ଚେନ୍ନାଇ, ୨୮।୧୨(ପି.ଟି.): କେନ୍ଦ୍ରର କୃଷି ଆଇନକୁ ବିରୋଧ କରି ଗୋଟିଏ ପରେ ଗୋଟିଏ ଦଳ ଏନ୍ଡିଏ ଛାଡ଼ୁଥିବାବେଳେ ତାମିଲନାଡ଼ୁର ଶାସକ ଦଳ ଏଆଇଏଡିଏମ୍କେ ଆଗାମୀ ବିଧାନସଭା ନିର୍ବାଚନ ପାଇଁ ସହଯୋଗୀ ଦଳ ଭାଜପା ଆଗରେ ସର୍ତ୍ତ ରଖିଛି। ଆସନ୍ତାବର୍ଷ ହେବାକୁ ଥିବା ନିର୍ବାଚନ ପାଇଁ ରବିବାର ଏଆଇଏଡିଏମ୍କେ ପ୍ରଚାର ଆରମ୍ଭ କରିଛି। ଭାଜପାକୁ ଶକ୍ତ ବାର୍ତ୍ତା ଦେଇ ଏଆଇଏଡିଏମ୍କେ କହିଛି ମୁଖ୍ୟମନ୍ତ୍ରୀ ଇ. କେ. ପାଲାନିସ୍ବାମୀ ଆଗାମୀ ନିର୍ବାଚନରେ ମୁଖ୍ୟମନ୍ତ୍ରୀ ପ୍ରାର୍ଥୀ ହେବେ। ଦଳ ନିର୍ବାଚନ ଜିତିଲେ କ୍ଷମତା ଭାଗବଣ୍ଟା ହେବନାହିଁ।
ଏକ ସମାବେଶକୁ ଉଦ୍ବୋଧନ ଦେଇ ଏଆଇଏଡିଏମ୍କେ ଉପସଂଯୋଜକ ତଥା ରାଜ୍ୟ ସଭା ସଦସ୍ୟ ଏମ୍.କେ. ମୁନୁସାମି ଭାଜପାର ନାଁ ନ ନେଇ ମୁଖ୍ୟମନ୍ତ୍ରୀ ପ୍ରାର୍ଥତ୍ତ୍ୱ ଉପରେ ଏହାର ଆଭିମୁଖ୍ୟକୁ ସମାଲୋଚନା କରିଛନ୍ତି। ମେଣ୍ଟରେ ଏଆଇଏଡିଏମ୍କେ ବଡ଼ଭାଇ ହେବ। ଦଳ କାହା ସହ କ୍ଷମତା ଭାଗବଣ୍ଟା କରିବ ନାହିଁ। ସେଭଳି ଉଦ୍ଦେଶ୍ୟ ନେଇ ମେଣ୍ଟ କରିବାକୁ ଚାହୁଁଥିବା କୌଣସି ଜାତୀୟ ଦଳର ଆବଶ୍ୟକତା ନାହିଁ ବୋଲି ମୁନୁସାମି ସ୍ପଷ୍ଟ କରିଦେଇଛନ୍ତି। ଏନ୍ଡିଏର ମୁଖ୍ୟମନ୍ତ୍ରୀ ପ୍ରାର୍ଥୀ ସମ୍ପର୍କରେ ଭାଜପା ନିଷ୍ପତ୍ତି ନେବ ବୋଲି ଗୈରିକ ଦଳର ନେତାମାନେ କହିଆସୁଥିଲେ।
ଚେନ୍ନାଇର ରୋୟାପେଟ୍ଟାସ୍ଥିତ ଓ୍ବାଇଏମ୍ସିଏ ଗ୍ରାଉଣ୍ଡରେ ଉଦ୍ବୋଧନ ଦେଇ ଏଆଇଏଡିଏମ୍କେ ସଂଯୋଜକ ତଥା ଉପମୁଖ୍ୟମନ୍ତ୍ରୀ ଓ. ପନିରସେଲଭାମ ଏବଂ ଯୁଗ୍ମ ସଂଯୋଜକ ପାଲାନିସ୍ବାମୀ ଡିଏମ୍କେ ଏବଂ ଏହାର ଅଧ୍ୟକ୍ଷ ଏମ୍.କେ. ଷ୍ଟାଲିନ୍ଙ୍କୁ ଟାର୍ଗେଟ କରିଥିଲେ। ସରକାରଙ୍କ ସଫଳତାର ବାର୍ତ୍ତା ସମସ୍ତଙ୍କ ନିକଟରେ ପହଞ୍ଚାଇବାକୁ ପନିରସେଲ୍ଭାମ୍ ଦଳୀୟ କର୍ମୀମାନଙ୍କୁ ପରାମର୍ଶ ଦେଇଥିଲେ।
