ବଲାଙ୍ଗିର, ୨୬।୫ (ସୁନିଲ କୁମାର ମହାନ୍ତି): ବଲାଙ୍ଗିର ଜିଲ୍ଲା ବେଲପଡ଼ା ବ୍ଲକ ଅଞ୍ଚଳରେ ପାନୀୟ ଜଳ ସମସ୍ୟା ଏବେ ଉତ୍କଟ ରୂପ ଧାରଣ କରିଛି। ପିଇବା ପାଣି ମୁନ୍ଦେ ପାଇଁ ଲୋକେ ନାହିଁ ନଥିବା ହଇରାଣ ହେଉଥିବା ବେଳେ ଏବେ ସେମାନଙ୍କ ଧୈର୍ଯ୍ୟଚ୍ୟୁତି ଘଟିଛି। ପାଣି ପାଇଁ ଲୋକେ ରାଜରାସ୍ତାକୁ ଓହ୍ଲାଇ ଏକ ଅଭିନବ ଉପାୟରେ ପ୍ରତିବାଦ ପ୍ରଦର୍ଶନ କରିଛନ୍ତି, ଯାହାକୁ ନେଇ ସମଗ୍ର ରାଜ୍ୟରେ ଚର୍ଚ୍ଚା ଆରମ୍ଭ ହୋଇଛି।
ସୂଚନା ଅନୁଯାୟୀ, ବେଲପଡ଼ା ବ୍ଲକର ଜୁବା, ଧୁମାଭଟା ଏବଂ କପାଣି ପଞ୍ଚାୟତର ବିଭିନ୍ନ ଗ୍ରାମ ଯେପରିକି– ନାଗଫେଣା, ବିଲେଇମରା, ଜୁବା, ଖଲିପଥର, ଧୁମାଭଟା, ଡୁଙ୍ଗୁରିଗୁଡ଼ା, ହଟକଟ, କଲଛିକଛାର ଏବଂ ଜଲିଆ ଗ୍ରାମର ଶତାଧିକ ମହିଳା ଏକଜୁଟ ହୋଇଥିଲେ । ହାତରେ ଗରା, ମାଠିଆ ଓ ବାଲଟି ଧରି ନାଗଫେଣା ଗ୍ରାମରୁ ଏକ ବିଶାଳ ପଦଯାତ୍ରା ବାହାରିଥିଲା। ମହିଳାମାନେ ପ୍ରଚଣ୍ଡ ଖରାକୁ ଭ୍ରୂକ୍ଷେପ ନକରି ଦୀର୍ଘ ୨୦ କିଲୋମିଟର ଚାଲି ଚାଲି ଆସି ବେଲପଡ଼ା ବ୍ଲକ କାର୍ଯ୍ୟାଳୟରେ ପହଞ୍ଚିଥିଲେ ।
ବ୍ଲକ କାର୍ଯ୍ୟାଳୟ ସମ୍ମୁଖରେ ପହଞ୍ଚିବା ପରେ ଆନ୍ଦୋଳନକାରୀମାନେ ପ୍ରଶାସନ ବିରୋଧରେ ଜୋରଦାର ବିକ୍ଷୋଭ ପ୍ରଦର୍ଶନ କରିଥିଲେ । ଉତ୍ତ୍ୟକ୍ତ ମହିଳାମାନେ ସେଠାରେ ଗରା ଓ ମାଠିଆ ଗୁଡ଼ିକୁ ଭାଙ୍ଗି ନିଜର ଆକ୍ରୋଶ ପ୍ରକାଶ କରିବା ସହ ବ୍ଲକ କାର୍ଯ୍ୟାଳୟ ଭିତରକୁ ଧସେଇ ପଶିଥିଲେ । ଅଞ୍ଚଳରେ ତୁରନ୍ତ ପାନୀୟ ଜଳ ସମସ୍ୟାର ସ୍ଥାୟୀ ସମାଧାନ କରିବାକୁ ଦାବି କରି ସେମାନେ ଗୋଷ୍ଠୀ ଉନ୍ନୟନ ଅଧିକାରୀ (BDO)ଙ୍କୁ ଏକ ଦାବିପତ୍ର ପ୍ରଦାନ କରିଛନ୍ତି।
ଏହି ଆନ୍ଦୋଳନ କୋସଲ ରାଜ୍ୟ ମୁକ୍ତି ମୋର୍ଚ୍ଚାର ରାଜ୍ୟ ସାଧାରଣ ସମ୍ପାଦକ ଜନାର୍ଦନ ସିଂଙ୍କ ନେତୃତ୍ୱରେ ଅନୁଷ୍ଠିତ ହୋଇଥିଲା. ଏଥିରେ ନାରୀ ନେତ୍ରୀ ଚନ୍ଦ୍ରକାନ୍ତି ସେଠ, ରେଶେଶ୍ୱରୀ ଧରୁଆ, ଜିତୁ ନାଏକ, ଜୁଗଲ କିଶୋର ମେହେର, ରାମ ପ୍ରଧାନ, ତୁଷ ବୁଡ଼େକ, ସମ୍ପଦ ଦଣ୍ଡସେନା, ଲୋକେଶ ଭୋଇ, ଜୟ ଗୋପାଳ ରାଉତ, ପ୍ରମୋଦ ନାଗ, ସିପୁନ ଖମାରୀଙ୍କ ସମେତ ସ୍ଥାନୀୟ ଅଞ୍ଚଳର ଶତାଧିକ ମହିଳା ଓ ପୁରୁଷ ସାମିଲ ହୋଇ ପ୍ରଶାସନଠାରୁ ତୁରନ୍ତ ପଦକ୍ଷେପ ଦାବି କରିଛନ୍ତି।
