ଭଞ୍ଜନଗର,୧୬/୪(ବାବୁଲା ପ୍ରଧାନ): ଗ୍ରୀଷ୍ମ ଋତୁରେ ଲୋକେ ସାଧାରଣତଃ ରକ୍ତଦାନ କରିବାକୁ ଅନାଗ୍ରହ ପ୍ରକାଶ କରିଥାନ୍ତି। ତେଣୁ ଏହି ସମୟରେ ରକ୍ତ ଭଣ୍ଡାର ଗୁଡ଼ିକରେ ରକ୍ତର ଅଭାବ ରହିଥାଏ। ଏହିଭଳି ଗଞ୍ଜାମ ଜିଲା ଭଞ୍ଜନଗର ରକ୍ତଭଣ୍ଡାରର ମଧ୍ୟ ସମାନ ଅବସ୍ଥା। କିନ୍ତୁ ଭଞ୍ଜନଗର ଅଞ୍ଚଳର ବିପଦର ବନ୍ଧୁ କର୍ମକର୍ତ୍ତା ସମେତ ଅନ୍ୟାନ୍ୟ ସଂଗଠନ ଗୁଡ଼ିକ ନିୟମିତ ରକ୍ତଦାନ ବ୍ୟବସ୍ଥା କରିଥାନ୍ତି। ତେଣୁ ଭଞ୍ଜନଗର ଅଞ୍ଚଳର ରୋଗୀମାନେ ଆଜିକୁ କିଛି ବର୍ଷ ହେବ ରକ୍ତ ଅଭାବର ବିଶେଷ ଅସୁବିଧାର ସମ୍ମୁଖୀନ ହୋଇନଥାନ୍ତି। ଏହିଭଳି ପରିସ୍ଥିତିରେ ଗୁରୁବାର ଭଞ୍ଜନଗର ମେଡିକାଲରେ ଚିକିତ୍ସିତ ହେଉଥିବା ଜଣେ ରୋଗୀଙ୍କୁ ଏକ ବିରଳ ରକ୍ତ ଆଶ୍ୟକତା ପଡ଼ିଥିଲା। ଏନେଇ ରୋଗୀଙ୍କ ସମ୍ପର୍କୀୟମାନେ ଚିନ୍ତାରେ ଥିଲେ। ଏହି ସମୟରେ ଭଞ୍ଜନଗର ଉପଖଣ୍ଡ ମେଡିକାଲରେ ତାଲିମ ନେଉଥିବା ଫାର୍ମାସିଷ୍ଟ ଛାତ୍ର ଓମ ପ୍ରକାଶ ସାହୁ ଜାଣିବା ପରେ ତୁରନ୍ତ ରକ୍ତଦାନ କରିଥିଲେ। ଫଳରେ ଉକ୍ତ ରୋଗୀଙ୍କ ଜୀବନ ରକ୍ଷାରେ ଓମ ସହାୟ ହୋଇଥିଲେ। ଫାର୍ମାସିଷ୍ଟ ଛାତ୍ରଙ୍କ ଏହିଭଳି କାର୍ଯ୍ୟକୁ ସାଧାରଣରେ ପ୍ରଶଂସା କରାଯାଇଛି।
Dharitri – Odisha’s No.1 Odia Daily
