ଭୁବନେଶ୍ୱର,୧୬ା୫(ବ୍ୟୁରୋ): ଭୁବନେଶ୍ୱରରୁ ଦୁବାଇକୁ ସୋମବାରଠାରୁ ସିଧାସଳଖ ବିମାନ ସେବା ଆରମ୍ଭ ହୋଇଛି। ଏହି ବିମାନରେ ବିଜେଡିର ପ୍ରାୟ ୧୫ରୁ ଊର୍ଦ୍ଧ୍ୱ ବିଧାୟକ ଦୁବାଇ ଗସ୍ତ କରିଛନ୍ତି। ବିଧାୟକଙ୍କ ଗସ୍ତକୁ ବିରୋଧୀ ଭାଜପା ଓ କଂଗ୍ରେସ ପକ୍ଷରୁ କଡା ସମାଲୋଚନା କରାଯାଇଛି। ଭାଜପା ବରିଷ୍ଠ ନେତା ତଥା ଦେବଗଡ଼ ବିଧାୟକ ସୁବାସ ପାଣିଗ୍ରାହୀ ସରକାରୀ ପଇସାରେ ବିଜେଡି ବିଧାୟକମାନେ ଦୁବାଇ ଯିବା ନିନ୍ଦନୀୟ କଥା ବୋଲି କହିଛନ୍ତି। ସେ କହିଛନ୍ତି ଯେ ବିଜେଡି ନାଟକ କରୁଛି। ଲୋକଙ୍କୁ ଭୁଆଁ ବୁଲାଉଛି। ଯଦି ବିଜେଡି ବିଧାୟକମାନେ ସରକାରୀ ଟଙ୍କାରେ ଦୁବାଇ ଗସ୍ତ କରୁଛନ୍ତି ତାହା ନିଶ୍ଚିତ ଭାବେ ନିନ୍ଦନୀୟ। ଶାସକ ଦଳର ବିଧାୟକମାନଙ୍କୁ ବିଦେଶ ଗସ୍ତରେ ବୁଲିବା ପାଇଁ ଏଭଳି ସରକାରୀ ଟଙ୍କା ଅପବ୍ୟୟ କରିବାକୁ ଅନୁମତି ଦିଆଯିବା ଉଚିତ ନୁହେଁ। ବିଧାୟକମାନେ ବିଦେଶ ଯିବା ପାଇଁ ନିର୍ଦ୍ଦିଷ୍ଟ ପ୍ରକ୍ରିୟା ଅଛ। ଏହାକୁ ପାଳନ କରାଯାଇ ପାରିଥାନ୍ତା କିମ୍ବା ସେଭଳି ଯୋଜନା କରାଯାଇ ପାରିଥାନ୍ତା। ଶାସକ ଦଳ ବିଦେଶ ଗସ୍ତ ସହ ଅନେକ କାର୍ଯ୍ୟରେ ଏଭଳି ସରକାରୀ ଟଙ୍କାର ଦୁରୂପଯୋଗ କରୁଥିବା ଦେଖିବାକୁ ମିଳିଛି। ଯଦି ବିଧାୟକମାନେ ଦୁବାଇରେ ଉତ୍କଳ ଦିବସ ପାଳନ ସମାରୋହରେ ସାମିଲ ହେବାକୁ ଯାଉଛନ୍ତି ଏଥିପାଇଁ ସବୁ ଦଳର ବିଧାୟକମାନଙ୍କ ସହ ଯୋଗାଯୋଗ କରି କାର୍ଯ୍ୟକ୍ରମ ପ୍ରସ୍ତୁତ କରାଯାଇ ପାରିଥାନ୍ତା। କିନ୍ତୁ କେବଳ ବିଜେଡି ବିଧାୟକମାନଙ୍କୁ ଦୁବାଇ ପଠାଇବାକୁ ସେ ନାପସନ୍ଦ କରିଛନ୍ତି। ଉତ୍କଳ ଦିବସ ସବୁଆଡ଼େ ଏପ୍ରିଲ ୧ରେ ପାଳନ ହେଲା। କିନ୍ତୁ ଲୋକଙ୍କୁ ଭୂଆଁ ବୁଲାଇ ପ୍ରବାସୀ ଓଡ଼ିଆଙ୍କୁ ପ୍ରଭାବିତ କରିବାକୁ ଏଭଳି ନାଟକ ବାଜି କରୁଛି। ପଶ୍ଚିମ ଓଡ଼ିଶା ବିକାଶ ପରିଷଦ ସମେତ ବିଭିନ୍ନ ସରକାରୀ ସଂସ୍ଥାରୁ ପାଣ୍ଠିକୁ ବିଜେଡି ନିଜର ରାଜନୀତିକ ଗତିବିଧି ପାଇଁ ସ୍ଥାନାନ୍ତର କରୁଛି ବୋଲି ସେ ଅଭିଯୋଗ କରିଛନ୍ତି।
କଂଗ୍ରେସ ବିଧାୟକ ସନ୍ତୋଷ ସିଂ ସାଲୁଜା ମଧ୍ୟ ଅନୁରୂପ ଭାବେ ଦୁବାଇ ଗସ୍ତରେ କେବଳ ବିଜେଡି ବିଧାୟକମାନେ ଯିବାକୁ ନେଇ ତୀବ୍ର ଅସନ୍ତୋଷ ବ୍ୟକ୍ତ କରିବା ସହ ଏହାକୁ ଦୁର୍ଭାଗ୍ୟଜନକ ବୋଲି କହିଛନ୍ତି।ଅନ୍ୟ ପକ୍ଷରେ ବିଜେଡିର ଜଣେ ବିଧାୟକ କହିଛନ୍ତି ଯେ ବିଧାୟକମାନେ ଦଳ ପଇସାରେ ଦୁବାଇ ଯାଇଛନ୍ତି। ସରକାର ଅର୍ଥ ଖର୍ଚ୍ଚ ହୋଇନାହିଁ।
