ଅଟଓ୍ବା,୨୬।୩ : କାନାଡାର ବୈଦେଶିକ ମନ୍ତ୍ରୀ ମେଲିନି ଜଲି ସଂସଦରେ ଏକ ବିବୃତ୍ତିରେ କହିଛନ୍ତି ଯେ ପଞ୍ଜାବର ପରିସ୍ଥିତି ଉପରେ କାନାଡା ତୀକ୍ଷଣ ନଜର ରଖିଛି ଏବଂ କାନାଡାରେ ରହୁଥିବା ସମ୍ପ୍ରଦାୟକୁ ଏହା ବିଷୟରେ ଅବଗତ କରାଇବ। ଏଥି ସହିତ ପଞ୍ଜାବ ସମ୍ବନ୍ଧରେ ବୈଦେଶିକ ନେତାଙ୍କ ବିବୃତ୍ତି ଉପରେ ଭାରତୀୟ ବୈଦେଶିକ ମନ୍ତ୍ରଣାଳୟ କହିଛି ଯେ ଭୁଲ ଏବଂ ବିଭ୍ରାନ୍ତିକର ତଥ୍ୟକୁ ବିଶ୍ୱାସ କରନ୍ତୁନାହିଁ। ଆମେ ଆପଣଙ୍କୁ କହି ରଖୁଛୁ ଯେ ପଞ୍ଜାବ ପୋଲିସ ଅମୃତପାଲ ସିଂଙ୍କ ଅନେକ ସହଯୋଗୀଙ୍କୁ ଗିରଫ କରିଛି, ୱାରିସ ପଞ୍ଜାବ ଡେ ମୌଳବାଦୀ ନେତା ଏବଂ ପଳାତକ ଅମୃତପାଲଙ୍କୁ ଖୋଜା ଚାଲିଛି।
କାନାଡା ସଂସଦରେ ଭାରତୀୟ ମୂଳ ସାଂସଦ ଇକବିନ୍ଦର ଏସ ଗହିରଙ୍କ ପ୍ରଶ୍ନର ଉତ୍ତରରେ କାନାଡାର ବୈଦେଶିକ ମନ୍ତ୍ରୀ ମେଲିନି ଜଲି କହିଛନ୍ତି ଯେ ପଞ୍ଜାବର ପରିବର୍ତ୍ତିତ ପରିସ୍ଥିତି ବିଷୟରେ ଆମେ ଅବଗତ ଏବଂ ଏହି ଘଟଣା ଉପରେ ନଜର ରଖିଛୁ। ଆମେ ଆଶା କରୁଛୁ ଶୀଘ୍ର ପରିସ୍ଥିତି ସ୍ବାଭାବିକ ଏବଂ ସ୍ଥିର ହୋଇଯିବ।
ଜଲି କହିଛନ୍ତି ଯେ କାନାଡିଆନମାନେ ସର୍ବଦା ସରକାରଙ୍କ ଉପରେ ଭରସା କରିପାରିବେ ଏବଂ ଆମେ ସେମାନଙ୍କ ସମସ୍ୟାର ସମାଧାନ ପାଇଁ କାର୍ଯ୍ୟ ଜାରି ରଖିଛୁ। ସାଂସଦ ଗହିର ମଧ୍ୟ ପଞ୍ଜାବରେ ଇଣ୍ଟରନେଟ ସେବାକୁ ସ୍ଥଗିତ ରଖିବା ପ୍ରସଙ୍ଗ ଉଠାଇ ବୈଦେଶିକ ବ୍ୟାପାର ମନ୍ତ୍ରୀଙ୍କୁ ଏହା ବିଷୟରେ ଗୃହକୁ ଜଣାଇବାକୁ ଦାବି କରିଛନ୍ତି।
ନିକଟ ଅତୀତରେ କାନାଡାରେ ହିନ୍ଦୁ ବିରୋଧୀ ଘଟଣା ମଧ୍ୟ ବୃଦ୍ଧି ପାଇଛି। ଅତୀତରେ ଖାଲିସ୍ତାନ ସମର୍ଥକମାନେ ଅନେକ ହିନ୍ଦୁ ମନ୍ଦିରକୁ ଟାର୍ଗେଟ କରିଥିଲେ। ଭାରତୀୟ ଦୂତାବାସ ମଧ୍ୟ ଏହି ପ୍ରସଙ୍ଗରେ କାନାଡା ସରକାରଙ୍କ ନିକଟରେ ଅଭିଯୋଗ କରିଥିଲେ ଏବଂ ଦୋଷୀମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଦାବି କରିଥିଲେ।
ଅନ୍ୟପକ୍ଷରେ ଅମୃତପାଲ ମାମଲାରେ ବୈଦେଶିକ ନେତା ତଥା ସଂସଦୀୟ ସଦସ୍ୟଙ୍କ ବିବୃତ୍ତି ଉପରେ ଭାରତୀୟ ବୈଦେଶିକ ମନ୍ତ୍ରଣାଳୟର ମୁଖପାତ୍ର ଅରିନ୍ଦମ ବାଗଚି ବିଦେଶରେ ରହୁଥିବା ଲୋକଙ୍କୁ ନିବେଦନ କରିଛନ୍ତି ଯେ ମିଥ୍ୟା ତଥା ବିଭ୍ରାନ୍ତିକର ତଥ୍ୟକୁ ବିଶ୍ୱାସ ନ କରନ୍ତୁ। ପ୍ରଶାସନ ଜଣେ ପଳାତକଙ୍କୁ ଧରିବାକୁ ଚେଷ୍ଟା କରୁଛି ଏବଂ ଏହା ସହ ଜଡିତ ସମସ୍ତ ତଥ୍ୟ ସମୟ ସମୟରେ ସଂପୃକ୍ତ ପ୍ରଶାସନ ଦ୍ୱାରା ପ୍ରଦାନ କରାଯାଉଛି।
