ବାହାନଗା, ୧୩। ୨(ଅରୂପ କୁମାର ଦାସ ): ୧୬ ନମ୍ବର ଜାତୀୟ ରାଜପଥ ବାହାନଗା ଓଭର ବ୍ରିଜ ଉପରେ ତ୍ରୀର୍ଥଯାତ୍ରୀ ବସ୍ ଦୁର୍ଘଟଣାଗ୍ରସ୍ତ ହୋଇଛି । ତେବେ ଭୟଙ୍କର ଦୁର୍ଘଟଣାରେ ଡ୍ରାଇଭରଙ୍କ ମୃତ୍ୟୁ ହୋଇଥିବା ବେଳେ ୧୦ଜଣ ଗୁରୁତର ହୋଇଥିବା ସୂଚନା ରହିଛି ।
ଖବର ଅନୁସାରେ, ଶୁକ୍ରବାର ସକାଳ ୫ ଟା ସମୟରେ କଲିକତାରୁ ପୁରୀ ଯାଉଥିବା ତ୍ରୀର୍ଥଯାତ୍ରୀ ବସ୍ (ଏପି ୨୫ ଡବ୍ଲୁ ୯୯୨୯ )ନମ୍ବର ବସଟିର ଡ୍ରାଇଭରଙ୍କ ଆଖି ଲାଗି ଯାଇଥିଲା । ଫଳରେ ବସଟି ଭାରସାମ୍ୟ ହରାଇ ଓଭରବ୍ରିଜ ଡାଇଭରସନରେ ପିଟି ହୋଇଥିଲା । ତେବେ ବସଟି ବ୍ରିଜ ଉପରେ ଝୁଲି ରହିଥିଲା । ବସର ଇଞ୍ଜିନ ଡାଇଭରସନରେ ପିଟି ହେବା ଫଳରେ ଡ୍ରାଇଭର ଜଣକ ବ୍ରିଜ ତଳକୁ ଖସି ପଡିଥିଲେ । ଫଳରେ ଘଟଣାସ୍ଥଳରେ ହିଁ ତାଙ୍କର ମୃତ୍ୟୁ ହୋଇଥିଲା ।
ବସରେ ମୋଟ ୪୦ ଜଣ ତ୍ରୀର୍ଥଯାତ୍ରୀ ମହିଳା ପୁରୁଷ ପିଲା ଥିଲେ। ସେମାନଙ୍କ ମଧ୍ୟରୁ ୧୦ ଜଣ ଗୁରୁତର ହୋଇଥିବା ବେଳେ ପ୍ରଥମେ ଖନ୍ତାପଡ଼ା ଗୋଷ୍ଠି ସ୍ୱାସ୍ଥ୍ୟକେନ୍ଦ୍ରକୁ ଚିକିତ୍ସା ପାଇଁ ନିଆଯାଇଥିଲା। ସେଠାରେ ସେମାନଙ୍କର ଅବସ୍ଥା ସଙ୍କଟାପର୍ଣ୍ଣ ହେବାରୁ ବାଲେଶ୍ୱର ଫକୀର ମୋହନ ମେଡିକାଲ କାକେଜକୁ ସ୍ଥାନାନ୍ତରିତ କରାଯାଇଛି। ସମସ୍ତ ତ୍ରୀର୍ଥଯାତ୍ରୀମାନଙ୍କ ଘର ଆନ୍ଧ୍ରପ୍ରଦେଶର ଜେନାରୁଲାମ ଜିଲାର ବୋଲି ଜଣାପଡିଛି । ସମସ୍ତେ କଲିକତା କାଳୀ, ଗଙ୍ଗା ଆଦି ବୁଲି ପୁରୀ ଜଗନ୍ନାଥ ଦର୍ଶନ ପରେ ଆନ୍ଧ୍ର ଫେରିଥାନ୍ତେ ।
