ଭୁବନେଶ୍ୱର,୮।୪(ବ୍ୟୁରୋ): ପୋଷ୍ଟାଲରେ ଜମା କରିବା ନାଁରେ ୧୫ ଲକ୍ଷରୁ ଅଧିକ ଟଙ୍କା ଆତ୍ମସାତ ଘଟଣାରେ ଶ୍ରୀ ଲିଙ୍ଗରିଜ ଥାନା ପୋଲିସ ଅଭିଯୁକ୍ତା ମହିଳା ଡାକ ଏଜେଣ୍ଟ ସ୍ବର୍ଣ୍ଣଲତା ଦାସଙ୍କୁ କୋର୍ଟ ଚାଲାଣ ପରେ ଜେଲକୁ ପଠାଇ ଦିଆଯାଇଛି। ତାଙ୍କଠାରୁ ୯୮ଜଣଙ୍କ ୧୨୯ଟି ପାସ୍ବୁକ୍ ଜବତ କରିବା ସହ ପଚରାଉଚରାବେଳେ ପୋଲିସ ବଡ଼ ଠକେଇର ସୂଚନା ପାଇଛି। ସେ ଦେଢ଼କୋଟିରୁ ଊର୍ଦ୍ଧ୍ୱ ଟଙ୍କା ଠକେଇ କରିଥିବା ପୋଲିସ ଅନୁମାନ କରୁଛି। ଅନ୍ୟପଟେ ଏହି ଘଟଣା ପ୍ରଘଟ ହେବା ପରେ ଅଭିଯୁକ୍ତା ମହିଳାଙ୍କ ନାଁରେ ଶୁକ୍ରବାର ୩୦ରୁ ଅଧିକ ମହିଳା ଥାନାରେ ଠକେଇ ଅଭିଯୋଗ କରିଛନ୍ତି। ଏପରିକି ଜଣେ ବୃଦ୍ଧାଙ୍କଠାରୁ ମଧ୍ୟ ୩୦ହଜାର ଟଙ୍କା ଠକିନେଇଛନ୍ତି। ପୋଲିସ ଘଟଣାକୁ ଗୁରୁତ୍ୱର ସହ ନେଇ ଖୋଳତାଡ ଚଳାଇଛନ୍ତି। ଅଭିଯୁକ୍ତା ସ୍ବର୍ଣ୍ଣପ୍ରଭା ଉକ୍ତ ଟଙ୍କା କେଉଁଠି ବିନିଯୋଗ କରିଛନ୍ତି, କାହା ଆକାଉଣ୍ଟକୁ ପଠାଇଛନ୍ତି, ଏଥିରେ ଆଉ କିଏ ସଂପୃକ୍ତ ଅଛନ୍ତି, ତାହା ଜାଣିବାକୁ ପୋଲିସ ତାଙ୍କୁ ରିମାଣ୍ଡରେ ଆଣିବାକୁ ଯୋଜନା କରୁଛି।
ଅଭିଯୁକ୍ତା ସ୍ବର୍ଣ୍ଣପ୍ରଭା ଭୀମ ଟାଙ୍ଗୀ ପୋଷ୍ଟ ଅଫିସ୍ରେ ଡାକ ଏଜେଣ୍ଟ ଭାବେ କାମ କରନ୍ତି। ତେଣୁ ପୋଷ୍ଟାଲରେ ଆକାଉଣ୍ଟ ଖୋଲିଥାନ୍ତି। ହେଲେ ଲୋକେ ଆକାଉଣ୍ଟ ଖୋଲିବା ଓ ଜମା ବାବଦକୁ ଦେଉଥିବା ଟଙ୍କାକୁ ସେ ଜମା ବଦଳରେ ଆତ୍ମସାତ କରିଦେଉଥିଲେ। ଏପରିକି ଧରା ନ ପଡିବା ଲାଗି ପାସ୍ବୁକ ଓ ପୋଷ୍ଟାଲ ସେଭିଙ୍ଗ୍ ଆକାଉଣ୍ଟ ଖାତାକୁ ନିଜ ପାଖରେ ରଖୁଥିଲେ। ଲୋକେ ତାହାକୁ ମାଗିଲେ ସେ ବାହାନା କରି ଦିନ ପରେ ଦିନ ଗଡ଼ାଉଥିଲେ। ଲିଙ୍ଗରାଜ ମନ୍ଦିରରେ ଅଭଡା ପ୍ରସ୍ତ୍ରୁତ କରୁଥିବା ଜଣେ ମହିଳା ଖାତା ମାଗିବାକୁ ଅଭିଯୁକ୍ତାଙ୍କ ପାଖକୁ ଯାଇଥିବାବେଳେ ସେ ଅଶ୍ରାଭ୍ୟ ଭାଷାରେ ଗାଳିଗୁଳଜ କରିବା ସହ ବିଭିନ୍ନ ପ୍ରକାର ଧମକ ଦେଇଥିଲେ। ତେଣୁ ସେ ଥାନାର ଦ୍ୱାରସ୍ଥ ହେବା ସହ ୧୫ ଲକ୍ଷ ଟଙ୍କାର ଆତ୍ମସାତ ଅଭିଯୋଗ କରିଥିଲେ। ପୋଲିସ ତଦନ୍ତ କରିବା ସହ ଅଭିଯୁକ୍ତା ସ୍ବର୍ଣ୍ଣପ୍ରଭାଙ୍କୁ ଗୁରୁବାର ଗିରଫ କରିଥିଲା।
