ନୂଆଦିଲ୍ଲୀ,୨୧ା୪: ସମଲିଙ୍ଗୀ ବିବାହର ବୈଧୀକରଣକୁ ନେଇ ସୁପ୍ରିମକୋର୍ଟର ୫ ଜଣିଆ ସାମ୍ବିଧାନିକ ପୀଠରେ ଗୁରୁବାର ତୃତୀୟ ଦିନ ପାଇଁ ଶୁଣାଣି ଜାରି ରହିଥିଲା। ବିପରୀତଲିଙ୍ଗୀ ଦୁଇ ଜୀବନସାଥୀଙ୍କ ମଧ୍ୟରେ ବିବାହ ଜରୁରୀ କି ବୋଲି ପ୍ରଧାନ ବିଚାରପତି ଡି.ଓ୍ବାଇ. ଚନ୍ଦ୍ରଚୂଡ଼ ଗୁରୁବାର ପ୍ରଶ୍ନ କରିଛନ୍ତି। ସମଲିଙ୍ଗୀ ସମ୍ପର୍କକୁ ଆମେ କେବଳ ଶାରୀରିକ ସମ୍ପର୍କ ଭାବେ ଦେଖୁନାହୁଁ, ବରଂ ଏକ ସ୍ଥାୟୀ, ଭାବାତ୍ମକ ସମ୍ପର୍କ ଭାବେ ଦେଖୁଛୁ ବୋଲି ଜଷ୍ଟିସ୍ ଚନ୍ଦ୍ରଚୂଡ଼ କହିଥିଲେ। କୋର୍ଟ ଓ୍ବେବ୍ସାଇଟ୍ ଏବଂ ୟୁଟ୍ୟୁବ୍ରେ ଶୁଣାଣିର ସିଧା ପ୍ରସାରଣ ହୋଇଥିଲା।
ସମଲିଙ୍ଗୀ ବିବାହକୁ ଆଇନଗତ ସ୍ବୀକୃତି ଦେବାକୁ ହେଲେ ବିବାହ ସହ ସମ୍ପୃକ୍ତ ଧାରଣାର ପୁନଃ ସଂଜ୍ଞା ନିରୂପଣ କରିବାକୁ ହେବ। କାରଣ ପ୍ରଚଳିତ ନିୟମ ଅନୁଯାୟୀ ବିବାହ ପାଇଁ ଦୁଇ ଦୁଇ ଜୀବନସାଥୀ ବିପରୀତଲିଙ୍ଗୀ ହୋଇଥିବା ଜରୁରୀ। ୧୯୫୪ରେ ସ୍ବତନ୍ତ୍ର ବିବାହ ଆଇନ କାର୍ଯ୍ୟକାରୀ ହେବା ପରଠାରୁ ଗତ ୬୯ ବର୍ଷ ମଧ୍ୟରେ ଆଇନରେ ଉଲ୍ଲେଖନୀୟ ପରିବର୍ତ୍ତନ ହୋଇଛି। ଯେଉଁମାନେ ପର୍ସନାଲ ଲ’କୁ ଅନୁପାଳନ କରିବାକୁ ଚାହୁଁନାହାନ୍ତି, ସେମାନଙ୍କର ସିଭିଲ୍ ବିବାହ କରାଯାଉଛି। ସମଲିଙ୍ଗୀ ସମ୍ପର୍କକୁ ଅପରାଧମୁକ୍ତ କରାଯିବା ଦ୍ୱାରା କେବଳ ଦୁଇ ସମଲିଙ୍ଗୀଙ୍କ ମଧ୍ୟରେ ସହମତିରେ ସମ୍ପର୍କ ସ୍ଥାପନକୁ ସ୍ବୀକୃତି ଦିଆଯାଇ ନାହିଁ, ଏଥିସହିତ ସମଲିଙ୍ଗୀ ସମ୍ପର୍କର ଥିବା ଲୋକଙ୍କ ମଧ୍ୟରେ ଏହାକୁ ସ୍ଥାୟୀ ସମ୍ପର୍କ ଭାବେ ସ୍ବୀକୃତି ମିଳିଛି ବୋଲି ୨୦୧୮ର ଐତିହାସିକ ରାୟର ଅବତାରଣା କରି ସିଜେଆଇ କହିଥିଲେ। ଟ୍ରୋଲ୍ ହେବାର ଆଶଙ୍କା ଥିଲେ ମଧ୍ୟ ଏହାକୁ ଅନ୍ୟ ସହ ତୁଳନା କରାଯାଇପାରିବ ନାହିଁ ବୋଲି ଜଷ୍ଟିସ୍ ଚନ୍ଦ୍ରଚୂଡ଼ କହିଥିଲେ।
