କଶ୍ମୀର,୭।୬: ପହଲଗାମ ଆତଙ୍କବାଦୀ ଆକ୍ରମଣ ପରେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଶୁକ୍ରବାର ପ୍ରଥମ ଥର ପାଇଁ ଜମ୍ମୁ ଏବଂ କଶ୍ମୀର ଗସ୍ତ କରିଥିଲେ। ଏହି ସମୟରେ ସେ ବିଶ୍ୱର ସବୁଠାରୁ ଉଚ୍ଚ ରେଲଓ୍ବେ ପୋଲ ‘ଚେନାବ ସେତୁ’ ଉଦଘାଟନ କରି ଦେଶକୁ ସମର୍ପିତ କରିଥିଲେ। ଏହି ଅବସରରେ ପ୍ରଧାନମନ୍ତ୍ରୀ ମୋଦି ହାତରେ ତ୍ରିରଙ୍ଗା ଧରି ଚେନାବ ସେତୁ ଉପରେ ଚାଲି ପାକିସ୍ତାନକୁ ଚକିତ କରିଥିଲେ। ପ୍ରଧାନମନ୍ତ୍ରୀ ମୋଦି ପାକିସ୍ତାନ ଉପରେ ଏକ କଠୋର ଆକ୍ରମଣ ଆରମ୍ଭ କରି କହିଛନ୍ତି ଯେ ଏହା ପହଲଗାମରେ ମାନବତା ଏବଂ କଶ୍ମୀରିୟତ (କାଶ୍ମୀରର ସାଂସ୍କୃତିକ ପରିଚୟ) ଉପରେ ଏକ ଅତ୍ୟନ୍ତ ନିନ୍ଦନୀୟ ଆକ୍ରମଣ କରିଛି। ପ୍ରଧାନମନ୍ତ୍ରୀଙ୍କ ଏହି କଠୋର ବୟାନ ପରେ, ପାକିସ୍ତାନରେ ପ୍ରବଳ ଅସନ୍ତୋଷ ଏବଂ କ୍ରୋଧ ଦେଖାଯାଉଛି।
ପ୍ରଧାନମନ୍ତ୍ରୀ ମୋଦି ଏହି ସମୟରେ କହିଥିଲେ ଯେ ପାକିସ୍ତାନ ଗରିବଙ୍କ ରୋଟୀ ଏବଂ ରୋଜଗାରର ମଧ୍ୟ ଶତ୍ରୁ। ସେ ଚେତାବନୀ ଦେଇଛନ୍ତି ଯେ ଯେଉଁମାନେ କଶ୍ମୀରର ବିକାଶକୁ ରୋକିବାକୁ ଚେଷ୍ଟା କରିବେ, ସେମାନଙ୍କୁ ପ୍ରଥମେ ମୋଦିଙ୍କୁ ସାମ୍ନା କରିବାକୁ ପଡିବ।” ପ୍ରଧାନମନ୍ତ୍ରୀ ମୋଦିଙ୍କ ଏହି ବୟାନ ଉପରେ ପ୍ରତିକ୍ରିୟା ଦେଇ ପାକିସ୍ତାନର ବୈଦେଶିକ ମନ୍ତ୍ରଣାଳୟ କହିଛି, “ପାକିସ୍ତାନ ଜମ୍ମୁ କଶ୍ମୀର ସମ୍ପର୍କରେ ଭାରତର ପ୍ରଧାନମନ୍ତ୍ରୀଙ୍କ ଦ୍ୱାରା ଦିଆଯାଇଥିବା ମିଥ୍ୟା ଏବଂ ଭ୍ରାମକ ବୟାନକୁ ସମ୍ପୂର୍ଣ୍ଣ ପ୍ରତ୍ୟାଖ୍ୟାନ କରୁଛି।”
