ଲକ୍ଷ୍ନୌ, ୧୪।୯: ଉତ୍ତର ପ୍ରଦେଶ ଗୋଣ୍ଡା ଜିଲା କୋତଓ୍ବାଲି ଅଞ୍ଚଳରୁ ଅନ୍ଧବିଶ୍ୱାସର ଏକ ଜ୍ୱଳନ୍ତ ଚିତ୍ର ସାମ୍ନାକୁ ଆସିଛି। ଏହି ଅଞ୍ଚଳରେ ରାତିରେ ଶୋଇଥିବା ଅବସ୍ଥାରେ ଗୋଟିଏ ପରିବାରର ଭାଇ-ଭଉଣୀକୁ ଏକ ବିଷାକ୍ତ ସାପ କାମୁଡ଼ି ଦେଇଥିଲା। ଏହାପରେ ପରିବାର ଲୋକ ଶୀଘ୍ର ଉଭୟଙ୍କୁ ହସ୍ପିଟାଲ ନେଇଯାଇଥିଲେ। ଯେଉଁଠାରେ ଡାକ୍ତର ଭାଇକୁ ମୃତ ଘୋଷଣା କରିଥିଲେ। ପରିବାର ଲୋକ ଏହାପରେ ମୃତ ଯୁବକର ଶବ ଧରି ଅନ୍ତିମ ସଂସ୍କାର ପାଇଁ ଗ୍ରାମକୁ ଆସିଥିଲେ। ଏହି ସମୟରେ ଜଣେ ବ୍ୟକ୍ତି ତନ୍ତ୍ର ବଳରେ ମୃତ ଯୁବକଙ୍କୁ ପୁନର୍ଜୀବିତ କରିଦେବେ ବୋଲି ଦାବି କରିଥିଲେ। ନିଜକୁ ତାନ୍ତ୍ରିକ ବୋଲି ଦାବି କରିଥିବା ସେହି ବ୍ୟକ୍ତିର କଥା ଅନୁସାରେ ମୃତ ଯୁବକର ଶବକୁ ଗ୍ରାମ ବାହାରକୁ ନିଆଯାଇଥିଲା। ଏହାପରେ ଆରମ୍ଭ ହୋଇଥିଲା ମନ୍ତ୍ର ତନ୍ତ୍ରର ଖେଳ। ତନ୍ତ୍ର କରୁଥିବା ବ୍ୟକ୍ତି ମୃତ ଯୁବକଙ୍କ ପାଟିରେ ଏକ ଜୀବନ୍ତ ସାପ ରଖି କାନରେ ଫୁଙ୍କିବାକୁ ଲାଗିଥିଲେ। ଅନ୍ଧବିଶ୍ୱାସର ଏହି ଖେଳ ୩ ଘଣ୍ଟା ଚାଲିଥିବାବେଳେ ଶହ ଶହ ସଂଖ୍ୟାରେ ଲୋକ ଏହାକୁ ଦେଖୁଥିଲେ। ଶେଷରେ କୌଣସି ସୁଫଳ ମିଳି ନ ଥିଲା। ପୋଲିସ ସୂଚନା ପାଇ ଘଟଣା ସ୍ଥଳରେ ପହଞ୍ଚିବା ସହ ଯୁବକଙ୍କ ଶବକୁ ପୋଷ୍ଟମର୍ଟମ ପାଇଁ ପଠାଇଥିଲା।
