ସମ୍ବଲପୁର,୭ା୬(ପ୍ରମୋଦ ବହିଦାର):ସମ୍ବଲପୁର ଜିଲାରେ ଅତ୍ୟନ୍ତ ଅବ୍ୟବସ୍ଥା ମଧ୍ୟରେ ଚାଲିଛି ଧାନ ସଂଗ୍ରହ। ଧାନ ସଂଗ୍ରହ ପାଇଁ ଜିଲାରେ ପ୍ରଥମ ପର୍ଯ୍ୟାୟରେ ଧାର୍ଯ୍ୟ ହୋଇଥିବା ଲକ୍ଷ୍ୟ ପୂରଣ ଦ୍ୱାର ଦେଶରେ। ଫଳରେ ବର୍ତ୍ତମାନ ଘୋର ଅଭାବି ବିକ୍ରିର ଶିକାର ଚାଷୀଙ୍କୁ ବ୍ୟାପକ ହଟହଟା ହେବାକୁ ପଡ଼ିଛି। ଜିଲାରେ ବର୍ତ୍ତମାନ ପ୍ରାଥମିକ ଲକ୍ଷ୍ୟର ପ୍ରାୟ ୯୯.୮ ପ୍ରତିଶତ ଧାନ ସଂଗ୍ରହ ହୋଇ ସାରିଛି। ତେଣୁ ଚାଉଁରପୁରର ଚାଷୀମାନେ ଏଠାରେ ଥିବା ପ୍ରାଥମିକ କୃଷି ସମବାୟ ସମିତି(ପିଏସିଏସ)ରେ ଧାନ ସଂଗ୍ରହ ଲକ୍ଷ୍ୟକୁ ଅତିରିକ୍ତ ୧୦କୁଇଣ୍ଟାଲକୁ ବୃଦ୍ଧି କରିବାକୁ ଲିଖିତ ଦାବି କରିଛନ୍ତି। ସୂଚନାଯୋଗ୍ୟ ଯେ, ସମ୍ବଲପୁର ଜିଲାରେ ମୋଟ ୧୬୩୪୮ ଜଣ ପଞ୍ଜୀକୃତ ଚାଷୀଙ୍କ ଠାରୁ ପ୍ରାଥମିକ ପର୍ଯ୍ୟାୟରେ ୮ ଲକ୍ଷ ୭୩ ହଜାର ୧୭୦ କୁଇଣ୍ଟାଲ ଧାନ ସଂଗ୍ରହ ପାଇଁ ଲକ୍ଷ୍ୟ ଧାର୍ଯ୍ୟ ହୋଇଥିଲା। ସେଥିମଧ୍ୟରୁ ଶୁକ୍ରବାର ସର୍ବଶେଷ ତଥ୍ୟ ଅନୁସାରେ ଏପର୍ଯ୍ୟନ୍ତ ଜିଲାରେ ମୋଟ ୧୦୨୩୧ ଜଣ ଚାଷୀଙ୍କଠାରୁ ୮ ଲକ୍ଷ ୭୧ ହଜାର ୯୬୦.୨୮ କୁଇଣ୍ଟାଲ ଧାନ ସଂଗ୍ରହ ହୋଇ ସାରିଛି। ପ୍ରାଥମିକ ଲକ୍ଷ୍ୟ ପୂରଣ ହୋଇ ସାରିଥି୍ଲେ ହେଁ ବର୍ତ୍ତମାନ ମଧ୍ୟ ଜିଲାରେ ୬୧୧୭ ଜଣ ଚାଷୀ ସେମାନଙ୍କ ଧାନ ବିକ୍ରୟ କରି ପାରି ନ ଥିବା ଜଣାପଡ଼ିଛି। ଏପରିକି ବିଭିନ୍ନ ଅଞ୍ଚଳରେ ବର୍ତ୍ତମାନ ମଧ୍ୟ ଚାଷୀମାନେ ନିଜ ଧାନକୁ ବିକ୍ରୀ ପାଇଁ ରାସ୍ତା ଉପରେ ଶୁଖାଉଥିବା ଦେଖିବାକୁ ମିଳିଛି।
ଧାନ ସଂଗ୍ରହ ଲକ୍ଷ୍ୟ ପୂରଣ ହେବାକୁ ବସିଥିବା ବେଳେ ଗତ ମଙ୍ଗଳବାର ସମ୍ବଲପୁର ଜିଲା ପାଇଁ ସରକାରଙ୍କ ପକ୍ଷରୁ ଅତିରିକ୍ତ ୨ ଲକ୍ଷ ୧୯ ହଜାର କୁଇଣ୍ଟାଲ ଧାନ ସଂଗ୍ରହ ପାଇଁ ଅନୁମତି ଦେଇଛନ୍ତି। ହେଲେ ଏହି ଲକ୍ଷ୍ୟ ଉପଯୁକ୍ତ ଭାବେ ବିଭିନ୍ନ ପିଏସିଏସ୍କୁ ବଣ୍ଟନ ହୋଇନାହିଁ। ଫଳରେ ବିକ୍ରୟ ପାଇଁ ଧାନ ଧରି କ୍ରୟ କେନ୍ଦ୍ରକୁ ଆସିଥିବା ଚାଷୀମାନେ ଘୋର ଅସୁବିଧାର ସମ୍ମୁଖିନ ହେଉଛନ୍ତି ବୋଲି ଚାଷୀଙ୍କ ପକ୍ଷରୁ ଅଭିଯୋଗ ହୋଇଛି।