ପାକିସ୍ତାନ ବୈଦେଶିକ ମନ୍ତ୍ରଣାଳୟ ଆହୁରି କହିଛି, “ଏପରି ବୟାନ ପ୍ରକୃତ ପ୍ରସଙ୍ଗରୁ ବିଶ୍ୱର ଧ୍ୟାନ ହଟାଇବା ପାଇଁ ଏକ ପ୍ରୟାସ, ବିଶେଷକରି ସେହି ଅଞ୍ଚଳରେ ଯେଉଁଠାରେ ଲୋକଙ୍କ ସହିତ ନିରନ୍ତର ଦୁର୍ବ୍ୟବହାର କରାଯାଉଛି। ଆମେ ଦୁଃଖିତ ଯେ ଭାରତ ପ୍ରଧାନମନ୍ତ୍ରୀ ପୁଣି ଥରେ କୌଣସି ପ୍ରମାଣ ବିନା ପହଲଗାମ ଆକ୍ରମଣ ପାଇଁ ପାକିସ୍ତାନକୁ ଦାୟୀ କରିଛନ୍ତି।”
ପାକିସ୍ତାନ ପୁଣି ଥରେ ଧମକ ଦେଇ କହିଛି, “ଜମ୍ମୁ କଶ୍ମୀର ଏକ ଆନ୍ତର୍ଜାତୀୟ ସ୍ତରରେ ବିବାଦିତ ଅଞ୍ଚଳ, ଯାହାର ଶେଷ ନିଷ୍ପତ୍ତି ଜାତିସଂଘର ନିଷ୍ପତ୍ତି ଏବଂ କଶ୍ମୀରୀ ଲୋକଙ୍କ ଇଚ୍ଛା ଅନୁଯାୟୀ ହେବା ଉଚିତ। କୌଣସି ଦାବି କିମ୍ବା ବିବୃତ୍ତି ଏହି ସତ୍ୟକୁ ବଦଳାଇ ପାରିବ ନାହିଁ।” ଭାରତ ଅଧିକୃତ କଶ୍ମୀର (IOJK)ରେ ବିକାଶର କଥା ମିଥ୍ୟା ମନେହୁଏ ଯେତେବେଳେ ସେଠାରେ ବିପୁଳ ପରିମାଣରେ ସୈନ୍ୟ ମୁତୟନ କରାଯାଉଛି, ଲୋକଙ୍କ ସୱାଧୀନତା ଛଡ଼ାଇ ନିଆଯାଇଛି, ବିନା କାରଣରେ ଗିରଫ କରାଯାଉଛି, ଯାହା ଅନ୍ତର୍ଜାତୀୟ ଆଇନର ଉଲ୍ଲଂଘନ।”
ପାକିସ୍ତାନ ବିଶ୍ୱର ବିଭିନ୍ନ ଦେଶ, ଜାତିସଂଘ ଏବଂ ମାନବାଧିକାର ସଂଗଠନଗୁଡ଼ିକୁ ସେଠାରେ ହେଉଥିବା ଅତ୍ୟାଚାର ପାଇଁ ଭାରତକୁ ଦାୟୀ କରିବାକୁ ଏବଂ କଶ୍ମୀରବାସୀଙ୍କୁ ଆତ୍ମର୍ନିଣ୍ଣୟର ଅଧିକାର ଅର୍ଥାତ ସେମାନଙ୍କର ଭବିଷ୍ୟତ ନିଜେ ନିଷ୍ପତ୍ତି ନେବାର ଅଧିକାର ପାଇବାକୁ ସୁନିଶ୍ଚିତ କରିବାକୁ ନିବେଦନ କରିଛି। ପାକିସ୍ତାନ ଆହୁରି କହିଛି, “ଆମେ ସର୍ବଦା କଶ୍ମୀର ଲୋକଙ୍କ ଅଧିକାର ଏବଂ ସମ୍ମାନ ପାଇଁ ସେମାନଙ୍କ ଲଢ଼େଇରେ ସେମାନଙ୍କ ସହିତ ଛିଡ଼ା ହେବୁ।”
