ନୂଆଦିଲ୍ଲୀ,୨୭।୮: ଇରାନ ଉପରେ ଆମେରିକାର ନୂଆ କଠୋର ପ୍ରତିବନ୍ଧକ ଲାଗୁ ହେବା ପରେ ଅନ୍ତର୍ଜାତୀୟ ବଜାରରେ ଅଶୋଧିତ ତୈଳ (Crude Oil) ମୂଲ୍ୟରେ ବଡ଼ ହ୍ରାସ ଦେଖାଯାଉଛି। IOCL, BPCL ଏବଂ HPCL ଭଳି ସରକାରୀ ତୈଳ ବିପଣନ କମ୍ପାନୀ (OMCs) ଏହି ସଦ୍ୟତମ ପରିସ୍ଥିତି ଉପରେ ନଜର ରଖିଛନ୍ତି। ଅଶୋଧିତ ତୈଳ ଦର ହ୍ରାସ ପାଉଥିବାରୁ ଦେଶର ସାଧାରଣ ଉପଭୋକ୍ତାଙ୍କ ମନରେ ମଧ୍ୟ ପ୍ରଶ୍ନ ଉଠୁଛି ଏହାର ପ୍ରଭାବରେ ଦେଶୀୟ ବଜାରରେ ପେଟ୍ରୋଲ ଓ ଡିଜେଲ ଦର କମିବ କି?
ଅଶୋଧିତ ତୈଳ ଦର କମିଥିଲେ ମଧ୍ୟ ଭାରତରେ ପେଟ୍ରୋଲ-ଡିଜେଲ ଦର ତୁରନ୍ତ କମିବାର ସମ୍ଭାବନା କମ୍। ଏହାର ପ୍ରଥମ କାରଣ ହେଉଛି, ଗତ କିଛି ମାସରେ ଆମେରିକା-ଇରାନ ମଧ୍ୟରେ ଉତ୍ତେଜନା ଚରମ ସୀମାରେ ପହଞ୍ଚିଥିବା ସମୟରେ ତୈଳ କମ୍ପାନୀଗୁଡ଼ିକ ଦେଶୀୟ ଖୁଚୁରା ଦରକୁ ବହୁ ପରିମାଣରେ ନିୟନ୍ତ୍ରଣରେ ରଖିଥିଲେ। ସେହି ସମୟରେ ଦର ବୃଦ୍ଧିର ଅତିରିକ୍ତ ଭାର ଲୋକଙ୍କ ଉପରେ ନ ପକାଇ ତୈଳ କମ୍ପାନୀଗୁଡ଼ିକ ନିଜେ କ୍ଷତି ବହନ କରିଥିଲେ। ଏବେ ସେହି ପୁରୁଣା କ୍ଷତିର କିଛି ଅଂଶ ଭରଣା କରୁଛନ୍ତି। ଏହି ଅନିଶ୍ଚିତତା କାରଣରୁ ତୈଳ କମ୍ପାନୀଗୁଡ଼ିକ ତୁରନ୍ତ ଦର କମାଇବାକୁ ଚାହୁଁନାହାନ୍ତି।
ଦେଶରେ ଆଜି ପେଟ୍ରୋଲ ଓ ଡିଜେଲ ଦର ସ୍ଥିର ରହିଛି। ଭାରତରେ ମେ ୨୫ ତାରିଖଠାରୁ ଇନ୍ଧନ ଦରରେ କୌଣସି ପରିବର୍ତ୍ତନ ହୋଇନାହିଁ। ସେହି ସମୟରେ ସରକାରୀ ତୈଳ ବିପଣନ କମ୍ପାନୀ (OMCs) ପେଟ୍ରୋଲ ଦରରେ ପ୍ରତି ଲିଟର ୨.୬୧ ଟଙ୍କା ଏବଂ ଡିଜେଲ ଦରରେ ପ୍ରତି ଲିଟର ୨.୭୧ ଟଙ୍କା ବୃଦ୍ଧି କରିଥିଲେ।
