ପ୍ୟାରିସ୍,୧।୪: ରୋମ୍ ଜଳୁଥିବାବେଳେ ସମ୍ରାଟ ନିରୋ ବଂଶୀ ବାଦନ କରୁଥିଲେ। ବିପତ୍ତି ମାଡ଼ିଆସିଲେ ମୁରବୀଙ୍କ ଦାୟିତ୍ୱହୀନତାକୁ ୬୪ ଖ୍ରୀଷ୍ଟାବ୍ଦର ‘ଗ୍ରେଟ୍ ଫାୟାର୍ ଅଫ୍ ରୋମ୍’ ସହ ଏଭଳି ଭାବେ ତୁଳନା କରାଯାଏ, ଯାହାକି ସମ୍ପ୍ରତି ଫ୍ରାନ୍ସ ରାଷ୍ଟ୍ରପତି ଇମାନ୍ବେଲ ମାକ୍ରଁଙ୍କ କ୍ଷେତ୍ରରେ ପ୍ରଯୁଜ୍ୟ। ଫ୍ରାନ୍ସ ସରକାରଙ୍କ ପେନସନ ସଂସ୍କାର ପ୍ରତିବାଦରେ କର୍ମଚାରୀମାନେ ରାଜଧାନୀ ପ୍ୟାରିସ୍ ସମେତ ଅନ୍ୟ ସହରଗୁଡ଼ିକରେ ବିକ୍ଷୋଭ ପ୍ରଦର୍ଶନ କରୁଛନ୍ତି। କାରଣ ସରକାରୀ କର୍ମଚାରୀଙ୍କ ଅବସର ବୟସ ୬୪କୁ ବୃଦ୍ଧି କରାଯାଇଛି। ସେହିପରି ୨୦୨୭ଠାରୁ ଅଧିକାଂଶ କର୍ମଚାରୀଙ୍କୁ ପୂରା ପେନ୍ସନ ପାଇବାକୁ ହେଲେ ୪୩ ବର୍ଷ ପର୍ଯ୍ୟନ୍ତ ସାମାଜିକ ସୁରକ୍ଷା ଅବଦାନ କରିବାକୁ ପଡ଼ିବ। ପୂର୍ବରୁ ଏହା ୪୨ ବର୍ଷ ଥିଲା। ପାର୍ଲାମେଣ୍ଟରେ ପାରିତ ଏହି ବିବାଦୀୟ ଆଇନକୁ ବିରୋଧକରି ରାସ୍ତାକୁ ଓହ୍ଲାଇଥିବା କର୍ମଚାରୀଙ୍କ ଉପରେ ପୋଲିସ ଲୁହବୁହା ବାଷ୍ପ ଓ ବଳ ପ୍ରୟୋଗ କରୁଛି। ଦେଶର ବିଭିନ୍ନ ଭାଗକୁ ହିଂସାମତ୍କ ଆନ୍ଦୋଳନର ନିଅଁା ବ୍ୟାପିଥିବାବେଳେ ରାଷ୍ଟ୍ରପତି ମାକ୍ରଁ ଚାଇନା ଗସ୍ତରେ ବାହାରିଛନ୍ତି। ସେ ଏପ୍ରିଲ ୫ରୁ ୮ ପର୍ଯ୍ୟନ୍ତ ଚାଇନା ରାଜଧାନୀ ବେଜିଂ ଓ ଗୁଆଙ୍ଗ୍ଝୌ ସହରରେ ଅବସ୍ଥାନ କରିବେ। ଏହି କୂଟନୈତିକ ଗସ୍ତ ବେଳେ ମାକ୍ରଁ ଚାଇନା ରାଷ୍ଟ୍ରପତି ଶି ଜିନ୍ପିଙ୍ଗ୍ଙ୍କୁ ଭେଟି ୟୁକ୍ରେନ୍ ଯୁଦ୍ଧ ସମ୍ପର୍କରେ ଆଲୋଚନା କରିବେ। ରୁଷିଆ ପକ୍ଷରୁ ଚାଲିଥିବା ଆକ୍ରମଣ ବନ୍ଦ ପାଇଁ ସେ ଜିନ୍ପିଙ୍ଗ୍ଙ୍କୁ ସହାୟତା ମାଗିବେ ବୋଲି ଜଣାପଡ଼ିଛି।
ସ୍ମରଣଯୋଗ୍ୟ ଯେ ବ୍ରିଟେନ କିଙ୍ଗ୍ ଚାଲର୍ସ ୩ୟ ଫ୍ରାନ୍ସକୁ ନିଜ ପ୍ରଥମ ସରକାରୀ ଗସ୍ତରେ ଯିବାର ଥିଲା। ଆନ୍ଦୋଳନକାରୀଙ୍କ ଭଙ୍ଗାରୁଜା, ଜଳାପୋଡ଼ାକୁ ନେଇ ଅରାଜକତା ଲାଗିରହିଥିବାରୁ ବିଶ୍ୱ ଗଣମାଧ୍ୟମ ଏହି ଗସ୍ତ ବାତିଲ କରିବାକୁ ମାକ୍ରଁଙ୍କୁ ବାଧ୍ୟ କରିଛି। ବିଶ୍ଳେଷକଙ୍କ ମତରେ ବେଲାରୁଷରେ ଆଣବିକ ଅସ୍ତ୍ର ମୁତୟନ ନେଇ ରୁଷିଆ ରାଷ୍ଟ୍ରପତି ଭ୍ଲାଡିମିର ପୁଟିନ୍ଙ୍କ ନିଷ୍ପତ୍ତି ମସ୍କୋଠାରୁ ବେଜିଂକୁ ଦୂରେଇ ରଖିବା ଲାଗି ଚାପ ସୃଷ୍ଟି କରିବାକୁ ଫ୍ରାନ୍ସ ପାଇଁ ଏକ ସୁଯୋଗ ହୋଇପାରେ। ଫ୍ରାନ୍ସ କୂଟନୀତିଜ୍ଞମାନଙ୍କ ମତରେ ଚାଇନା ନିଜ ସୁବିଧା ଅନୁସାରେ କେବଳ ସନ୍ତୁଳନ ରକ୍ଷା କରି ଖେଳୁଛି। ଏଭଳି ସମୟରେ ମାକ୍ରଁ ନିଜ ଘରର ନିଅଁା ନ ଲିଭାଇ ଅନ୍ୟ ରାଷ୍ଟ୍ର ପାଇଁ ଟାଣିଓଟାରି ହେବା କେତେ ଯଥାର୍ଥ ବୋଲି ପ୍ରଶ୍ନ ଉଠିଲାଣି।
