ଆମରୋହା,୨୪।୭: ଉତ୍ତର ପ୍ରଦେଶର ଆମରୋହା ଜିଲାର ହସନପୁର ପୋଲିସ ଷ୍ଟେଶନ ଅଞ୍ଚଳରେ ତିନି ଭଉଣୀ ଜଣେ ଯୁବକଙ୍କୁ ବିବାହ କରିଛନ୍ତି। ଏହି ତିନି ଭଉଣୀ ହେଉଛନ୍ତି YouTuber ଏବଂ ଯୁବକ ସେମାନଙ୍କର କ୍ୟାମେରାମ୍ୟାନ ଭାବରେ କାମ କରନ୍ତି, ସେମାନଙ୍କର ଭିଡିଓ ଶୁଟିଂ କରନ୍ତି।
କ୍ୟାମେରାମ୍ୟାନ ବିକାଶ ଓରଫ ବିକି ବିବାହ ଗତ ଜୁଲାଇ ୧୭ରେ ସ୍ଥାନୀୟ ଗ୍ରାମର ଏକ ମନ୍ଦିରରେ ହୋଇଥିଲା ଏବଂ ଏହି ଘଟଣାର ଭିଡିଓ ଏବଂ ଫଟୋ ବୁଧବାର ସୋସିଆଲ ମିଡିଆରେ ଷେୟାର କରାଯାଇଥିଲା।
ହସନପୁର କୋତୱାଲି କ୍ଷେତ୍ର ଅନ୍ତର୍ଗତ ଧାଉରିଆ ଗ୍ରାମର ବାସିନ୍ଦା ତିନି YouTuber ଭଉଣୀ ନିଜ କ୍ୟାମେରାମ୍ୟାନଙ୍କୁ ବିବାହ କରିଥିଲେ। ପରବର୍ତ୍ତୀ ସମୟରେ ଭିଡିଓଟିକୁ ସୋସିଆଲ ମିଡିଆରେ ଭାଇରାଲ କରିଥିଲେ। ଭାଇରାଲ ଫୁଟେଜରେ ବିକାଶ ତିନି ଯୁବତୀଙ୍କୁ ବିବାହ କରୁଥିବା ଏବଂ ସେମାନଙ୍କ ମଥାରେ ‘ସିନ୍ଦୂର’ ଲଗାଉଥିବା ଦେଖାଯାଇଛି। ଅନ୍ୟ ଅନେକ ଫଟୋ ଏବଂ ଭିଡିଓରେ ମଧ୍ୟ ସେହି ଚାରି ଜଣଙ୍କୁ ଏକାଠି ଦେଖାଯାଉଛି।
ସେମାନଙ୍କ ଭିଡିଓ ମାଧ୍ୟମରେ, ବିବାହରେ ସାମିଲ ଥିବା ଚାରି ଜଣ ବ୍ୟକ୍ତି ଏକ ସ୍ପଷ୍ଟ ବାର୍ତ୍ତା ଦେଇଛନ୍ତି ଯେ, ସେମାନେ କୌଣସି ଭୁଲ କରିନାହାଁନ୍ତି। ଭଉଣୀମାନେ କହିଥିଲେ ଯେ, ସେମାନେ ପିଲାଦିନରୁ ଏକାଠି ରହିବାକୁ ପ୍ରତିଜ୍ଞା କରିଥିଲେ ଏବଂ ଅଲଗା ରହିବାକୁ ସହ୍ୟ କରିପାରୁ ନ ଥିଲେ। ତେଣୁ ସେମାନେ ବିକାଶଙ୍କୁ ବିବାହ କରିଥିଲେ ଏବଂ ଏକାଠି ରହିବାକୁ ଇଚ୍ଛା କରିଥିଲେ। ସେମାନେ ସାମାଜିକ ମତାମତ ପ୍ରତି ଉଦାସୀନତା ପ୍ରକାଶ କରି ଯୁକ୍ତି ଦେଇଥିଲେ ଯେ, ଯେହେତୁ ରାଜା ଦଶରଥଙ୍କର ତିନି ଜଣ ରାଣୀ ଥିଲେ, ତେଣୁ ଏହି ପ୍ରକାରେ ବିବାହ କରିବାର ସେମାନଙ୍କର ନିଷ୍ପତ୍ତି ଅନୁଚିତ ନୁହେଁ।
ବିକାଶଙ୍କୁ ବିବାହ କରିଥିବା ତିନି ଭଉଣୀଙ୍କ ମଧ୍ୟରୁ ଦୁଇଜଣ ହେଉଛନ୍ତି ଯାଆଁଳା ଭଉଣୀ, ତୃତୀୟ ଜଣକ ନିକଟବର୍ତ୍ତୀ ଗାଁରେ ରହୁଥିବା ମାଉସୀ ଝିଅ। ଏକାଠି ସେମାନେ ‘AK 1990‘ ନାମକ ଏକ YouTube ଚ୍ୟାନେଲ ଚଳାନ୍ତି। ଏହି ଚ୍ୟାନେଲର ଅନେକ ଫଲୋଅର୍ସ ମଧ୍ୟ ଅଛନ୍ତି। ବିକାଶ ସେମାନଙ୍କର କ୍ୟାମେରାମ୍ୟାନ ଭାବରେ କାର୍ଯ୍ୟ କରନ୍ତି।
ତିନି ଭଉଣୀଙ୍କ ସମାନ ପୁରୁଷଙ୍କୁ ବିବାହ କରିବାର ନିଷ୍ପତ୍ତି ସେମାନଙ୍କ ପରିବାର ଏବଂ ସ୍ଥାନୀୟ ସମ୍ପ୍ରଦାୟ ମଧ୍ୟରେ ଅସନ୍ତୋଷ ସୃଷ୍ଟି କରିଛି, ଯେଉଁମାନେ ଏହି କାର୍ଯ୍ୟକୁ ଭୁଲ ବୋଲି ଦେଖୁଛନ୍ତି। ସ୍ଥାନୀୟ ପୋଲିସ ସମସ୍ତ ଚାରି ଜଣଙ୍କୁ – ସରୋଜ, ସାବିତ୍ରୀ, ସନ୍ତୋଷ ଏବଂ ବିକାଶଙ୍କୁ ପଚରାଉଚରା ପାଇଁ ଥାନାକୁ ଡକାଇଥିଲା। ସେମାନଙ୍କ ବୟସର ପ୍ରମାଣ ମଧ୍ୟ ଯାଞ୍ଚ କରାଯାଇଥିଲା। ଚାରିଜଣ ଖୁସି ପ୍ରକାଶ କରି କହିଥିଲେ ଯେ, ସେମାନେ ପାରସ୍ପରିକ ସମ୍ମତିରେ ବିବାହ କରିଛନ୍ତି। ଏପର୍ଯ୍ୟନ୍ତ କୌଣସି ପକ୍ଷ ପକ୍ଷରୁ ପୋଲିସରେ ଅଭିଯୋଗ କରାଯାଇ ନାହିଁ। ଏହି ବିବାହ ବର୍ତ୍ତମାନ ଏକ ପ୍ରମୁଖ ଆଲୋଚନାର ବିଷୟ ପାଲଟିଛି।
Dharitri – Odisha’s No.1 Odia Daily
