ହାଙ୍ଗଝୋ,୨ା୧୦(ପି.ଟି.): ଏସିଆନ୍ ଗେମ୍ସ ୨୦୨୩ରେ ଭାରତୀୟ ବକ୍ସରଙ୍କ ଚମତ୍କାର ପ୍ରଦର୍ଶନ ଜାରି ରହିଛି। ରବିବାର ନିଖତ ଜରିନ୍ ବ୍ରୋଞ୍ଜ ପଦକ ହାସଲ କରିଥିବା ବେଳେ ପରବିନ୍ ହୁଦା ପ୍ୟାରିସ୍ ଅଲିମ୍ପିକ୍ସ ପାଇଁ ଯୋଗ୍ୟତା ଅର୍ଜନ କରିଛନ୍ତି। ୫୦ କିଗ୍ରା ଓଜନ ବର୍ଗରେ ଖେଳୁଥିବା ନିଖତ ସେମି ଫାଇନାଲରେ ଥାଇଲାଣ୍ଡର ରାକାଷ୍ଟ ଚୁଥାମଟଙ୍କଠାରୁ ୨-୧ରେ ପରାଜିତ ହୋଇଛନ୍ତି। ପ୍ରଥମ ରାଉଣ୍ଡରେ ନିଖତ ବିଜୟୀ ହୋଇଥିବା ବେଳେ ଥାଇ ବକ୍ସର ପରବର୍ତ୍ତୀ ଦୁଇ ରାଉଣ୍ଡରେ ବାଜି ମାରି ନେଇଥିଲେ। ଏହା ପୂର୍ବରୁ ନିଖତ ମଧ୍ୟ ଅଲିମ୍ପିକ୍ସ ପାଇଁ ଯୋଗ୍ୟତା ଅର୍ଜନ କରି ସାରିଛନ୍ତି। ୨୦୨୨ ବିଶ୍ୱ ବକ୍ସିଂ ଚାମ୍ପିୟନଶିପ୍ ବ୍ରୋଞ୍ଜ ପଦକ ବିଜେତା ପରବିନ୍ ଉଜବେକିସ୍ତାନର ସିଟୋରା ଟୁର୍ଡିବେକୋଭାଙ୍କୁ ପରାସ୍ତ କରିଛନ୍ତି। ଏହି ବିଜୟ ସହିତ ୫୭ କିଗ୍ରା ଓଜନ ବର୍ଗର ସେମିରେ ପ୍ରବେଶ କରିବା ସହ ଭାରତ ପାଇଁ ଏକ ପଦକ ପକ୍କା କରିଛନ୍ତି। ରାଜ୍ୟଗୋଷ୍ଠୀ ବ୍ରୋଞ୍ଜ ପଦକ ବିଜୟିନୀ ଜସ୍ମିନ୍ ଲମ୍ବୋରିଆ ୬୦ କିଗ୍ରା ଓଜନ ବର୍ଗ କ୍ୱାର୍ଟର ଫାଇନାଲରୁ ବିଦାୟ ନେଇଛନ୍ତି। କୋରିଆର ଓନ୍ ଉନଗ୍ୟୋଙ୍ଗଙ୍କ ବିପକ୍ଷ ମ୍ୟାଚ୍କୁ ରେଫରି ଅଧାରୁ ରୋକିବାକୁ ବାଧ୍ୟ ହୋଇଥିଲେ। ପ୍ରଥମ ବାଉଟ୍କୁ ୫-୦ରେ ଜିତିବା ପରେ ଜସ୍ମିନ୍ ନିଜ ଧ୍ୟାନ ହରାଇଥିଲେ। କୋରିଆନ୍ ବକ୍ସରଙ୍କ ପଞ୍ଚ ପରେ ପଞ୍ଚ କାରଣରୁ ଶେଷରେ ମ୍ୟାଚ୍କୁ ଅଧାରୁ ରୋକିଥିଲେ ରେଫରି।
ଆର୍ଚେରୀ: ଭାରତୀୟ ତୀରନ୍ଦାଜମାନେ ଏସିଆନ୍ ଗେମ୍ସରେ ଚମତ୍କାର ପ୍ରଦର୍ଶନ କରିଛନ୍ତି। ରବିବାର ଅନୁଷ୍ଠିତ କମ୍ପାଉଣ୍ଡ ଇଭେଣ୍ଟର ମହିଳା ଓ ମିକ୍ସଡ ପେୟାର ବର୍ଗର ଯୋଗ୍ୟତା ପର୍ଯ୍ୟାୟରେ ଭାରତ ଏକ ନମ୍ବର ସ୍ଥାନ ଅଳଙ୍କୃତ କରିଛି। ଭାରତ ପକ୍ଷରୁ ଜ୍ୟୋତି ସୁରେଖା ଭେନମ୍ ଚମତ୍କାର ପ୍ରଦର୍ଶନ କରିଥିଲେ। ବିଶ୍ୱ ଚାମ୍ପିୟନ ଓଜସ୍ ଦେଓତାଲେ ଓ ୨୦୧୪ ଏସିଆନ୍ ଗେମ୍ସ ରୌପ୍ୟ ପଦକ ବିଜେତା ଅଭିଷେକ ବର୍ମା ତୃତୀୟ ଓ ଚତୁର୍ଥ ସ୍ଥାନରେ ରହିଥିବା ବେଳେ ପୁରୁଷ କମ୍ପାଉଣ୍ଡ ଟିମ୍ ଦ୍ୱିତୀୟ ସ୍ଥାନରେ ରହିଛି। ମହିଳା କମ୍ପାଉଣ୍ଡ ଟିମ୍ ପକ୍ଷରୁ ଜ୍ୟୋତି (୭୦୪ ପଏଣ୍ଟ) ପ୍ରଥମ ସ୍ଥାନରେ ଓ ଅଦିତି ସ୍ବାମୀ(୬୯୬ ପଏଣ୍ଟ) ସହ ଚତୁର୍ଥ ସ୍ଥାନରେ ରହିଥିଲେ। ଅନ୍ୟତମ ଭାରତୀୟ ପରନିତ୍ କୌର ୧୨ତମ ସ୍ଥାନରେ ରହିଥିଲେ ମଧ୍ୟ ଭାରତ ପ୍ରଥମ ସ୍ଥାନରେ ରହି କ୍ୱାର୍ଟର ଫାଇନାଲକୁ ଯୋଗ୍ୟତା ଅର୍ଜନ କରିଛି। କୋରିଆ ସହିତ ଭାରତର ସ୍କୋର ଟାଇ ରହିଥିଲେ ମଧ୍ୟ ଅଧିକ ୧୦ ପଏଣ୍ଟ ସ୍କୋର କରି ଭାରତ କ୍ୱାର୍ଟର ଫାଇନାଲକୁ ଉନ୍ନୀତ ହୋଇଥିଲା।
କାୟାକିଂ ଓ କାନୋଇଂ: କାୟାକିଂ ଓ କାନୋଇଂ ଇଭେଣ୍ଟରେ ଭାରତୀୟ କାୟାକ ସୋନିଆ ଦେବୀ ଫାଇରେମବାମ୍ ଫାଇନାଲରେ ପ୍ରବେଶ କରିଛନ୍ତି। ମହିଳା ସିଙ୍ଗଲ କାୟାକ ୫୦୦ ମି. ଇଭେଣ୍ଟରେ ଦ୍ୱିତୀୟ ସ୍ଥାନରେ ରହି ଫାଇନାଲରେ ପ୍ରବେଶ କରିଛନ୍ତି। ସୋନିଆ ହିଟ୍ସରେ ୨:୧୭.୩୫୧ ସେକେଣ୍ଡର ଟାଇମିଂ ସହିତ ଚତୁର୍ଥ ସ୍ଥାନରେ ରହି ସେମିରେ ପ୍ରବେଶ କରିଥିଲେ। ସେମି ଫାଇନାଲରେ ନିଜ ଟାଇମିଂରେ ଉନ୍ନତି ଆଣିବା ସହିତ ଦ୍ୱିତୀୟ ସ୍ଥାନରେ ରହିଥିଲେ ସୋନିଆ। ସେମିରେ ୨:୧୬.୪୩୫ର ଟାଇମିଂ ହାସଲ କରିଥିଲେ। ମଙ୍ଗଳବାର ଫାଇନାଲ ଇଭେଣ୍ଟ ଅନୁଷ୍ଠିତ ହେବ। ୨୦୦ ମିଟର ସ୍ପ୍ରିଣ୍ଟରେ ମେଘା ପ୍ରଦୀପ ସେମିରୁ ବିଦାୟ ନେଇଛନ୍ତି। ୫୬.୭୦୫ ସେକେଣ୍ଡର ଟାଇମିଂ ସହ ସେମିରେ ପ୍ରବେଶ କରିଥିଲେ ମଧ୍ୟ ମେଘା ବିଦାୟ ନେଇଥିଲେ।
ସ୍କ୍ବାଶ: ପୁରୁଷ ଦଳ ପାକିସ୍ତାନକୁ ହରାଇ ସ୍ବର୍ଣ୍ଣ ପଦକ ଜିତିବା ପରେ ସ୍କ୍ବାଶ ମିକ୍ସଡ ଡବଲ୍ସରେ ଭାରତୀୟ ଖେଳାଳିଙ୍କ ଚମତ୍କାର ପ୍ରଦର୍ଶନ ଜାରି ରହିଛି। ପୁଲ୍ ଏ’ରେ ସ୍ଥାନ ପାଇଥିବା ଦୀପିକା ପଲିକଲ ଓ ହରିନ୍ଦର ପାଲ ସିଂ ସନ୍ଧୁ ଦୁଇଟି ମ୍ୟାଚରେ ବିଜୟୀ ହୋଇଛନ୍ତି। ଦକ୍ଷିଣ କୋରିଆ ଖେଳାଳିଙ୍କ ୨୨ ମିନିଟ ଓ ପାକିସ୍ତାନ ଖେଳାଳିଙ୍କୁ ମାତ୍ର ୧୧ ମିନିଟରେ ଉଭୟ ପରାସ୍ତ କରିଥିଲେ। ପୁଲ୍ ଡି’ରେ ଥିବା ଅନ୍ୟତମ ଭାରତୀୟ ଯୋଡ଼ି ଅନହତ ସିଂ ଓ ଅଭୟ ସିଂ ମଧ୍ୟ ଚମତ୍କାର ପ୍ରଦର୍ଶନ ଜାରି ରଖି ଯଥାକ୍ରମେ ୧୫ ଓ ୧୬ ମିନିଟର ସମୟ ନେଇ ଫିଲିପାଇନ୍ସ ଓ ପାକିସ୍ତାନକୁ ପରାସ୍ତ କରିଥିଲେ। ପୁରୁଷ ସିଙ୍ଗଲ୍ସ ଇଭେଣ୍ଟରେ ଭାରତର ମହେଶ ମନଗାଓଁକର ଫିଲିପାଇନ୍ସର ଜୋନାଥନ ରେୟେସଙ୍କୁ ୧୧-୮, ୧୧-୪ ଓ ୧୧-୨ ସେଟ୍ରେ ପରାସ୍ତ କରି ରାଉଣ୍ଡ ଅଫ୍ ୩୨ରେ ପ୍ରବେଶ କରିଛନ୍ତି।
