ପାଟନା,୧୮।୧୧: ବିହାର ମୁଖ୍ୟମନ୍ତ୍ରୀ ନୀତୀଶ କୁମାର ନିଜ ମନ୍ତ୍ରୀ ମଣ୍ଡଳରେ ଡାକ୍ତର ମେୱାଲାଲ ଚୌଧୁରୀଙ୍କୁ ମନ୍ତ୍ରୀ ପଦ ଦେଇଛନ୍ତି। ସହକାରୀ ପ୍ରଫେସର ନିଯୁକ୍ତିରେ ମଓ୍ବୋଲାଲଙ୍କ ନାଁରେ ଘୋଟାଲା ଅଭିଯୋଗ ହୋଇଥିଲା। ସେ ଜାମିନରେ ଆସି ନିର୍ବାଚନ ଲଢୁଥିଲେ। ନୀତୀଶ କୁମାର ତାଙ୍କୁ କେବଳ ମନ୍ତ୍ରୀ କରିନାହାଁନ୍ତି, ବରଂ ଶିକ୍ଷା ମନ୍ତ୍ରଣାଳୟର ଗୁରୁତ୍ୱପୂର୍ଣ୍ଣ ଦାୟିତ୍ୱ ଦେଇଛନ୍ତି। ରାଷ୍ଟ୍ରିୟ ଜନତା ଦଳ (ଆରଜେଡି) ଏହାକୁ ନେଇ ନୀତୀଶଙ୍କୁ କ୍ରମାଗତ ଭାବେ ଟାର୍ଗେଟ କରୁଛି। ବୁଧବାର ତେଜସ୍ବୀ ଯାଦବ ଏହା ବିଷୟରେ ଏକ ଟୁଇଟ କରିଛନ୍ତି ଯେଉଁଥିରେ ସେ ଦୁର୍ନୀତିଗ୍ରସ୍ତଙ୍କୁ ପୁରସ୍କାର ଦେବା କଥା କହିଛନ୍ତି। ସେ ଟୁଇଟ୍ରେ ଲେଖିଛନ୍ତି, ମୁଖ୍ୟମନ୍ତ୍ରୀ ନୀତୀଶ କୁମାର ସହକାରୀ ପ୍ରଫେସର ନିଯୁକ୍ତ ଏବଂ ଭବନ ନିର୍ମାଣ କାର୍ଯ୍ୟରେ ଦୁର୍ନୀତି ଅଭିଯୋଗ ହୋଇଥିବା ମେୱାଲାଲ ଚୌଧୁରୀଙ୍କୁ ଶିକ୍ଷା ମନ୍ତ୍ରୀ ଭାବରେ ନିଯୁକ୍ତ କରିଛନ୍ତି। ତାଙ୍କ ନାଁରେ ଆଇପିସି ୪୦୯,୪୨୦,୪୬୭, ୪୬୮,୪୭୧ ଏବଂ ୧୨୦ବି ଧାରାରେ ଅଭିଯୋଗ ହୋଇଛି। ମଓ୍ବୋଲାଲଙ୍କ ଶିକ୍ଷା ମନ୍ତ୍ରୀ କରାଯାଇ ଆହୁରି ଦୁର୍ନୀତି ପାଇଁ ରାସ୍ତା ସଫା କରିଛନ୍ତି। ସୂଚନାଯୋଗ୍ୟ ଯେ ତାରାପୁରରୁ ନବ ନିର୍ବାଚିତ ଜେଡିୟୁ ବିଧାୟକ ଡାକ୍ତର ମଓ୍ବୋଲାଲ ଚୌଧୁରୀ ପ୍ରଥମ ଥର ପାଇଁ କ୍ୟାବିନେଟରେ ସ୍ଥାନ ପାଇଛନ୍ତି। ସେ ରାଜନୀତିରେ ଯୋଗଦେବା ପୂର୍ବରୁ ୨୦୧୫ ପର୍ଯ୍ୟନ୍ତ ଭାଗଲପୁର କୃଷି ବିଶ୍ୱବିଦ୍ୟାଳୟର କୁଳପତି ଥିଲେ। ୨୦୧୫ରେ ଅବସର ନେବା ପରେ ସେ ରାଜନୀତିରେ ପ୍ରବେଶ କରିଥିଲେ। ଏହା ପରେ ସେ ଜେଡିୟୁରୁ ଟିକେଟ ନେଇ ତାରାପୁରରୁ ପ୍ରତିଦ୍ୱନ୍ଦ୍ୱିତା କରି ଜିତିଥିଲେ। କିନ୍ତୁ ନିର୍ବାଚନରେ ଜିତିବା ପରେ ଚୌଧୁରୀଙ୍କ ନାଁରେ ନିଯୁକ୍ତି ସ୍କାମ ଅଭିଯୋଗ କରାଯାଇଥିଲା। ୨୦୧୭ ମସିହାରେ ସାବୋର ପୋଲିସ ଷ୍ଟେସନରେ କୃଷି ବିଶ୍ୱବିଦ୍ୟାଳୟରେ ନିଯୁକ୍ତି ସ୍କାମ ମାମଲା ରୁଜୁ ହୋଇଥିଲା। ଏହି ମାମଲାରେ ବିଧାୟକ କୋର୍ଟରୁ ମଧ୍ୟବର୍ତ୍ତୀକାଳୀନ ଜାମିନ ନେଇଥିଲେ।
