ସିଲଭରଷ୍ଟୋନ୍, ୮ା୮ (ଏପି)-ସର୍ଗିଓ ପେରେଜଙ୍କର ପୁଣି କରୋନା ଭାଇରସ୍ ଟେଷ୍ଟରେ ପଜିଟିଭ୍ ଆସିଛି। ଫଳରେ ରବିବାର ସିଲ୍ଭରଷ୍ଟୋନ୍ରେ ହେବାକୁଥିବା ଦ୍ୱିତୀୟ ଫର୍ମୁଲା ଓ୍ବାନ ରେସ୍ରେ ସେ ଭାଗ ନେଇ ପାରିବେ ନାହିଁ। ମେକ୍ସିକୋର ଏହି ଡ୍ରାଇଭର ୭ ଦିନ କ୍ୱାରାଣ୍ଟାଇନ୍ରେ ରହିବା ପରେ ରେସ୍କୁ ପ୍ରତ୍ୟାବର୍ତ୍ତନ କରିବେ ବୋଲି ଆଶା କରିଥିଲେ। ମାତ୍ର ଶୁକ୍ରବାର ସକାଳେ ତାଙ୍କର ହୋଇଥିବା କୋଭିଡ୍ ଡେଷ୍ଟରେ ପଜିଟିଭ ଆସିଥିବା ତାଙ୍କ ଟିମ୍ ରେସିଂ ପଏଣ୍ଟ ତରଫରୁ ସୂଚନା ଦିଆଯାଇଛି। ତାଙ୍କ ସ୍ବାସ୍ଥ୍ୟାବସ୍ଥା ଭଲ ରହିଛି। ସେ କ୍ରମେ ଆରୋଗ୍ୟ ଲାଭ କରୁଥିବା ତାଙ୍କ ଟିମ୍ କହିଛି। ଫଳ ସ୍ବରୂପ ରବିବାର ହେବାକୁଥିବା ଫର୍ମୁଲା ଓ୍ବାନ୍ର ୭୦ତମ ବାର୍ଷିକୀ ରେସ୍ରେ ଜର୍ମାନର ଭେଟେରାନ ନିକୋ ହକେନବର୍ଗ ପେରେଜଙ୍କ ସ୍ଥାନରେ ପ୍ରତିଯୋଗିତାରେ ଭାଗ ନେବେ। ହକେନବର୍ଗ ଗତ ସପ୍ତାହରେ ଏହି ଭେନ୍ୟୁରେ ଅନୁଷ୍ଠିତ ବ୍ରିଟିଶ ଗ୍ରାଁ ପ୍ରିରେ ମଧ୍ୟ ପେରେଜଙ୍କ ସ୍ଥାନରେ ଭାଗ ନେଇଥିଲେ। କିନ୍ତୁ ତାଙ୍କ ଇଞ୍ଜିନ୍ରେ ସମସ୍ୟା ଦେଖା ଦେବାରୁ ସେ ରେସ୍ ଆରମ୍ଭ କରି ପାରି ନ ଥିଲେ। ମହାମାରୀ ଯୋଗୁ ଚଳିତ ବର୍ଷ ଫର୍ମୁଲା ଓ୍ବାନ ସିଜନ ଆରମ୍ଭରେ ବିଳମ୍ବ ଘଟିଛି। ସିଲ୍ଭରଷ୍ଟାନ୍ରେ ଲଗାତର ଦୁଇ ସପ୍ତାହରେ ଦୁଇଟି ରେସ୍ର ଆୟୋଜନ କରାଯାଇଛି।
