ମୁମ୍ବାଇ,୨୯।୯: ବଲିଉଡ୍ ଅଭିନେତା ଗୋବିନ୍ଦା ଏବଂ ତାଙ୍କ ପତ୍ନୀ ସୁନିତା ଆହୁଜାଙ୍କ ବିବାହିତ ଜୀବନକୁ ନେଇ କିଛି ସମୟ ଧରି ବିଭିନ୍ନ ଚର୍ଚ୍ଚା ହେଉଛି। ଏହାରି ମଧ୍ୟରେ ଗୋବିନ୍ଦାଙ୍କ ନାମ ତାଙ୍କ କୋ-ଷ୍ଟାର କୋମଲ ରାଣୀଙ୍କ ସହ ଯୋଡ଼ାଯିବା ପରେ ଚର୍ଚ୍ଚା ଆହୁରି ବଢ଼ିଥିଲା। ଏବେ ଏହି ପ୍ରସଙ୍ଗରେ ସୁନିତା ଆହୁଜା ନିଜ ପ୍ରତିକ୍ରିୟା ଦେଇଛନ୍ତି।
ଗୋବିନ୍ଦା ଓ କୋମଲ ରାଣୀଙ୍କୁ ନେଇ ପ୍ରଶ୍ନ କରାଯିବାରୁ ସୁନୀତା ଏହି ବିଷୟରେ କୌଣସି ସିଧାସଳଖ ମନ୍ତବ୍ୟ ଦେବାକୁ ମନା କରିଥିଲେ । ସେ କହିଥିଲେ ଯେ ଗୋବିନ୍ଦା କିମ୍ବା ତାଙ୍କ କୋ-ଷ୍ଟାରଙ୍କ ବିଷୟରେ ସେ କିଛି କହିବାକୁ ଚାହୁଁନାହାନ୍ତି । ସୁନିତା କହିଛନ୍ତି, ଗୋବିନ୍ଦା ଯଦି ଖୁସି ଅଛନ୍ତି, ତେବେ ସେ ମଧ୍ୟ ତାଙ୍କ ପାଇଁ ଖୁସି। ସେ ଯେଉଁଠି ଓ ଯାହାଙ୍କ ସହ ରୁହନ୍ତୁ, ଖୁସିରେ ରୁହନ୍ତୁ ବୋଲି ସେ ପ୍ରାର୍ଥନା କରୁଥିବା କହିଛନ୍ତି। ଏହା ସହ ଏସବୁ ବିଷୟ ଉପରେ ଧ୍ୟାନ ନଦେଇ ନିଜ ଜୀବନରେ ଆଗକୁ ବଢ଼ିବାକୁ ସେ ଚାହୁଁଥିବା କହିଛନ୍ତି। ଗୋବିନ୍ଦା ଓ କୋମଲ ରାଣୀଙ୍କୁ ଏକାଠି ଦେଖାଯିବା ପରେ ସୋସିଆଲ ମିଡିଆରେ ତାଙ୍କ ସମ୍ପର୍କକୁ ନେଇ ବିଭିନ୍ନ ଆଲୋଚନା ଆରମ୍ଭ ହୋଇଥିଲା। ବିଶେଷକରି ଉଭୟେ ଲାଲବାଗଚା ରାଜାଙ୍କ ଦର୍ଶନ ପାଇଁ ଏକାଠି ପହଞ୍ଚିବା ପରେ ଏହି ଚର୍ଚ୍ଚା ଆହୁରି ତେଜ ହୋଇଥିଲା। ସେହି ସମୟରେ ସୁନୀତା ମଧ୍ୟ ଅଲଗା ଭାବେ ଲାଲବାଗଚା ରାଜାଙ୍କ ଦର୍ଶନ କରିଥିଲେ। କୋମଲ ରାଣୀ ମଧ୍ୟ ନିଜ ନାମକୁ ନେଇ ଚାଲିଥିବା ଚର୍ଚ୍ଚା ଉପରେ ପୂର୍ବରୁ ପ୍ରତିକ୍ରିୟା ଦେଇଥିବା ରିପୋର୍ଟ ରହିଛି। ତାଙ୍କ ନାମ ବ୍ୟବହାର କରି ଚର୍ଚ୍ଚା ସୃଷ୍ଟି ନକରିବାକୁ ସେ କହିଥିବା ଦାବି କରାଯାଇଛି।
ଏହି ବିବାଦ ମଧ୍ୟରେ ଅଭିନେତ୍ରୀ ଦିବ୍ୟା ଖୋସଲା କୁମାରଙ୍କ ଏକ ସୋସିଆଲ ମିଡିଆ ପୋଷ୍ଟ ମଧ୍ୟ ଚର୍ଚ୍ଚାରେ ଆସିଥିଲା। ଦିବ୍ୟା ନିଜ ପୋଷ୍ଟରେ ବିବାହ, ସମ୍ପର୍କ ଓ ମହିଳାଙ୍କ ସମ୍ମାନକୁ ନେଇ ନିଜ ମତ ରଖିଥିଲେ। ସୁନିତା ଏହି ପୋଷ୍ଟକୁ ସେୟାର କରିଥିଲେ। ଦିବ୍ୟା ତାଙ୍କ ପୋଷ୍ଟରେ ସୁନିତାଙ୍କ ପ୍ରତି ସମର୍ଥନ ଜଣାଇଥିବା ରିପୋର୍ଟ ରହିଛି। ସୁନିତା ପରିବାର ଓ ପିଲାଙ୍କ ପାଇଁ ନିଜ ଜୀବନର ଅନେକ ବର୍ଷ ଦେଇଛନ୍ତି ବୋଲି ଦିବ୍ୟା ଲେଖିଥିଲେ। ବ୍ୟକ୍ତିଗତ ସମ୍ପର୍କକୁ ସାର୍ବଜନୀନ ବିବାଦରେ ପରିଣତ ନକରିବାକୁ ମଧ୍ୟ ସେ ନିଜ ପୋଷ୍ଟରେ ମତ ଦେଇଥିଲେ।
ଗୋବିନ୍ଦା ଓ ସୁନିତା ଆହୁଜା ୧୯୮୭ ମସିହାରେ ବିବାହ କରିଥିଲେ। ଉଭୟଙ୍କର ଦୁଇ ସନ୍ତାନ ଅଛନ୍ତି—ଝିଅ ଟିନା ଆହୁଜା ଏବଂ ପୁଅ ୟଶବର୍ଦ୍ଧନ ଆହୁଜା। ଗତ କିଛି ସମୟ ଧରି ଉଭୟଙ୍କ ବିବାହିତ ଜୀବନକୁ ନେଇ ବିଭିନ୍ନ ରିପୋର୍ଟ ପ୍ରକାଶ ପାଇଛି। ତେବେ କୋମଲ ରାଣୀଙ୍କୁ ନେଇ ଚାଲିଥିବା ଚର୍ଚ୍ଚା ଉପରେ ସୁନିତା ନିଜ ସଦ୍ୟ ପ୍ରତିକ୍ରିୟାରେ କୌଣସି ସିଧାସଳଖ ମନ୍ତବ୍ୟ ନଦେଇ ଗୋବିନ୍ଦାଙ୍କ ଖୁସି ପାଇଁ ପ୍ରାର୍ଥନା କରିବା କଥା କହିଛନ୍ତି ।
