ବରଗଡ଼, ୧୬ ଜୁନ୍ (ପ୍ରେମାନନ୍ଦ ଖମାରୀ): ବରଗଡ଼ର ଅଗ୍ରଣୀ ସ୍ବେଚ୍ଛାସେବୀ ଅନୁଷ୍ଠାନ ‘ନିଷ୍ଠା ପରିବାର’ ପାଇଁ ଏକ ଗର୍ବର ବିଷୟ । ମଙ୍ଗଳବାର ଦିନ ଗୁଜରାଟର ଅହମଦାବାଦଠାରେ ଆୟୋଜିତ ଏକ ଜାତୀୟ ସ୍ତରୀୟ ଏନଜିଓ ସମ୍ମିଳନୀରେ ରକ୍ତଦାନ କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ଏହି ଅନୁଷ୍ଠାନକୁ ସମ୍ମାନିତ କରାଯାଇଛି। ହୋଟେଲ ସିଲଭର କ୍ଲାଉଡରେ ଆୟୋଜିତ ଏହି କାର୍ଯ୍ୟକ୍ରମରେ ‘ନିଷ୍ଠା ପରିବାର’ ଜାତୀୟ ସମ୍ମାନ ଲାଭ କରିଛି ।
ଏହି ଭବ୍ୟ କାର୍ଯ୍ୟକ୍ରମରେ ଭାରତ ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର ବହୁ ବରିଷ୍ଠ ପଦାଧିକାରୀ, ଦେଶର ବିଭିନ୍ନ ରାଜ୍ୟର ସଂଗଠନ ଏବଂ କର୍ମକର୍ତ୍ତାମାନେ ଯୋଗ ଦେଇଥିଲେ । ନିଷ୍ଠା ପରିବାରର ସଭାପତି ଅଶ୍ୱିନୀ ତ୍ରିପାଠୀ ଓ ସଂଯୋଜକ ଭୋଳାନାଥ ସାହୁ ଏହି ପ୍ରତିଷ୍ଠିତ ସମ୍ମାନ ଗ୍ରହଣ କରିଥିଲେ । ଓଡ଼ିଶାରୁ ଏସବିଟିସି ଉପନିର୍ଦ୍ଦେଶକ ସ୍ୱରୂପ କୁମାର ଦାଶ ଓ ମୟୁରଭଞ୍ଜ ରକ୍ତ ଭଣ୍ଡାର ଅଧିକାରୀ ମଧ୍ୟ ଏହି ଅବସରରେ ଉପସ୍ଥିତ ଥିଲେ।
‘ନିଷ୍ଠା ପରିବାର’ ତରଫରୁ ଅତିଥିମାନଙ୍କୁ ସମ୍ବଲପୁରୀ ଗାମୁଛା ଏବଂ “ଦ ଜର୍ଣି ଅଫ ନିଷ୍ଠା” ପ୍ରଦାନ କରାଯାଇଥିଲା। ଏହି ସମ୍ମାନ ଗ୍ରହଣ କରିବା ପରେ ସଭାପତି ଅଶ୍ୱିନୀ ତ୍ରିପାଠୀ କହିଛନ୍ତି ଯେ, ଏହି ସମ୍ମାନ ରକ୍ତଦାନ କ୍ଷେତ୍ରରେ କାମ କରିବା ପାଇଁ ଅନୁଷ୍ଠାନକୁ ଆହୁରି ଅଧିକ ପ୍ରେରଣା ଯୋଗାଇବ।
ଏହି କାର୍ଯ୍ୟକ୍ରମକୁ ଭାରତ ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ଅଧୀନରେ ଥିବା ରକ୍ତ ସଞ୍ଚାର ସେବା, ସ୍ୱାସ୍ଥ୍ୟ ସେବା ମହାନିର୍ଦ୍ଦେଶାଳୟର ସହଯୋଗରେ, ଗୁଜରାଟ ସରକାରଙ୍କ ସ୍ୱାସ୍ଥ୍ୟ ଓ ପରିବାର କଲ୍ୟାଣ ବିଭାଗର ରକ୍ତ ସଞ୍ଚାର ସେବା ଏବଂ ଗୁଜରାଟ ରାଜ୍ୟ ରକ୍ତ ସଞ୍ଚାର ପରିଷଦ ମିଳିତ ଭାବେ ଆୟୋଜନ କରିଥିଲେ।
