କେନ୍ଦୁଝର,୨୮।୪ (ନରେଶ ଚନ୍ଦ୍ର ପଟ୍ଟନାୟକ) : ଉତ୍କଳ ଗୌରବ ମଧୁସୂଦନ ଦାସଙ୍କ ଜୟନ୍ତୀ ଅବସରରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କେନ୍ଦୁଝର ଜିଲା ଯୋଡ଼ା ବ୍ଲକ ଉଚ୍ଚବାଲି ଠାରେ ୧୬୪୭ କୋଟି ଟଙ୍କା ବ୍ୟୟରେ ନିର୍ମିତ ହେବାକୁ ଥିବା ୪୨୦/୨୨୦ କେଭି ଗ୍ରୀଡ ସବଷ୍ଟେଶନର ଭିତ୍ତିପ୍ରସ୍ତର ସ୍ଥାପନ କରିଛନ୍ତି । ଏହି ଅବସରରେ ସେଠାରେ ସବୁ ପ୍ରସ୍ତୁତି ହୋଇଥିଲା। ମୁଖ୍ୟମନ୍ତ୍ରୀ ଉପମୁଖ୍ୟମନ୍ତ୍ରୀଙ୍କ ସହିତ ହେଲିକପ୍ଟରରେ ଓହ୍ଲାଇଥିଲେ। ଓହ୍ଲାଇଲା ବେଳେ ପ୍ରବଳ ଧୂଳି ଉଡ଼ିଥିଲା। ପ୍ରବଳ ଖରାରେ ତାଙ୍କୁ ଦେଖିବାକୁ ଅପେକ୍ଷା କରିଥିବା ଲୋକେ ଓ ସ୍ବାଗତ ସମ୍ବର୍ଦ୍ଧନା କରିବାକୁ ଠିଆ ହୋଇଥିବା ଚମ୍ପୁଆ ବିଧାୟକ ସନାତନ ମହାକୁଡ଼ଙ୍କ ସମେତ ଅନ୍ୟ ନେତା ଓ ଅଧିକାରୀମାନେ ହଠାତ୍ ଅଦିନିଆ ଧୂଳି ଝଡରେ ବୁଡି ଯାଇଥିଲେ। ଏହି ଭିଡିଓ ସାମାଜିକ ଗଣମାଧ୍ୟମରେ ଭାଇରାଲ ହେଉଛି। ତେବେ ମୁଖ୍ୟମନ୍ତ୍ରୀଙ୍କ ଗ୍ରସ୍ତ ବେଳେ ଏଭଳି ଅଦିନିଆ ଧୂଳି ଝଡ ଖଣି ଅଞ୍ଚଳର ବିକାଶ ଧାରାର ମୁଖା ଖୋଲି ଦେଇଛି ବୋଲି ଅନେକ ମତ ବ୍ୟକ୍ତ କରୁଛନ୍ତି। ତେବେ ଧୂଳି ଧୂଆଁ ପ୍ରଦୂଷଣ ନେଇ ଯଦିଓ ସଭାରେ କିଛି କହି ନ ଥିଲେ ତେବେ ସେଥିରୁ ଲୋକଙ୍କୁ ସୁରକ୍ଷା ପାଇଁ ମୁଖ୍ୟମନ୍ତ୍ରୀ ଫେରି କ’ଣ ପଦକ୍ଷେପ ନେବେ ସେନେଇ ସମସ୍ତେ ଅପେକ୍ଷା କରିଛନ୍ତି।
