ସେ ପିଲାଟିଦିନୁ କଳାପ୍ରେମୀ। କେଉଁଠି ବାଦ୍ୟ ବାଜିଲେ ଆପେ ଆପେ ନାଚି ଉଠେ ତାଙ୍କ କୁନି କୁନି ପାଦ। ଆଉ ପିଲାଦିନର ସେହି ରୁଚି ଆଜି ତାଙ୍କୁ ଦେଇଛି ଜଣେ ସଫଳ ଓଡ଼ିଶୀ ନୃତ୍ୟାଙ୍ଗନାର ପରିଚୟ। ସେ ହେଉଛନ୍ତି ଭୁବନେଶ୍ୱର ନାଲ୍କୋ ନଗରରେ ରହୁଥିବା ମାଆ ବିଷ୍ଣୁପ୍ରିୟା ମିଶ୍ର ଏବଂ ବାପା ବିଜୟ କୁମାର ମହାପାତ୍ରଙ୍କ ଝିଅ ଶୁଭଶ୍ରୀ। ସେ ମାତ୍ର ୫ ବର୍ଷ ବୟସରୁ ପୁଷ୍ପରଞ୍ଜନ ମଙ୍ଗରାଜଙ୍କ ନିକଟରେ ନୃତ୍ୟଶିକ୍ଷା ଆରମ୍ଭ କରିଥିଲେ। ଧୀରେ ଧୀରେ ଓଡ଼ିଶୀ ସଙ୍ଗୀତ ଓ ନୃତ୍ୟ ତାଙ୍କୁ ଆମ କଳା ଓ ସଂସ୍କୃତି ଆଡ଼କୁ ଆକୃଷ୍ଟ କରିଚାଲିଲା। ସେ ନିଜ ବିଦ୍ୟାଳୟ ବ୍ୟତୀତ ରାଜ୍ୟର ବିଭିନ୍ନ ମଞ୍ଚରେ ଓଡ଼ିଶୀ ନୃତ୍ୟ ପ୍ରଦର୍ଶନ କରି ଦର୍ଶକଙ୍କଠାରୁ ସାଉଁଟିଛନ୍ତି ପ୍ରଶଂସା। ବର୍ତ୍ତମାନ ସୁଦ୍ଧା ସେ ଇଣ୍ଟରନ୍ୟାଶନାଲ୍ ଓଡ଼ିଶୀ ଡ୍ୟାନ୍ସ ଫେଷ୍ଟିଭାଲ୍-୨୦୨୨, ଉତ୍କଳଶ୍ରୀ ଅଲ୍ ଇଣ୍ଡିଆ ଡ୍ୟାନ୍ସ କ୍ଲାସିକାଲ୍ ଆଣ୍ଡ ଫୋକ୍ ଫେଷ୍ଟିଭାଲ୍- ୨୦୨୨, ନୃତ୍ୟାଞ୍ଜଳି ଫେଷ୍ଟିଭାଲ୍ ଭଳି ଅନେକ ଉତ୍ସବରେ ଏକକ ନୃତ୍ୟ ପରିବେଷଣ କରି ପୁରସ୍କୃତ ହୋଇଛନ୍ତି। ସେ ସାମ୍ବାଦିକତା ଓ ଗଣଯୋଗାଯୋଗ ବିଭାଗରେ ମାଷ୍ଟର ଡିଗ୍ରୀ ହାସଲ କରିବା ସହିତ ପ୍ରାଚୀନ କଳାକେନ୍ଦ୍ର, ଚଣ୍ଡିଗଡ଼ରୁ ଓଡ଼ିଶୀରେ ନୃତ୍ୟ ବିଶାରଦ ମଧ୍ୟ ସମାପ୍ତ କରିସାରିଛନ୍ତି। ସତ୍ୟ ଉପରେ ଆଧାରିତ ଫିଲ୍ମ ବା ଡକ୍ୟୁମେଣ୍ଟାରୀ ଫିଲ୍ମରେ ରୁଚି ଥିବାରୁ ସେ କଲେଜପଢ଼ା ସହିତ ଅନେକ ଓଡ଼ିଆ ଡକ୍ୟୁମେଣ୍ଟାରୀ ଫିଲ୍ମ ମେକରଙ୍କ ସହ ଆସିଷ୍ଟାଣ୍ଟ ଡାଇରେକ୍ଟର ଏବଂ ସିନେମାଟୋଗ୍ରାଫର୍ ଭାବେ କାର୍ଯ୍ୟ କରିସାରିଛନ୍ତି। ସେହିପରି ସେ ସାଉଥ୍ ଇଣ୍ଡିଆନ୍ ଫିଲ୍ମ ଇଣ୍ଡଷ୍ଟ୍ରୀରେ ମଧ୍ୟ ପ୍ରଡକ୍ସନ ଟିମ୍ ସହିତ କାମ କରିଛନ୍ତି। ବର୍ତ୍ତମାନ ସେ ଭୁବନେଶ୍ୱରରେ ଏକ ଆଡ୍ ଏଜେନ୍ସିରେ କ୍ରିଏଟିଭ୍ ମ୍ୟାନେଜର ଭାବେ କାର୍ଯ୍ୟରତ ଅଛନ୍ତି। ସେ ନିଜର ସମସ୍ତ ସଫଳତା ପଛରେ ଅଭିଭାବକଙ୍କ ଉତ୍ସାହ ଓ ଗୁରୁଙ୍କ ପ୍ରୋତ୍ସାହନ ରହିଛି ବୋଲି ପ୍ରକାଶ କରନ୍ତି। ଭବିଷ୍ୟତରେ ଜଗନ୍ନାଥ ସଂସ୍କୃତି ଏବଂ ଓଡ଼ିଶୀ ନୃତ୍ୟ ଉପରେ ଅଧିକରୁ ଅଧିକ ରିସର୍ଚ୍ଚ କରି ବିଶ୍ୱଦରବାରରେ ଏହାର ପ୍ରଚାର ପ୍ରସାର କରିବାକୁ
ଲକ୍ଷ୍ୟ
ରଖିଥିବା କୁହନ୍ତି ଶୁଭଶ୍ରୀ।
