେଜ୍(ହାରାହାରି ମାର୍କ) ଓ ବୋର୍ଡ ପରୀକ୍ଷାର ୮୦ ପ୍ରତିଶତ ୱେଟେଜ୍କୁ ନିଆଯାଇ ପିଲାଙ୍କ ପ୍ରତ୍ୟେକ ବିଷୟର ମାର୍କ ନିର୍ଦ୍ଧାରଣ କରାଯାଇଛି। ଏଥିପାଇଁ ପରୀକ୍ଷାର୍ଥୀଙ୍କ ତିନୋଟି ଇଣ୍ଟରନାଲ ପରୀକ୍ଷା ମଧ୍ୟରୁ ସର୍ବାଧିକ ମାର୍କ ପାଇଥିବା ଦୁଇଟି ପରୀକ୍ଷାକୁ ବିଚାରକୁ ନିଆଯାଇଛି। ଏହି ପଦ୍ଧତିରେ ଉଭୟ ଇଣ୍ଟରନାଲ ଓ ବୋର୍ଡ ପରୀକ୍ଷାର ୱେଟେଜ୍ ଭିତ୍ତିରେ ପରୀକ୍ଷାର୍ଥୀଙ୍କ ଫଳ ଚୂଡ଼ାନ୍ତ କରାଯାଇଛି। ଦ୍ବିତୀୟ ପଦ୍ଧତି ଅନୁଯାୟୀ, କେବଳ ଯୁକ୍ତ୨ ମୁଖ୍ୟ ପରୀକ୍ଷାରେ ପରୀକ୍ଷାର୍ଥୀ ରଖିଥିବା ନମ୍ବରକୁ ୧୦୦ପ୍ରତିଶତ ୱେଟେଜ ଭାବେ ଗ୍ରହଣ କରାଯାଇଛି। ଉପରୋକ୍ତ ଦୁଇଟି ପଦ୍ଧତି ମଧ୍ୟରୁ ଯେଉଁଥିରେ ପରୀକ୍ଷାର୍ଥୀ ଅଧିକ ମାର୍କ ରଖିଛନ୍ତି ତାହାକୁ ସଂପୃକ୍ତ ବିଷୟର ମାର୍କ ଭାବେ ବିଚାରକୁ ନିଆଯାଇଛି। ଇଣ୍ଟରନାଲ ପରୀକ୍ଷା ଦେଇପାରି ନ ଥିବା ପିଲାଙ୍କ କ୍ଷେତ୍ରରେ ସେମାନଙ୍କ ମୁଖ୍ୟ ପରୀକ୍ଷାର ମାର୍କକୁ ଚୂଡ଼ାନ୍ତ ଭାବେ ଗ୍ରହଣ କରାଯାଇଛି।
