ନୂଆଦିଲ୍ଲୀ,୨୭ା୪: ନୋଭେଲ କରୋନା ଭାଇରସ୍ର ପ୍ରଚଣ୍ଡ ପ୍ରହାର ଓ ଏହାର ମୁକାବିଲାରେ ବିଫଳତା ଭାରତୀୟ ଅର୍ଥନୀତିକୁ ଉଜାଡ଼ିଦେଇଛି। ଅର୍ଥ ବ୍ୟବସ୍ଥା ଅଣ୍ଟା ସଳଖି ଛିଡ଼ା ନ ହେଉଣୁ ସ୍ଥିତି ସୁଧୁରିଯାଇଛି ବୋଲି ତରବରିଆ ଭାବେ ପ୍ରଚାର କରିଦିଆଯିବାରୁ ଘାତକ ଭୂତାଣୁ ପୁଣି ମୁଣ୍ଡ ଟେକି ଚୋଟ ମାରିବାକୁ ସୁଯୋଗ ପାଇଛି। ଆସନ୍ନ ବିପଦ ପ୍ରତି ଶାସକ ବର୍ଗ ଆଖି ବୁଜିଦେବାରୁ ସାରା ଦେଶ କୁପରିଣାମ ଭୋଗୁଛି। କରୋନା ଉପରେ ବିଜୟ ଲାଭର ମିଥ୍ୟା ଆସ୍ଫାଳନ ଦେଶରେ ଅଭୂତପୂର୍ବ ଜରୁରୀ ପରିସ୍ଥିତିକୁ ଜନ୍ମ ଦେଇଛି। ଅକ୍ସିଜେନ ସଙ୍କଟ ଯୋଗୁ ରୋଗୀ ଅଣନିଃଶ୍ୱାସୀ ହୋଇ ମରୁଥିବାବେଳେ ହସ୍ପିଟାଲଗୁଡ଼ିକରେ ଘଟୁଥିବା ଅଗ୍ନିକାଣ୍ଡ ଅନେକ ଚିକିତ୍ସାଧୀନ ସଂକ୍ରମିତଙ୍କ ଜୀବନ ନେଉଛି। ସରକାରୀ ଅପାରଗତା ଯୋଗୁ ଏହାକୁ ରୋକାଯାଇପାରୁ ନାହିଁ। ଫଳରେ ସ୍ବାସ୍ଥ୍ୟ ସେବା ଓ ଜୀବନ ଧାରଣ ଭଳି ସମ୍ବିଧାନ ପ୍ରଦତ୍ତ ମୌଳିକ ଅଧିକାର ସୁନିଶ୍ଚିତ କରିବା ପାଇଁ ନ୍ୟାୟପାଳିକାକୁ ହସ୍ତକ୍ଷେପ କରିବାକୁ ପଡ଼ିଛି। ୫ ଟ୍ରିଲିୟନ୍ ଡଲାର ଅର୍ଥନୀତିର ସ୍ବପ୍ନ ଦେଖୁଥିବା ଦେଶର ଏହି ବିକଳ ଚିତ୍ର ବୟାନ କରୁଛି ସ୍ଥିତି କେତେ ସାଂଘାତିକ।
ରାଜଧାନୀ ଦିଲ୍ଲୀ ଓ ଆର୍ଥତ୍କ ରାଜଧାନୀ ମୁମ୍ବାଇ ସମେତ ଅନେକ ରାଜ୍ୟର ହସ୍ପିଟାଲଗୁଡ଼ିକ ସାମ୍ନାରେ ଧାଡ଼ି ଧାଡ଼ି ହୋଇ ଆମ୍ବୁଲାନ୍ସ ଛିଡ଼ାହୋଇଛି। ଯଦି କେଉଁଠି ଶଯ୍ୟା ଖାଲି ହେଉଛି, ପୂର୍ବରୁ ଜଗିଥିବା ରୋଗୀ ପ୍ରାଣ ବିକଳରେ ମାଡ଼ିବସୁଛନ୍ତି। ଦିଲ୍ଲୀର ହସ୍ପିଟାଲଗୁଡ଼ିକରେ ରୋଗୀ ଚିକିତ୍ସା ପାଇଁ ଅକ୍ଷମତା ପ୍ରକାଶ କରି ଡାକ୍ତର କାନ୍ଦିପକାଉଛନ୍ତି। କେତେକ ଡାକ୍ତରଖାନା ସାମ୍ନାରେ ବ୍ୟାନର ଝୁଲାଇ ଘୋଷଣା କରାଯାଇଛି ‘ଦୟାକରି ଆମ ପାଖକୁ ଆସନ୍ତୁ ନାହିଁ, ଏଠାରେ ଅକ୍ସିଜେନ ଉପଲବ୍ଧ ନୁହେଁ।’ ଏଥିରୁ ବୁଝାପଡ଼ୁଛି ଯେ ବ୍ୟବସ୍ଥା ଭୁଶୁଡ଼ିପଡ଼ିଛି। ବିଦେଶକୁ ଭାକ୍ସିନ ରପ୍ତାନି ହେଉ କି ଦେଶରେ ବିଶାଳ ସମାଗମର ଆୟୋଜନ, ସବୁକିଛି ସାବାସି ନେବା ଉପଲକ୍ଷେ ଥିଲା ଗୋଟେ ଗୋଟେ ବିଜ୍ଞାପନ, ପ୍ରଦର୍ଶନ ନଚେତ୍ ପ୍ରହସନ। ଭାରତ ବିଶ୍ୱର ନୂଆ ହଟ୍ସ୍ପଟ୍ ପାଲଟିଥିବାବେଳେ ସାମ୍ପ୍ରତିକ ଜନସ୍ବାସ୍ଥ୍ୟ ଜରୁରୀ ପରିସ୍ଥିତିକୁ ଦେଖି ପାକିସ୍ତାନ ଓ ଚାଇନା ମଧ୍ୟ ନୂଆଦିଲ୍ଲୀକୁ ସହଯୋଗ ପାଇଁ ଆଗ୍ରହ ପ୍ରକାଶ କରିଛନ୍ତି, ଯାହାଙ୍କୁ ଶତ୍ରୁରାଷ୍ଟ୍ର ବୋଲି ମନେ କରାଯାଇଥାଏ।
