ଖୋର୍ଦ୍ଧା,୨୯।୯(ପ୍ରଭାତ ପାଣିଗ୍ରାହୀ): ଖେଳିବାକୁ ଆସି ପୋଖରୀରେ ବୁଡ଼ି ଚାଲିଗଲା ଦଶମ ଶ୍ରେଣୀ ଛାତ୍ରଙ୍କ ଜୀବନ । ଖୋର୍ଦ୍ଧା ଜିଲା ନରଣଗଡ଼ସ୍ଥିତ ଚିନ୍ତାମଣି ବିଦ୍ୟା ନିକେତନ ନିକଟରେ ଘଟିଛି ଏଭଳି ଅଭାବନୀୟ ଘଟଣା । ମୃତ ଛାତ୍ର ଜଣକ ବାଲିପାଟଣା ଆଦର୍ଶ ବିଦ୍ୟାଳୟର ଛାତ୍ର ଅର୍ଣ୍ଣବ ସାହୁ।
ସୂଚନା ଅନୁସାରେ, ଛାତ୍ର ଅର୍ଣ୍ଣବ ସାହୁ ଅନ୍ୟମାନଙ୍କ ସହ ଜିଲାସ୍ତରୀୟ ଖେଳ ପ୍ରତିଯୋଗିତାରେ ସାମିଲ ହେବାକୁ ଆସିଥିଲେ । ଆଜି ସକାଳ ସମୟରେ ସେ ପୋଖରୀରେ ଗାଧୋଇବା ସମୟରେ ହଠାତ୍ ତାଙ୍କ ଗୋଡ଼ ଖସିଯିବାରୁ ସେ ଗଭୀର ପାଣିରେ ବୁଡ଼ି ଯାଇଥିଲେ। ଉଦ୍ଧାର କରି ତାଙ୍କୁ ଖୋର୍ଦ୍ଧା ମେଡିକାଲରେ ଭର୍ତ୍ତି କରାଯାଇଥିଲେ ମଧ୍ୟ ଡାକ୍ତର ମୃତ ଘୋଷଣା କରିଥିଲେ।
ଏହି ଘଟଣାରେ ଶିକ୍ଷକଙ୍କ ଅବହେଳା ନେଇ ଅଭିଯୋଗ ଉଠିଛି। ଘଟଣାର ସଠିକ୍ କାରଣ ଓ କାହାର ଅବହେଳା ଥିଲା, ସେନେଇ ତଦନ୍ତ ଦାବି ହୋଇଛି । ଛାତ୍ରଙ୍କ ମୃତଦେହ ଖୋର୍ଦ୍ଧା ମେଡିକାଲରେ ବ୍ୟବଚ୍ଛେଦ ପାଇଁ ରଖାଯାଇଛି । ଛାତ୍ରଙ୍କ ଅକାଳ ମୃତ୍ୟୁରେ ବାଲିପାଟଣା ବାଳିକା ବିଦ୍ୟାଳୟ ଖେଳ ଶିକ୍ଷକ ତଥା ବାଲିପାଟଣା ବ୍ଲକ ଖେଳବିଭାଗ ଇନଚାର୍ଜ ସୁନିଲ ପଣ୍ଡାଙ୍କୁ କାର୍ଯ୍ୟରୁ ନିଳମ୍ବିତ ପାଇଁ ଜିଲା ଶିକ୍ଷା ଅଧିକାରୀ ସୁପାରିଶ କରିଛନ୍ତି। ଏଥିସହିତ ସଂପୃକ୍ତ ବିଦ୍ୟାଳୟ ପ୍ରଧାନଶିକ୍ଷକ ଓ ଜିଲା କ୍ରୀଡାଧିକାରୀ ଦିଲୀପ ମୋଦିଙ୍କୁ କାରଣ ଦର୍ଶାଅ ନୋଟିସ ଜାରି କରିଛନ୍ତି ଜିଲା ଶିକ୍ଷାଧିକାରୀ।
ଘଟଣାସ୍ଥଳରେ ଜିଲା ଶିକ୍ଷା ଅଧିକାରୀ ସୋନାମିକା ରାୟ, ଅତିରିକ୍ତ ଶିକ୍ଷା ଅଧିକାରୀ ପରମିତା ଜେନ, ଜିଲା କ୍ରୀଡ଼ା ଅଧିକାରୀ ଦୀପକ କୁମାର ବୁଦୁଲି, ଖୋର୍ଦ୍ଧା ବ୍ଲକ ଶିକ୍ଷା ଅଧିକାରୀ ମନାଙ୍କି ସାହାନାୟକ, ତହସିଲଦାର ବିବାସ ପାଣିଗ୍ରାହୀ ପ୍ରମୁଖ ପହଞ୍ଚି ସ୍ଥାନୀୟ ଲୋକଙ୍କ ସହ ଆଲୋଚନା କରିଛନ୍ତି। ଏହାସହ ପୋଲିସ ପ୍ରଶାସନର ଅଧିକାରୀମାନେ ମଧ୍ୟ ଘଟଣାସ୍ଥଳରେ ପହଞ୍ଚି ଲୋକଙ୍କୁ ବୁଝାସୁଝା କରୁଛନ୍ତି। ଧାନାଧିକାରୀ ନୃସିଂହ ଓ ଖୋର୍ଦ୍ଧା ଅଧିକାରୀ ରମେଶ କୁମାର ଦେବତାଙ୍କ ସମେତ ଅନ୍ୟ ଅଧିକାରୀମାନେ ଲୋକଙ୍କ ସହ ଆଲୋଚନା କରି ପରିସ୍ଥିତି ଶାନ୍ତ କରିବାକୁ ଉଦ୍ୟମ କରୁଛନ୍ତି। ତେବେ ପ୍ରଶାସନ ଓ ପୋଲିସ ପକ୍ଷରୁ ବାରମ୍ବାର ବୁଝାସୁଝା କରାଯାଉଥିଲେ ମଧ୍ୟ ଘଟଣାସ୍ଥଳରେ ଲୋକଙ୍କ ଅସନ୍ତୋଷ ଜାରି ରହିଛି । ସମାଧାନ ଦାବିରେ ସେମାନେ ନିଜ ଜିଦ୍ରେ ଅଟଳ ରହିଥିବା ଜଣାପଡ଼ିଛି ।
