ଚଣ୍ଡିଗଡ,୬।୧୨: ନୂଆ କୃଷି ଆଇନ ବିରୋଧରେ କୃଷକ ଆନ୍ଦୋଳନର ସମର୍ଥନ ବୃଦ୍ଧି ପାଉଛି। ଦିଲ୍ଲୀ ସୀମାରେ ଘେରି ରହିଥିବା ହଜାର ହଜାର କୃଷକ ଛାଉଣି ହୋଇଥିବାବେଳେ ଡିସେମ୍ବର ୮ରେ କୃଷକମାନେ ‘ଭାରତ ବନ୍ଦ’ ଡାକରା ଦେଇଛନ୍ତି। ଏଥି ସହିତ ସିଂଘୁ ସୀମାରେ ଅଧିକ ରଣନୀତି ପାଇଁ କୃଷକଙ୍କ ଏକ ବୈଠକ ଚାଲିଛି। ଅନ୍ୟପକ୍ଷରେ, ହରିୟାଣାର ବକ୍ସର ବିଜେନ୍ଦ୍ର ସିଂ ମଧ୍ୟ ନିଜର ଆଭିମୁଖ୍ୟ ସ୍ପଷ୍ଟ କରିଛନ୍ତି। କୃଷି ଆଇନ ପ୍ରତ୍ୟାହାର ନ ହେଲେ ସେ ଖେଳ ରତ୍ନ ପୁରସ୍କାର ଫେରାଇବାକୁ ଚେତାବନୀ ଦେଇଛନ୍ତି। ଯଦି ସରକାର କୃଷି ଆଇନ ପ୍ରତ୍ୟାହାର ନ କରନ୍ତି ତେବେ ସେ ତାଙ୍କ ଖେଳ ରତ୍ନ ପୁରସ୍କାର ଫେରସ୍ତ କରିବେ ବୋଲି ବକ୍ସର ବିଜେନ୍ଦ୍ର କହିଛନ୍ତି। ସୂଚନାଯୋଗ୍ୟ, ରବିବାର ବିଜେନ୍ଦ୍ର କୃଷକ ଆନ୍ଦୋଳନରେ ଯୋଗଦେବା ପାଇଁ ସିଂଘୁ ସୀମାରେ ପହଞ୍ଚିଥିଲେ। ୨୦୦୯ରେ ବିଜେନ୍ଦ୍ରଙ୍କୁ ରାଜୀବ ଗାନ୍ଧୀ ଖେଳ ରତ୍ନ ପ୍ରଦାନ କରାଯାଇଥିଲା। ସେ ୨୦୦୮ ବେଜିଂ ଅଲିମ୍ପିକ୍ସରେ ବ୍ରୋଞ୍ଜ ପଦକ ଜିତି ଇତିହାସ ସୃଷ୍ଟି କରିଥିଲେ। ସେ ପ୍ରଥମ ଭାରତୀୟ ବକ୍ସର ଯିଏକି ଏହି ଖେଳରେ ପଦକ ଜିତିଥିଲେ। ବେଜିଂ ଅଲିମ୍ପିକ୍ସରେ ପଦକ ଜିତିବାରେ ବିଜେନ୍ଦ୍ର ଦ୍ୱିତୀୟ ଭାରତୀୟ ଆଥଲେଟ ଥିଲେ।