ଅପରପକ୍ଷରେ ଚାଉଁରପୁର ପିଏସିଏସ୍ରେ ମୋଟ ୭୯୦ ଜଣ ଚାଷୀ ପଞ୍ଜୀକୃତ ହୋଇଥିବା ବେଳେ ଏଠାରେ ଏପର୍ଯ୍ୟନ୍ତ ୫୨୧ ଜଣ ଚାଷୀଙ୍କଠାରୁ ମୋଟ୍ ୪୯ ହଜାର ୨୫୭.୩୮ କୁଇଣ୍ଟାଲ ଧାନ ସଂଗୃହିତ ହୋଇସାରିଛି। ସେଥିମଧ୍ୟରେ ଚାଉଁରପୁର କ୍ରୟକେନ୍ଦ୍ରରେ ପ୍ରକୃତରେ ୩୩ ହଜାର ୨୧୧୍.୧୯ କୁଇଣ୍ଟାଲ ଓ ସେନାପାଲିରେ ୨୬ ହଜାର ୦୨୬.୬୬ କୁଇଣ୍ଟାଲ ଧାନ ସଂଗ୍ରହ ହୋଇଛି। ଏଠାରେ ଉଭୟ କେନ୍ଦ୍ର ପାଇଁ ଯଥାକ୍ରମେ ୩୪ ହଜାର ୯୫୦ ଓ ୨୭ ହଜାର ୩୪୦ କୁଇଣ୍ଟାଲ ଧାନ ସଂଗ୍ରହ ପାଇଁ ଲକ୍ଷ୍ୟ ଧାର୍ଯ୍ୟ ହୋଇଥିଲା। ମାତ୍ର ଏଠାରେ ପ୍ରକୃତ ସଂଗ୍ରହ ଠାରୁ ସରକାରୀ ପୋର୍ଟାଲରେ ସଂଗୃହିତ ଧାନର ପରିମାଣ କମ୍ ପ୍ରଦର୍ଶିତ କରୁଥିବାରୁ ଲକ୍ଷ୍ୟ ପୂରଣ ନ ହେବା ପର୍ଯ୍ୟନ୍ତ ପୁନଃ ଅଧିକ ଲକ୍ଷ୍ୟ ପ୍ରଦାନ କରାଯାଉନାହିଁ। ତେଣୁ ଏଠାରେ ଚାଷୀଙ୍କ ଧାନ ସଂଗ୍ରହରେ ଅବ୍ୟବସ୍ଥା ହେଉଥିବା ଦେଖିବାକୁ ମିଳିଛି।
ଏହାକୁ ନେଇ ନିଜ ପ୍ରତିକ୍ରିୟାରେ ଅତିରିକ୍ତ ଯୋଗାଣ ଅଧିକାରୀ ବୀରେନ୍ଦ୍ର ସୋରେଙ୍ଗ କହିଛନ୍ତି, ଦ୍ୱିତୀୟ ପର୍ଯ୍ୟାୟରେ ଆସିଥିବା ୨ ଲକ୍ଷ ୧୯ ହଜାର କୁଇଣ୍ଟାଲର ଲକ୍ଷ୍ୟକୁ ୫୮ଟି କ୍ରୟକେନ୍ଦ୍ରକୁ ଆବଶ୍ୟକତା ଭିତ୍ତିରେ ବଣ୍ଟନ କରାଯାଇଛି। ମାତ୍ର ସମ୍ବଲପୁର ଜିଲାରେ ଆବଶ୍ୟକତା ଅନୁସାରେ ଆହୁରି ଅଧିକ ଧାନ ସଂଗ୍ରହ ଲକ୍ଷ୍ୟ ପ୍ରଦାନ ପାଇଁ ସରକାରଙ୍କୁ ପତ୍ର ମାଧ୍ୟମରେ ଜଣାଇ ଦିଆଯାଇଛି। ଖୁବଶୀଘ୍ର ନୂତନ ଲକ୍ଷ୍ୟ ଆସିବା ପରେ ଧାନ ସଂଗ୍ରହରେ ରହିଥିବା ସବୁ ଅସୁବିଧା ଦୂର ହୋଇଯିବ ବୋଲି ଅତିରିକ୍ତ ଯୋଗାଣ ଅଧିକାରୀ ସୋରେଙ୍ଗ କହିଛନ୍ତି।
