ଚମ୍ପୁଆ,୧୫ା୧୨(ଡି.ଏନ୍.ଏ): ଶିକ୍ଷାର ବିକାଶ ପାଇଁ ସରକାରୀସ୍ତରରେ ବହୁ ପଦକ୍ଷେପ ଗ୍ରହଣ କରାଯାଉଛି। ଅନେକ ବିଦ୍ୟାଳୟକୁ ୫-ଟିରେ ସାମିଲ କରାଯାଇ ଏହାର ଆନୁଷଙ୍ଗିକ ଭିତ୍ତିଭୂମିର ବିକାଶ ପାଇଁ ବିଭିନ୍ନ କାର୍ଯ୍ୟକ୍ରମ ହାତକୁ ନିଆଯାଉଛି। ମାତ୍ର ଏହାର ବିପରୀତ ପ୍ରତିବିମ୍ବ ଦେଖିବାକୁ ମିଳିଛି ଚମ୍ପୁଆ ବ୍ଲକ୍ ଅନ୍ତର୍ଗତ କାଳିକାପ୍ରସାଦ ପଞ୍ଚାୟତର ସରକାରୀ ପ୍ରାଥମିକ ବିଦ୍ୟାଳୟ ଚତିରି ସାହି କ୍ଷେତ୍ରରେ। ବିଦ୍ୟାଳୟ ଆଗରେ ମୁକୁଳା ଡ୍ରେନ୍ ଥିବା ବେଳେ ତା ଉପରେ ଏକ ପଟା ପକାଯାଇ ଛାତ୍ରୀଛାତ୍ର ବିପଦପୂର୍ଣ୍ଣ ଭାବେ ଯାତାୟାତ କରୁଛନ୍ତି। ଅଭିଯୋଗ କଲେ ମଧ୍ୟ କେହି କର୍ଣ୍ଣପାତ କରୁ ନ ଥିବା ଅଭିଯୋଗ ହେଉଛି।
ସୂଚନାଯୋଗ୍ୟ, ୨ ବର୍ଷ ପୂର୍ବେ କରୋନା ସମୟରେ ଉକ୍ତ ବିଦ୍ୟାଳୟ ସମ୍ମୁଖରେ ପ୍ରଶାସନ ପକ୍ଷରୁ ଏକ ଡ୍ରେନ ନିର୍ମାଣ କରାଯାଇଥିଲା। ମହାମାରୀ ସ୍ବଭାବିକ ହେବା ପରେ ପ୍ରାଥମିକ ବିଦ୍ୟାଳୟ ଖୋଲାଯାଇଥିଲେ ମଧ୍ୟ ମୁଖ୍ୟ ଗେଟକୁ ଲାଗି ଡ୍ରେନ୍ ଉପରେ ସ୍ଲାବ୍ ପକାଯାଇ ନ ଥିଲା। ନିର୍ମାଣର ୨ ବର୍ଷ ପରେ ମଧ୍ୟ ସ୍ଲାବ୍ ନ ପଡ଼ିବାରୁ ପ୍ରଥମରୁ ପଞ୍ଚମ ଶ୍ରେଣୀରେ ଅଧୟନରତ ଛାତ୍ରୀଛାତ୍ରମାନେ ଅସୁବିଧାର ସମ୍ମୁଖୀନ ହୋଇ ଯାତାୟାତ କରୁଛନ୍ତି। ଏ ନେଇ ବିଦ୍ୟାଳୟ ପକ୍ଷରୁ ପଞ୍ଚାୟତ କର୍ତ୍ତୃପକ୍ଷଙ୍କୁ ସୂଚନା ଦିଆ ଯାଇଥିଲେ ମଧ୍ୟ ସ୍ଲାବ୍ ହୋଇପାରିନାହିଁ। ବାଧ୍ୟ ହୋଇ ବିଦ୍ୟାଳୟର ଶିକ୍ଷକମାନେ କାଠପଟା ପକାଇ ଅସ୍ଥାୟୀ ପୋଲ ନିର୍ମାଣ କରି କାମ ଚଳାଉଛନ୍ତି। ଏ ନେଇ ବ୍ଲକ ଶିକ୍ଷା ଅଧିକାରୀ ଗୋବର୍ଦ୍ଧନ ନାଏକଙ୍କୁ ପଚାରିବାରୁ କହିଛନ୍ତି, ମୋ ନଜରକୁ ଏହା ଆସି ନାହିଁ। ସ୍ଥାନୀୟ ସରପଞ୍ଚକୁ କହି ଏହାର ସମାଧାନ କରାଯିବ ବୋଲି କହିଥିଲେ। କାଳିକାପ୍ରସାଦ ସରପଞ୍ଚ ପୂର୍ଣ୍ଣିମା ଗୁରୁ କହିଛନ୍ତି, ଘଟଣା ନଜରକୁ ଆସିଛି। ଶୀଘ୍ର ଡ୍ରେନ୍ ଉପରେ ସ୍ଲାବ୍ ପକାଯିବ ବୋଲି ସେ କହିଥିଲେ।
