ନୂଆଦିଲ୍ଲୀ, ୮।୫(ପି.ଟି.): ଅର୍ଜୁନ ଲାଲ ଓ ଅରବିନ୍ଦ ସିଂଙ୍କୁ ନେଇ ଗଠିତ ଭାରତୀୟ ରୋଇଂ ଦଳ ଟୋକିଓ ଅଲିମ୍ପିକ୍ସରେ ଅଂଶଗ୍ରହଣ କରିବାକୁ ଯୋଗ୍ୟତା ହାସଲ କରିଛି। ଏହି ଦୁଇ ରୋୟର ପୁରୁଷ ଲାଇଟ ଓ୍ବେଟ ଡବଲ୍ସ ସ୍କଲ ଇଭେଣ୍ଟ ପାଇଁ କ୍ୱାଲିଫାଏ କରିଛନ୍ତି। ଟୋକିଓରେ ଚାଲିଥିବା ଏସିଆ/ଓସେନିଆ କଣ୍ଟିନେଣ୍ଟାଲ କ୍ୱାଲିଫାଇଂ ରେଗାଟାର ଫାଇନାଲ ରେସ୍ରେ ଦ୍ୱିତୀୟ ସ୍ଥାନ ଅଧିକାର କରି ଦୁଇ ରୋୟର ଏହି ସଫଳତା ପାଇଛନ୍ତି।
ଆଉ ଜଣେ ଭାରତୀୟ ରୋୟର ଜାକାର ଖାଁ ପୁରୁଷ ସିଙ୍ଗଲ୍ସ ସ୍କଲ୍ସ ଫାଇନାଲରେ ଚତୁର୍ଥ ସ୍ଥାନ ଅଧିକାର କରିଛନ୍ତି। ଏହି ଇଭେଣ୍ଟରେ ୫ଟି ଅଲିମ୍ପିକ୍ କୋଟ ରହିଥିଲା। ତେବେ ଏହି ରିଗେଟାରେ ଗୋଟିଏ ଦେଶ ପାଇଁ ଗୋଟିଏ କ୍ୱାଲିଫାଇଂ ସ୍ଥାନ ରହିବାର ନିୟମ ରହିଛି। ଫଳରେ ଜାକାର ଯୋଗ୍ୟତା ହାସଲ କରିବାରେ ବିଫଳ ହୋଇଛନ୍ତି। ପୁରୁଷ ଲାଇଟ୍ଓ୍ବେଟ ଡବଲ ସ୍କଲ୍ସ ଇଭେଣ୍ଟରେ ଶ୍ରେଷ୍ଠ ୩ ସ୍ଥାନ ଅଧିକାର କରିଥିବା ଖେଳାଳି ଅଲିମ୍ପିକ ଯୋଗ୍ୟତା ହାସଲ କରିଥାନ୍ତି। ଅର୍ଜୁନ ଓ ଅରବିନ୍ଦଙ୍କୁ ବାଦ୍ ଦେଲେ ଅନ୍ୟ କୌଣସି ରୋୟର ଅଲିମ୍ପିକ୍ସରେ ଅଂଶଗ୍ରହଣ କରିବେ ନାହିଁ। କୋଭିଡ୍-୧୯ କାରଣରୁ ଅନ୍ୟ କୌଣସି ରୋୟର ଅଲିମ୍ପିକ୍ସ କ୍ୱାଲିଫାୟରରେ ଅଂଶଗ୍ରହଣ କରିବେ ନାହିଁ। ଫଳରେ କେବଳ ଏହି ଦୁଇ ରୋୟର ଅଲିମ୍ପିକ୍ସରେ ଭାରତ ପାଇଁ ପ୍ରତିନିଧିତ୍ୱ କରିବେ। ଇଟାଲୀରେ ଆଉ ଏକ ଅଲିମ୍ପିକ କ୍ୱାଲିଫାୟର ଆୟୋଜନ ହେବ। ତେବେ ଭାରତ କରୋନା କାରଣରୁ ଆଉ କାହାକୁ ସେଠାକୁ ପଠାଇବ ନାହିଁ। ଫଳରେ ଆଉ କୌଣସି ରୋୟର ଅଲିମ୍ପିକ୍ସରେ ଅଂଶଗ୍ରହଣ ନ କରିବା ନିଶ୍ଚିତ ହୋଇଛି। ଟୋକିଓ ବେସ୍ଥିତ ସି ଫରେଷ୍ଟ ଓ୍ବାଟରଓ୍ବେଠାରେ ଚାଲିଥିବା ଏହି ଇଭେଣ୍ଟରେ ଏକ ୧୪ ଜଣିଆ ଭାରତୀୟ ଦଳ ଅଂଶଗ୍ରହଣ କରିଛି।
