ପ୍ଲାନେଟାରିୟମ୍‌ ପୁଣି ବନ୍ଦ, ୫ଦିନ ହେବ ଦର୍ଶକ ନିରାଶ
8:01 amJune 25, 2023June 25, 2023 / 08

ଭୁବନେଶ୍ୱର,୨୫।୬ (ବନ୍ଦନା ସେଠୀ)ଯାନ୍ତ୍ରିକ ତ୍ରୁଟି ପାଇଁ ପଠାଣିସାମନ୍ତ ପ୍ଲାନେଟାରିୟମ୍‌ ପୁଣି ବନ୍ଦ ରହିଛି। ଗତ ୨୧ ତାରିଖରୁ ପ୍ଲାନେଟାରିୟମ୍‌ରେ କୌଣସି ଶୋ’ ହେଉ ନ ଥିବାରୁ ଦର୍ଶକମାନେ ନିରାଶରେ ଫେରୁଛନ୍ତି। ପୂର୍ବରୁ ମଧ୍ୟ ଏହି କାରଣରୁ ଜୁନ୍‌ ୧୦ରୁ ୬ଦିନ ପାଇଁ ପ୍ଲାନେଟାରିୟମ୍‌କୁ ବନ୍ଦ ରଖାଯାଇଥିଲା। ପରେ ମୁମ୍ବାଇରୁ ଇଞ୍ଜିନିୟରଙ୍କୁ ଡକାଯାଇ ଆବଶ୍ୟକ ମରାମତି କରାଯାଇଥିଲା। ଇଞ୍ଜନିୟରଙ୍କ ବାଟଖର୍ଚ୍ଚ ବାବଦକୁ ୩୦ହଜାର ଟଙ୍କା ବହନ କରିଥିଲେ ପ୍ଲାନେଟାରିୟମ କର୍ତ୍ତୃପକ୍ଷ। ୧୬ ତାରିଖରେ ପ୍ଲାନେଟାରିୟମ୍‌ ଖୋଲିଥିଲେ ମଧ୍ୟ ସପ୍ତାହେ ନ ପୂରୁଣୁ ପୁଣି ଯାନ୍ତ୍ରିକ ତ୍ରୁଟି ଦେଖାଦେଇଛି। ଏନେଇ ପ୍ଲାନେଟୋରିୟମ୍‌ ନିର୍ଦ୍ଦେଶିକା ସଞ୍ଜୁଲତା ବେହେରା କହିଛନ୍ତି, କମ୍ପ୍ୟୁଟରର କିଛି ହାର୍ଡଡିସ୍କ ଖରାପ ହୋଇଯାଇଥିବାରୁ ଶୋ’ ଚାଲିବା ସମ୍ଭବ ହୋଇପାରୁନି। ସେକ୍ରେଟାରୀ ଏବେ ନାହାନ୍ତି, ସେ ଆସିବା ପରେ ୪/୫ ମଧ୍ୟରେ ନୂଆ ହାର୍ଡଡିସ୍କ କିଣାଯିବ। ଏହାପରେ ପୁଣିଥରେ ପ୍ଲାନେଟୋରିୟମ୍‌କୁ ଦର୍ଶକଙ୍କ ପାଇଁ ଖୋଲାଯିବ ବୋଲି ସେ କହିଛନ୍ତି। ଅନ୍ୟପକ୍ଷରେ ଏଠାରେ ଲାଗିଥିବା ଡୋମ୍‌ର ସ୍ଥାୟିତ୍ୱ ୭ବର୍ଷ। ୨୦୧୨ରେ ଏହା ଲଗାଯାଇଥିବାବେଳେ ୨୦୧୯ରେ ବଦଳାଇବା ପାଇଁ ଯୋଜନା ରହିଥିଲା। ମାତ୍ର ୨୦୨୦ରେ ପ୍ଲାନେଟାରିମ୍‌ର ନବୀକରଣ ପାଇଁ ସରକାର ନିର୍ଦ୍ଦେଶ ଦେବା ପରେ ଡୋମ୍‌କୁ ଆଗୁଆ ବଦଳା ଯାଇ ନ ଥିଲା। ତେବେ କରୋନା ପାଇଁ ନବୀକରଣ କାର୍ଯ୍ୟ ହୋଇ ନ ହୋଇ ପାରିବାରୁ ଡୋମ୍‌ ପରିବର୍ତ୍ତନ କାର୍ଯ୍ୟ ମଧ୍ୟ ହୋଇପାରି ନାହିଁ। ଏବେ ନବୀକରଣ ପାଇଁ ଟେଣ୍ଡର ପ୍ରକ୍ରିୟା ସରିଯାଇଛି। କେନ୍ଦ୍ର ସରକାରଙ୍କ ଏକ ସଂସ୍ଥା ଇପିଆଏଲ୍‌କୁ ଏହି ଦାୟିତ୍ୱ ଦିଆଯାଇଛି। ପ୍ଲାନେଟାରିୟମ୍‌ର ଉଭୟ ଡୋମ୍‌ ଓ ସିଭିଲ୍‌ କାମ ଉକ୍ତ ସଂସ୍ଥା କରିବ। ଆସନ୍ତା ମାସେ ଭିତରେ ନବୀକରଣ କାର୍ଯ୍ୟ ଆରମ୍ଭ ହେବ ଓ ଏହା ପୂର୍ବରୁ ହାର୍ଡଡିସ୍କ କିଣାଯାଇ ପ୍ଲାନେଟାରିୟମ୍‌ ଖୋଲିବ ବୋଲି ନିର୍ଦ୍ଦେଶିକା ବେହେରା ସୂଚନା ଦେଇଛନ୍ତି। ତେବେ ପ୍ଲାନେଟାରିୟମ୍‌ରେ ବାରମ୍ବାର ଏପରି ଯାନ୍ତ୍ରିକ ତ୍ରୁଟି ଦେଖାଦେଉଥିବା ବେଳେ ଏହାର ସ୍ଥାୟୀ ସମାଧାନ କରାଯାଉ ନ ଥିବାରୁ ସାଧାରଣ ଲୋକଙ୍କ ମଧ୍ୟରେ ଅସନ୍ତୋଷ ଦେଖାଦେଇଛି।