ବାଲେଶ୍ୱର ଅଫିସ, ୨୭ା୪ – ଦକ୍ଷିଣ ପୂର୍ବ ରେଳପଥ ଖଡ଼ଗପୁର ମଣ୍ଡଳ ଡିଆର୍ଏମ୍ ମନୋରଞ୍ଜନ ପ୍ରଧାନ ମଙ୍ଗଳବାର ବାଲେଶ୍ୱର ଗସ୍ତରେ ଆସି ରେଳଷ୍ଟେଶନର ମଡ଼େଲ ବିଲ୍ଡିଂ ନିର୍ମାଣ କାର୍ଯ୍ୟ ନିରୀକ୍ଷଣ କରିଛନ୍ତି। ଏଥିସହ ନୀଳଗିରିକୁ ଯାତ୍ରୀବାହୀ ଟ୍ରେନ ଚଳାଚଳ କାର୍ଯ୍ୟ ତ୍ୱରାନ୍ବିତ ପାଇଁ ଉଚ୍ଚପଦସ୍ଥ ଅଧିକାରୀଙ୍କ ସହିତ ଆଲୋଚନା କରିଛନ୍ତି। ନୀଳଗିରି ଗୋପୀନାଥପୁରରେ ଆସନ୍ତା ସପ୍ତାହରେ ନୂତନ ପ୍ଲାଟଫର୍ମ ନିର୍ମାଣ ଓ ଅତିଶୀଘ୍ର ଯାତ୍ରୀବାହୀ ଟ୍ରେନ ଚଳାଚଳ ସମ୍ପର୍କରେ ଡିଆରଏମ୍ ସୂଚନା ଦେଇଛନ୍ତି।
ପ୍ରଧାନ ରେଲୱେର ସିନିଅର ଡିଭିଜିନାଲ ଇଞ୍ଜିନିୟର, ଡିଭିଜିନାଲ ଇଞ୍ଜିନିୟର, ସିନିଅର ଡିଭିଜିନାଲ ସିକ୍ୟୁରିଟି କମିଶନର ଏବଂ ସିନିଅର ଡିଭିଜିନାଲ କମର୍ସିଆଲ ମ୍ୟାନେଜରଙ୍କ ସହ ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀଙ୍କ ସହ କାର୍ଯ୍ୟାଳୟରେ ଆଲୋଚନା କରିଛନ୍ତି। ବାଲେଶ୍ୱର ରେଳଷ୍ଟେଶନର ରୂପରେଖ ପରିବର୍ତ୍ତନ ହୋଇ ଆଗାମୀ ଦିନରେ ମଡ଼େଲ ଷ୍ଟେଶନରେ ପରିଣତ ହେବାକୁ ଯାଉଛି। ପୂର୍ବରୁ ମଡେଲ ଷ୍ଟେଶନ ପାଇଁ ଶିଳାନ୍ୟାସ ଶେଷ ହୋଇଥିବା ବେଳେ କାର୍ଯ୍ୟର ଅଗ୍ରଗତି ସମ୍ପର୍କରେ ଆଲୋଚନା ହୋଇଥିଲା। ଏଥିସହିତ ପ୍ରସ୍ତାବିତ ମଡ଼େଲ ଷ୍ଟେଶନ ନିର୍ମାଣ ପାଇଁ ଭିତ୍ତିଭୂମି ଓ ଜବରଦଖଲ ଉଚ୍ଛେଦ ସମ୍ପର୍କରେ ଆଲୋଚନା ହୋଇଥିଲା। ଆଲୋଚନା ପରେ ଡିଆର୍ଏମ୍ ଓ ତାଙ୍କ ସହ ଆସିଥିବା ରେଳ ବିଭାଗ ଅଧିକାରୀମାନେ ନୀଳଗିରି ଗସ୍ତ କରିଥିଲେ। ନୀଳଗିରିକୁ ଯାତ୍ରୀବାହୀ ଟ୍ରେନ ଚଳାଚଳ ନେଇ ଷ୍ଟେଶନବିଲଡିଂ ଓ ରହଣି ସମ୍ପର୍କରେ ସ୍ଥିତି ଅନୁଧ୍ୟାନ କରିଥିଲେ। ଏନେଇ ଡିଆର୍ଏମ୍ ପ୍ରଧାନ କହିଛନ୍ତି, ବାଲେଶ୍ୱର ରେଳଷ୍ଟେଶନକୁ ଆଧୁନିକୀକରଣ କରାଯିବା ପାଇଁ କାର୍ଯ୍ୟ ଆରମ୍ଭ ହୋଇଛି। ରେଳଷ୍ଟେଶନର ପଶ୍ଚିମପଟେ ନୂତନ ଗୃହ ଆରମ୍ଭ ହେବା ସହ ଜବରଦଖଲ ଉଚ୍ଛେଦ ପାଇଁ ଜିଲାପାଳଙ୍କ ସହ ଆଲୋଚନା କରିଛି। ଅନ୍ୟପଟେ ନୀଳଗିରିକୁ ରେଳ ଚଳାଚଳ ପାଇଁ ଆବଶ୍ୟକ ଭିତ୍ତିଭୂମି ଯାଞ୍ଚ କରାଯାଉଛି। ବିଦ୍ୟୁତ୍ ସଂଯୋଗୀକରଣ ଥିବା ବେଳେ ରେଳଲାଇନ୍ର ସୁଦୃଢ଼ ଏବଂ ପ୍ଲାଟଫର୍ମ ନିର୍ମାଣ ପାଇଁ ସ୍ଥାନ ସ୍ଥିର ହୋଇସାରିଛି।
