ଇସଲାମାବାଦ,୧୫।୧୧ : ପାକିସ୍ତାନ ପ୍ରଧାନମନ୍ତ୍ରୀ ଶହେବାଜ ସରିଫ କରୋନା ସଂକ୍ରମିତ ହୋଇଥିବା ଜଣାପଡିଛି। ଏହାକୁ ପାକିସ୍ତାନର ସୂଚନା ମନ୍ତ୍ରୀ ମରିୟମ ଔରଙ୍ଗଜେବ ଟୁଇଟ କରି ସୂଚନା ଦେଇଛନ୍ତି। ସେ କହିଛନ୍ତି, ଗତ ଦୁଇ ଦିନ ଧରି ପ୍ରଧାନମନ୍ତ୍ରୀ ଅସୁସ୍ଥ ଅନୁଭବ କରୁଥିଲେ। ଡାକ୍ତରଙ୍କ ପରାମର୍ଶ କ୍ରମେ ତାଙ୍କ ନମୁନାର କରୋନା ପରୀକ୍ଷା କରାଯାଇଥିଲା, ଯାହା ପରେ ପଜିଟିଭ୍ ଆସିଥିଲା।
ଏହାକୁ ମିଶାଇ ଶହେବାଜ ସରିଫ ତୃତୀୟ ଥର ପାଇଁ କରୋନାରେ ସଂକ୍ରମିତ ହୋଇଛନ୍ତି। ଏହାପୂର୍ବରୁ, ଚଳିତ ବର୍ଷ ଜାନୁଆରୀ ଏବଂ ଜୁନ ୨୦୨୦ରେ ମଧ୍ୟ ସେ କରୋନାରେ ଆକ୍ରାନ୍ତ ହୋଇଥିଲେ।
ଗୋଟିଏ ଦିନ ପୂର୍ବରୁ ସରିଫ ଲଣ୍ଡନ ଗସ୍ତ ଶେଷ କରିବା ପରେ ପାକିସ୍ତାନ ଫେରିଥିଲେ। ସରିଫଙ୍କ ପରିବାର ସୂତ୍ର ଅନୁଯାୟୀ, ପ୍ରଧାନମନ୍ତ୍ରୀ ଶନିବାର ବିମାନବନ୍ଦର ଯିବା ପୂର୍ବରୁ ଜ୍ୱରରେ ଆକ୍ରାନ୍ତ ହୋଇଥିଲେ ଏବଂ ଏହା ପରେ ସେ ରବିବାରକୁ ଗସ୍ତକୁ ସ୍ଥଗିତ ରଖିଥିଲେ।
