ନୂଆଦିଲ୍ଲୀ,୧୯।୧୧:ଆଇସିସି ଚାମ୍ପିଅନ୍ସ ଟ୍ରଫି ୨୦୨୫ ପାକିସ୍ତାନ ଦ୍ୱାରା ଆୟୋଜିତ ହେବ। କିନ୍ତୁ ଏହି ଟୁର୍ନାମେଣ୍ଟ ବିଷୟରେ ଏପର୍ଯ୍ୟନ୍ତ କୌଣସି ସମାଧାନ ମିଳିନାହିଁ। ଭାରତୀୟ କ୍ରିକେଟ ଦଳ ପଡୋଶୀ ଦେଶ ଭ୍ରମଣ କରିବାକୁ ମନା କରିସାରିଛି। ଏଥି ସହିତ ପାକିସ୍ତାନ ମଧ୍ୟ ହାଇବ୍ରିଡ ମଡେଲରେ ଏହି ଟୁର୍ନାମେଣ୍ଟ କରିବାକୁ ଚାହୁଁନାହିଁ। ଏହି କାରଣରୁ ଆଇସିସି ଏପର୍ଯ୍ୟନ୍ତ କାର୍ଯ୍ୟସୂଚୀ ଘୋଷଣା କରି ନାହିଁ। ଏହି ଟୁର୍ନାମେଣ୍ଟ ଉପରେ ପାକିସ୍ତାନ କ୍ରିକେଟ ବୋର୍ଡ ବିବୃତ୍ତି ଜାରି ରଖିଛି। ଏସବୁ ମଧ୍ୟରେ ଅନ୍ତର୍ଜାତୀୟ କ୍ରିକେଟ ପରିଷଦ ଏକ ବଡ ପଦକ୍ଷେପ ନେଇଛି।
ଏକ ରିପୋର୍ଟ ଅନୁଯାୟୀ,ଆଇସିସି ଅଧିକାରୀମାନେ ଆସନ୍ତା ବର୍ଷ ଆଇସିସି ଚାମ୍ପିଅନ୍ସ ଟ୍ରଫି ପାଇଁ ହାଇବ୍ରିଡ ମଡେଲ ଦିଗରେ କାର୍ଯ୍ୟ କରିବାକୁ ପାକିସ୍ତାନ କ୍ରିକେଟ ବୋର୍ଡକୁ ଅନୁରୋଧ କରିବାକୁ ଚେଷ୍ଟା କରୁଛନ୍ତି। ଏହାର ଅର୍ଥ ଆଇସିସି ଅଧିକାରୀମାନେ ହାଇବ୍ରିଡ ମଡେଲରେ ଏହି ଟୁର୍ନାମେଣ୍ଟ କରିବାକୁ ରାଜି ହେବା ପାଇଁ ପିସିବିକୁ ମନାଇବା ପାଇଁ ଚେଷ୍ଟା କରୁଛନ୍ତି। ଏଥି ସହିତ ହାଇବ୍ରିଡ ମଡେଲ ଟୁର୍ନାମେଣ୍ଟ ପାଇଁ ସର୍ବୋତ୍ତମ ଉପାୟ ଏବଂ ଭାରତୀୟ କ୍ରିକେଟ ଦଳ ବିନା ଆଇସିସି ଟୁର୍ନାମେଣ୍ଟ କାହିଁକି ଆୟୋଜନ କରାଯାଇପାରିବ ନାହିଁ ତାହା ମଧ୍ୟ ଆଇସିସି ବ୍ୟାଖ୍ୟା କରୁଛି। ଏହା ବ୍ୟତୀତ ଆଇସିସି ଅଧିକାରୀମାନେ ମଧ୍ୟ ଭାରତ ବିରୋଧରେ କୌଣସି ବିବୃତ୍ତି ଦେବା ବନ୍ଦ କରିବାକୁ ଚେଷ୍ଟା କରୁଛନ୍ତି।
ଚଳିତ ମାସ ଆରମ୍ଭରେ ଆଇସିସି ପିସିବିକୁ ଲିଖିତ ଭାବରେ କହିଥିଲା ଯେ, ୨୦୨୫ ଆରମ୍ଭରେ ଅନୁଷ୍ଠିତ ହେବାକୁ ଥିବା ଚାମ୍ପିଅନ୍ସ ଟ୍ରଫିରେ ଭାଗ ନେବାକୁ ଭାରତ ପାକିସ୍ତାନ ଯାତ୍ରା କରିବ ନାହିଁ। ସେହି ଦିନଠାରୁ ଏହି ବିବାଦ ଜାରି ରହିଛି। ରିପୋର୍ଟ ଅନୁଯାୟୀ, ଯଦି ହାଇବ୍ରିଡ ମଡେଲରେ ଚାମ୍ପିଅନ୍ସ ଟ୍ରଫି ଖେଳାଯାଏ, ତେବେ ଟିମ ଇଣ୍ଡିଆର ସମସ୍ତ ମ୍ୟାଚ ସଂଯୁକ୍ତ ଆରବ ଏମିରେଟ୍ସ (ୟୁଏଇ)ରେ ଅନୁଷ୍ଠିତ ହେବ। ଅନ୍ୟପକ୍ଷରେ ପାକିସ୍ତାନ ବୋର୍ଡ ଚାହୁଁଛି ଯେ, ଭାରତ ପାକିସ୍ତାନ ଗସ୍ତ କରିବ କାରଣ ୨୦୨୩ରେ ଆଇସିସି ଦିନିକିଆ ବିଶ୍ୱକପ ସମୟରେ ପକିସ୍ତାନ ଦଳ ଭାରତ ଯାଇଥିଲା। ଏହାପୂର୍ବରୁ ପାକିସ୍ତାନ ଏସୀୟ ଟ୍ରଫି ଆୟୋଜନ କରିଥିଲା, କିନ୍ତୁ ଏହା ହାଇବ୍ରିଡ ମଡେଲରେ ଆୟୋଜିତ ହୋଇଥିଲା ଯେଉଁଥିରେ ଭାରତ ଶ୍ରୀଲଙ୍କାରେ ମ୍ୟାଚ ଖେଳିଥିଲା।
