ନୂଆଦିଲ୍ଲୀ,୩୦ା୭: ସଡ଼କ ପରିବହନଜନିତ ପ୍ରଦୂଷଣ ଭାରତରେ ଜନସ୍ବାସ୍ଥ୍ୟ ପ୍ରତି ବଡ଼ ସମସ୍ୟା ସୃଷ୍ଟି କରିଛି। ୨୦୨୪ରେ ଗାଡ଼ିମୋଟରଜନିତ ପ୍ରଦୂଷଣ କାରଣରୁ ପ୍ରତି ୬ ମିନିଟ୍ରେ ଜଣେ ବ୍ୟକ୍ତିଙ୍କ ଅକାଳ ମୃତ୍ୟୁ ଘଟିଥିବାବେଳେ ପ୍ରତି ୩୪ ମିନିଟ୍ରେ ଜଣେ ନୂତନ ଶିଶୁଠାରେ ଆଜ୍ମା ରୋଗ ଚିହ୍ନଟ କରାଯାଇଥିବା ନୂତନ ରିପୋର୍ଟରୁ ଜଣାପଡ଼ିଛି।
ଦିଲ୍ଲୀ ଏବଂ ଜାତୀୟ ରାଜଧାନୀ ଅଞ୍ଚଳ (ଏନ୍ସିଆର୍) ଏକ ଅସମାନ ସ୍ବାସ୍ଥ୍ୟ ସମସ୍ୟାର ସମ୍ମୁଖୀନ ହୋଇଛି। ଦେଶରେ ସଡ଼କ ପରିବହନଜନିତ ପ୍ରଦୂଷଣରୁ ହେଉଥିବା ଶୈଶବ ଆଜ୍ମା ମାମଲା ଜନସଂଖ୍ୟାର ୫ ପ୍ରତିଶତ ହୋଇଥିବାବେଳେ ଏନ୍ସିଆର୍ରେ ତାହା ୨୩ ପ୍ରତିଶତ ରହିଛି। ଅନ୍ତର୍ଜାତୀୟ ସ୍ବଚ୍ଛ ପରିବହନ ପରିଷଦ (ଆଇସିସିଟି) ପକ୍ଷରୁ ବୁଧବାର ପ୍ରକାଶିତ ‘୨୦୫୦ ସୁଦ୍ଧା ଶୂନ-ନିର୍ଗମନ ପରିବହନର ସ୍ବାସ୍ଥ୍ୟ ପ୍ରତି ଲାଭ’ ରିପୋର୍ଟରେ ଏହା କୁହାଯାଇଛି। ଭାରତରେ ଗାଡ଼ିମୋଟର ପ୍ରଦୂଷଣଜନିତ ଶୈଶବ ଆଜ୍ମା ମାମଲାର ପାଖାପାଖି ଏକ-ଚତୁର୍ଥାଂଶ ଏନ୍ସିଆର୍ରେ ରହିଥିବା ଆଇସିସିଟିର ବରିଷ୍ଠ ଗବେଷକ ତଥା ଅଧ୍ୟୟନର ଲେଖକ ଲିଙ୍ଘଜି ଜିନ୍ କହିଛନ୍ତି। ଏହି ପିଲାମାନେ ସେମାନଙ୍କ ଦୈନନ୍ଦିନ ଜୀବନରେ ଗାଡ଼ି ପ୍ରଦୂଷଣର ସମ୍ମୁଖୀନ ହେଉଛନ୍ତି।
ଭାରତର ପରିବହନ ପ୍ରଦୂଷଣରେ ଭାରି ଯାନଗୁଡ଼ିକର ଭୂମିକା ଅଧିକ। ଯଦିଓ ବସ୍ ଓ ଟ୍ରକ୍ ସଂଖ୍ୟା ମୋଟ ଗାଡ଼ି ତୁଳନାରେ କମ୍, ତେବେ ସେମାନେ ତୁଳନାତ୍ମକ ଭାବେ ବାୟୁ ପ୍ରଦୂଷଣରେ ଅଧିକ କ୍ଷତି ଘଟାଉଛନ୍ତି। ରିପୋର୍ଟ ଅନୁଯାୟୀ, ୨୦୨୪ରେ ଭାରତରେ ବିଭିନ୍ନ ଗାଡ଼ିର ଧୂଆଁ ନିର୍ଗମନ ନଳୀରୁ ବାହାରୁଥିବା ବିଷାକ୍ତ ନାଇଟ୍ରୋଜେନ୍ ଅକ୍ସାଇଡ୍ ପରିମାଣର ୭୯ ପ୍ରତିଶତ କେବଳ ଭାରିଯାନ ଛାଡ଼ିଥିବାବେଳେ ୬୪ ପ୍ରତିଶତ ପିଏମ୍୨.୫ ନିର୍ଗତ କରିଥିଲା। ଏଥିରେ ସୁଧାର ଆଣିବାକୁ ହେଲେ କମ୍ ନିର୍ମଗନ ଏବଂ ଶୂନ ନିର୍ଗମନ ଗାଡ଼ି ସଂଖ୍ୟା ବଢ଼ାଇବାକୁ ପଡ଼ିବ ଏବଂ ପୁରୁଣା ଗାଡ଼ିଗୁଡ଼ିକୁ ପର୍ଯ୍ୟାୟକ୍ରମେ ରାସ୍ତାରୁ ହଟାଇବାକୁ ହେବ। ତାହା କରାଗଲେ ବର୍ତ୍ତମାନଠାରୁ ୨୦୫୦ ମଧ୍ୟରେ ଭାରତରେ ୧୭ ଲକ୍ଷ ଅକାଳ ମୃତ୍ୟୁକୁ ରୋକାଯାଇପାରିବ ବୋଲି ଅଧ୍ୟୟନରେ କୁହାଯାଇଛି।
