ଭଞ୍ଜନଗର,୨୯/୪(ବାବୁଲା ପ୍ରଧାନ):ରାଜ୍ୟ ସରକାର ବିଦ୍ୟାଳୟଗୁଡ଼ିକର ଉନ୍ନତ ପାଇଁ ପୁରାତନ ଛାତ୍ରୀଛାତ୍ରଙ୍କ ସହଯୋଗ ଲୋଡ଼ିଥାଆନ୍ତି। ଛାତ୍ରୀଛାତ୍ରମାନେ ଯେତିକି ସହଯୋଗ କରନ୍ତି ସେଥିରେ ରାଜ୍ୟ ସରକାର ଦୁଇଗୁଣା ଆର୍ଥିକ ସହାୟତା ଦିଅନ୍ତି। ଉକ୍ତ ଅର୍ଥ ମିଶି ଯେଉଁ ଲକ୍ଷ୍ୟରେ ଅର୍ଥ ଦାନ କରାଯାଇଥାଏ ସେଥିରେ ବିକାଶ କରାଯାଏ। ୨୦୧୯-୨୦୨୦ ଶିକ୍ଷାବର୍ଷରେ ମୋ ସ୍କୁଲ ଅଭିଯାନ ଆରମ୍ଭ ହୋଇଥିଲା। ଉକ୍ତ ଯୋଜନାରେ ପୁରାତନ ଛାତ୍ରୀଛାତ୍ର ଅର୍ଥ ଦାନ କରୁଥିଲେ।
ଇତିମଧ୍ୟରେ ରାଜ୍ୟ ସରକାର ବଦଳିବା ପରେ ଯୋଜନାର ନାମ ମଧ୍ୟ ବଦଳି ଯାଇଛି। ମୋ ସ୍କୁଲ ଅଭିଯାନ ଯୋଜନା ୨୦୨୫ ମସିହାରୁ ପଞ୍ଚଶଖା ଶିକ୍ଷା ସେତୁ ଯୋଜନା ଭାବେ ପରିଚିତ। ଅନ୍ୟପକ୍ଷରେ କେନ୍ଦ୍ର ସରକାରଙ୍କ ଶିକ୍ଷା ବିଭାଗ ପକ୍ଷରୁ ୨୦୧୬ ମସିହାରେ ବିଦ୍ୟାଞ୍ଜଳି ଯୋଜନା କେନ୍ଦ୍ରୀୟ ବିଦ୍ୟାଳୟ ଗୁଡିକରେ
ଆରମ୍ଭ ହୋଇଥିଲା। ଏହାର ମୂଳଲକ୍ଷ୍ୟ ହେଲା ସମାଜ-ସ୍କୁଲ ମିଶିକରି ଶିକ୍ଷାକୁ ଆଗକୁ ନେବା। କେନ୍ଦ୍ରୀୟ ବିଦ୍ୟାଳୟ ପୂରାତନ ଛାତ୍ରୀଛାତ୍ର, ଅଭିଭାବକ, ସ୍ବେଚ୍ଛାସେବୀ, ସାଧାରଣ ଲୋକ ଚାହିଁଲେ ବିଦ୍ୟାଳୟକୁ ପୁସ୍ତକ, ଖେଳନା ଉପକରଣ, କମ୍ପ୍ୟୁଟର ସମେତ ଅନ୍ୟାନ୍ୟ ଜିନିଷ ଦାନ କରିପାରିବେ। ଏଥିସହ ଅଧ୍ୟକ୍ଷଙ୍କ ଅନୁମତି କ୍ରମେ ଯଦି କୌଣସି ଶିକ୍ଷିତ ବ୍ୟକ୍ତି, ଯୋଗ ଶିକ୍ଷକ ଶିକ୍ଷାଦାନ କରିବାକୁ ଚାହିଁବେ ତେବେ ମାଗଣାରେ ଶିକ୍ଷାଦାନ କରିପାରିବେ।
କେନ୍ଦ୍ରୀୟ ବିଦ୍ୟାଳୟର ଉନ୍ନତିରେ ଅଭିଭାବକଙ୍କ ଭୂମିକା ଗୁରୁତ୍ୱପୂର୍ଣ୍ଣ ରହିଛି। ଏହିଭଳି ପରିସ୍ଥିତିରେ ୨୦୨୧ ରେ ବିଦ୍ୟାଞ୍ଜଳି ୨:୦ ଯୋଜନାକୁ ନବୀକରଣ କରାଯାଇଥିଲା । ଉକ୍ତ ଯୋଜନାକୁ ସଫଳତାର ସହ କାର୍ଯ୍ୟକାରୀ କରିବା ପାଇଁ ଭଞ୍ଜନଗର କେନ୍ଦ୍ରୀୟ ବିଦ୍ୟାଳୟ ଅଧକ୍ଷ ପ୍ରଦୀପ କମାନୁ ଚେଷ୍ଟିତ। ତେଣୁ ବିଦ୍ୟାଳୟର ଉନ୍ନତିରେ ଅଭିଭାବକ ମାନେ ସହଯୋଗର ହାତ ବଢାଇଛନ୍ତି। ଜୈନକ ଅଭିଭାବିକା ବୁଧବାର ବିଦ୍ୟାଳୟକୁ ଆଡମିଶନ ରେଜିଷ୍ଟର ପ୍ରଦାନ କରିଛନ୍ତି। ଆଉ କିଛି ଅଭିଭାବକ ବିଦ୍ୟାଳୟର ସୌନ୍ଦର୍ଯ୍ୟକରଣ, କ୍ଲାସରୁମ ନବୀକରଣ
ସମେତ ଅନ୍ୟାନ୍ୟ ଉନ୍ନତିରେ ସହଯୋଗର ହାତ ବଢାଇଛନ୍ତି। ଯାହାକି ଏକ ଭଲ ପରମ୍ପରା ସୃଷ୍ଟି ସହ ବିଦ୍ୟାଳୟ ଆଗକୁ ବଢ଼ିବାରେ ସହାୟ ହୋଇପାରୁଛି। ତେଣୁ ବିଦ୍ୟାଞ୍ଜଳି ଯୋଜନାରେ ଯେଉଁ ଅଭିଭାବକ ଚାହିଁବେ ସହଯୋଗର ହାତ ବଢ଼ାଇ ପାରିବେ ବୋଲି ଅଧ୍ୟକ୍ଷ କମାନୁ କହିଛନ୍ତି।
Dharitri – Odisha’s No.1 Odia Daily
